ပြည်နယ်ဖွံ့ဖြိုးတိုးတက်ရေး အားမရတဲ့အချက်မရှိဟု ပြည်နယ်အစိုးရပြော

စိုးထိုက်အောင်

ကယားပြည်နယ်၏ ဖွံ့ဖြိုးတိုးတက်ရေးလုပ်ငန်းနဲ့ပတ်သတ်ပြီး ပြည်နယ်အစိုးရ လေးနှစ်ကျော်ကာလအတွင်းမှာ အားမရတဲ့အချက်မရှိခဲ့ပါဘူးလို့ အစိုးရအဖွဲ့ဝင်က ပြောကြားလိုက်ပါတယ်။

လေးနှစ်ကျော်ကာလအတွင်းဒေသဖွံ့ဖြိုးမှုကို လုပ်ဆောင်တဲ့အခါမှာ အားလုံးက တက်ညီလက်ညီနဲ့ဆောင်ရွက်နေတဲ့အတွက်ကြောင့် အားမရတဲ့အချက်မရှိဘူးလို့ ကယားပြည်နယ်အစိုးရအဖွဲ့၏ အတွင်းရေးမှူး ဦးအံ့မော်က ၂၀၂၀၊ ဇူလိုင်လ ၂၄ရက်နေ့ ပြည်နယ်ခန်းမမှာ ကျင်းပတဲ့ ကယားပြည်နယ်အစိုးရအဖွဲ့ရဲ့ သတင်းစာရှင်းလင်းပွဲမှာ ပြောကြားလိုက်တာဖြစ်ပါတယ်။

ဦးအံ့မော်က “ ဆောင်ရွက်မှုတွေထဲမှာ အောင်မြင်မှုအရှိဆုံးကတော့ ဟော်တယ်နှင့်ခရီးသွားလာရေးကဏ္ဍ၊ လမ်းပန်းဆက်သွယ်ရေးကဏ္ဍ၊ လျှပ်စစ်ဓာတ်အားဖြန့်ဖြူးရေးကဏ္ဍ၊ စိုက်ပျိုးရေရရှိရေးလုပ်ငန်း၊ စည်ပင်သာယာရေးကဏ္ဍ၊ ပညာရေး၊ ကျန်းမာရေးကဏ္ဍတို့ဖြစ်ပြီးတော့ ဟော်တယ်နှင့် ခရီးသွားလာရေးကဏ္ဍမှာ ပြည်နယ်ဂုဏ်ဆောင်မှု တစ်ခုအနေနဲ့ ၂၀၁၉ခုနှစ် အာဆီယံ အသန့်ရှင်းဆုံးမြို့တော်အဖြစ် ဆုရရှိခဲ့တာတွေ့ရပါတယ်။” လို့ ပြောပါတယ်။

ကယားပြည်နယ်အစိုးရအဖွဲ့၏ အတွင်းရေးမှူး ဦးအံ့မော်က ၂၀၂၀၊ ဇူလိုင်လ ၂၄ရက်နေ့ ပြည်နယ်ခန်းမမှာ ကျင်းပတဲ့ ကယားပြည်နယ်အစိုးရအဖွဲ့ရဲ့ သတင်းစာရှင်းလင်းပွဲမှာ ပြောကြားခဲ့စဉ်

ဒေသဖွံ့ဖြိုးမှုကို အတိုင်းအတာတစ်ခုအထိကျေနပ်အားရပေမဲ့ ၂၀၁၅ ခုနှစ် ရွေးကောက်ပွဲ မဲဆွယ်တုန်းကလုပ်ပေးမယ်ဆိုတဲ့လမ်းကိစ္စတွေ၊ ရေကိစ္စတွေကို မလုပ်ပေးတာကြောင့် ပြည်နယ်အစိုးရအဖွဲ့ဝင်တွေဆီ ကိုယ်တိုင် သွားရောက် တင်ပြနေရပါသေးတယ်လို့ ဖရူဆိုမြို့နယ်အနောက်ဘက်ခြမ်း ကေကောအုပ်စုမှ ကတ်သလစ်ကျောင်းထိုင်ဘုန်းတော်ကြီး Fr. အန်ထော်နီက ပြောပါတယ

“ သူ့ရဲ့အမတ်လောင်းတွေပေါ့နော် ဆွယ်တုန်းကဆိုရင် ဘာလုပ်ပေး၊ ညာလုပ်ပေးမယ်ပေါ့နော် အခုက သူကျလာတော့ ကိုယ်တော်တို့တင်ပြတယ်ပေါ့နော်။ ကိုယ်တော်တို့တင်ပြတယ် ဒီကိစ္စမှာ ဒီလမ်းကိစ္စတွေ၊ အခုနက ရေကိစ္စတွေနော် ဒီကိုယ်တော်တို့တင်ပြတယ်ဆို ဒါကိုယ်တော်တို့အလုပ်မဟုတ်ဘူး။ တကယ်တမ်းအမှန်ပြောမယ်ဆို ကိုယ်တော်တို့က ဘာသာရေးဆိုရင် ဘာသာရေးပဲလုပ်ရမယ်။ဆိုတော့ ဥပမာ သူတို့လွှတ်တော်အမတ်ဆိုလည်း ပြည်သူလူထု သူတို့ကတိထားခဲ့တဲ့ မဲဆန္ဒနယ်တွေပေ့ါနော် သူတို့ကြည့်ပေးရမယ်လေး။” လို့ သုံးသပ်ပြောဆိုသွားပါတယ်။

လက်ရှိအစိုးရ၏ ၄နှစ်ကျော်ကာလ အတွင်းမှာ ကယားပြည်နယ်ရဲ့ကျေးလက်ဒေသဖွံ့ဖြိုးတိုးတက်ရေးနှင့်ပတ်သတ်ပြီး စီမံကိန်းတော်တော်များများကို ဆောင်ရွက်ပေးနိုင်ခဲ့တဲ့ အတွက်ကြောင့် ပြည်နယ်၏ဖွံ့ဖြိုးတိုးတက်ရေးအပိုင်းမှာ ကျေနပ်အားရမှု ရှိတယ်လို့ ကယားပြည်နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ပြည်နယ်ဦးစီးမှူး ညွှန်ကြားရေးမှူး ဦးကျော်သူအောင်က ပြောပါတယ်။

“နောက်တစ်ခါ ကျနော်တို့ ဒါ လုပ်ငန်းနယ်ပယ်အသစ်ဖြစ်တဲ့ ကျနော်တို့ ကျေးလက်ကုန်ထုတ်လမ်းတွေ ၊ ကျေးလက်တံတားတွေလည်း ကျနော်တို့ဒါဆောင်ရွက်ပေးလာနိုင်တဲ့ အနေအထားရ်ှိပါတယ်။ နောက်ထိုနည်း၎င်းပဲ ကျနော်တို့ဌာနအနေနဲ့ဆိုရင်တော့ ကျနော်တို့ဒါ လူထုက ဗဟိုပြုပြီးတော့ လူထုကိုယ်တိုင်စီမံခန့်ခွဲတဲ့ ကျနော်တို့CDD စီမံကိန်းပေ့ါနော် လူထုဗဟိုပြုစီမံကိန်းကိုလည်း ကျနော်တို့ ဒါအကောင်အထည်ဖော်ဆောင်ရွက်နိုင်ခဲ့တယ်။ နောက်ကျေးရွာတွေမှာ ကျနော်တို့ဆင်းရဲတဲ့ အိမ်ထောင်စုတွေ ကျနော်တို့ ဒါ ဝင်ငွေ သူတို့တွေ မတည်ရင်းနှီးမှုတွေ ရပြီးတော့ သူတို့ရဲ့ဒါ လယ်ယာကုန်ထုတ်လုပ်ငန်းတွေ၊ ကျနော်တို့မွေးမြူရေးလုပ်ငန်းတွေ၊ တစ်နိုင်တပိုင် စီးပွားရေးတွေ ၊ အခြားသောလုပ်ငန်းတွေကို ကျနော်တို့ မတည်ဆောင်ရွက်နိုင်တဲ့ ကျနော်တို့မြစိမ်းရောင် စီမံကိန်းတွေကိုလည်း ကျနော်တို့ဆောင်ရွက်ပေးနိုင်ခဲ့တယ်။” လို့ဦးကျော်သူအောင်က ကန္တာရဝတီတိုင်း(မ်)ကို ပြောပါတယ်။

ဒေသ၏ ဖွံ့ဖြိုးရေးက ပညာရေးနှင့် ကျန်းမာရေးအပိုင်းတွေမှာ သိသိသာသာကောင်းလာတာတွေရှိပေမဲ့ မြို့ပေါ်မှာ အဆင်ပြေပြီး ကျေးရွာတွေမှာတော့ အဆင်မပြေတာတွေ ရှိတယ်လို့ကရင်နီပြည်ကျောင်းသားသမဂ္ဂ (UKSY)အထွေထွေအတွင်းရေးမှူး မူအန်းဂျလာက ပြောပါတယ်။

၎င်းက “ဥပမာဆိုရင် ကျန်းမာရေးနဲ့ပညာရေးဆိုရင် သိသိသာသာလေးလေ နော်။ ပညာရေးဆိုလည်း ပြုပြင်ပြောင်းလဲမှုတွေစလုပ်လာတယ်ပေါ့နော်။ ဒါပေမဲ့ မြို့ပေါ်အနေအထားတော့ အဆင်ပြေပေမဲ့ ရွာမှာ အဆင်မပြေတာတွေတော့ ဒါက ကမောက်ကမတော့ အများကြီးရှိတာပေါ့။” လို့ ပြောပါတယ်။

လက်ရှိ အမျိုးသားဒီမိုကရေစီအဖွဲ့ချုပ်အနေနဲ့ ပြည်နယ်အတွင်း ပြောင်းလဲသွားတဲ့အရာကတော့ အများပြည်သူပန်းခြံထဲမှာ ဗိုလ်ချုပ်အောင်ဆန်းကြေးရုပ်တည်ထားနိုင်တာနဲ့ မြို့ပေါ်လမ်းတွေသာ ရှိတယ်လို့ ကယန်းအမျိုးသားပါတီ ဥက္ကဌ ခွန်းဘီထူးက သုံးသပ်ပြောဆိုလိုက်ပါတယ်။

၎င်းက “သိသာဒါ နှစ်ခုပဲရှိတယ်။ အဲ့ဒါက ကြေးရုပ်ရောက်လာတာရယ်၊ လမ်းတွေပေါ့နော် နည်းနည်းလေးပိုကောင်းသွားတာရယ်ကလွဲလို့ပေါ့နော်။ ကျန်တဲ့ အရေအသွေးပိုင်းမှာ၊ ကျန်တဲ့ ဗျူဟာမြောက်တဲ့ လုပ်ငန်းတွေမှာ ဗျူဟာ မြောက်တဲ့ လမ်းတံတားတွေဖောက်တဲ့ဟာတွေက ဘာတစ်ခုမှ မလုပ်နိုင်ဘူးပေါ့နော်။” လို့ ပြောပါတယ်။

ပြည်သူ့ဘဏ္ဍာငွေတွေကို အဓိကလမ်း၊ တံတားတွေမှာ အသုံးပြုသွားတယ်ဆိုပေမယ့်လည်း အရည်အသွေးထိန်းညှိတဲ့အပိုင်းတွေ၊ ၊ လူငယ်တွေ အလုပ်အကိုင်အခွင့်အလမ်းရှိစေဖို့အပိုင်းတွေ၊ တိုင်းရင်းသား အခွင့်အရေးတွေ၊ ပညာရေးတွေမှာတော့ အသုံးမပြုပေးတာမရှိဘူးလို့ ခွန်းဘီထူးက ဆက်လက် သုံးသပ်သွားပါတယ်။

၂၀၁၈-၂၀၁၉ဘဏ္ဍာရေးနှစ်အတွင်း ပြည်နယ်ဖွံ့ဖြိုးမှု ကြီးကြပ်ရေးရုံးမှ လမ်း/တံတားလုပ်ငန်း၊ ရေရရှိရေးလုပ်ငန်း၊ စွမ်းအင်လုပ်ငန်း၊ အိမ်ရာဆောက်လုပ်ခြင်းလုပ်ငန်း၊ သာသနာရေးလုပ်ငန်း တွေမှာ ပြည်နယ်ရန်ပုံငွေကျပ် (၄၀၃၆.၇၅၆)သန်းဖြင့် ၊ ပြည်ထောင်စုရန်ပုံငွေ ကျပ်(၄၅၀၁.၄၉)သန်းဖြင့် အကောင်အထည်ဖော်ဆောင်ရွက်ပေးနိုင်ခဲ့တယ်လို့ ကယားပြည်နယ်အစိုးရအဖွဲ့၏ ၂၀၁၉၊ (၁)နှစ်တာကာလအတွင်း ပြည်သူများ၏လူမှုအကျိုးစီးပွားဖွံ့ဖြိုးတိုးတက်မှုများနှင့် ပတ်သတ်ပြီး ဆောင်ရွက်နိုင်မှုတင်ပြချက်အစီရင်ခံစာမှာ ဖော်ပြထားပါတယ်။

ကျေးလက်ဒေသဖွံ့ဖြိုးတိုးတက်ရေးအနေဖြင့် ကျပ်သန်းပေါင်း(၆၃၁.၆၂၇)သန်းဖြင့် ကျေးလက်လယ်ယာကုန်ထုတ်လမ်း (၈)လမ်း၊ တံတား(၁၆)စင်းကိုလည်းကောင်း၊ ရေရှားပါးတဲ့ ကျေးရွာတွေမှာ ကျေးလက်ရေပေးဝေရေး ကျေးရွာပေါင်း(၆၄)ရွာမှာ ကျပ်သန်း(၆၈၉.၄၂၂)သန်း ဖြင့်လည်း ဆောင်ရွက်ခဲ့တယ်လို့ အထက်ပါ အစီရင်ခံစာမှာ ပါရှိပါတယ်။

Comments

comments

Next Post

Kayan Radio July 5th Week

Mon Jul 27 , 2020
အပတ်စဉ် တင်ဆက်နေကျ တိုင်းရင်းသားဘာသာ ရေဒီယို အစီအစဉ် (ကယန်း)(တနင်္လာနေ့ ည ၇ နာရီတိုင်း)ယခုတစ်ပတ်မှာတော့ ဒေသအခြေစိုက်တိုင်းရင်းသားပါတီတွေကို ဝန်းရံသွားမယ်လို့ ကရင်နီပြည်အရပ်ဘက်လူငယ်အဖွဲ့တွေဆိုလိုက်တယ်ဆိုတဲ့သတင်း၊ ပြည်သူတွေ ရသင့်တဲ့ မြေတွေကို တပ်မြေသိမ်းဆည်းခြင်းဆိုင်ရာ မူဝါဒနဲ့အညီ ဆောင်ရွက်ပေးနေတယ်လို့ ပြည်နယ်အစိုးရက ပြောလိုက်တဲ့သတင်းနဲ့ ထိုင်းရောက် ကြေးကွင်းပတ် ကယန်းအမျိုးသမီးတွေ မိမိနေရပ်ပြန်လာတဲ့ အကြောင်း ရေးသားထားတဲ့ဆောင်းပါးလေးအပြင် မိဘပွဲနေ့ဖြစ်တဲ့အတွက် ဆရာစောငွေ ရေးစပ်ထားပြီး အာပိုလို သီဆိုထားတဲ့ ‘Theinan ba mao pha’ ဆိုတဲ့ သီချင်းကောင်းလေးတစ်ပုဒ်တို့ကို ပြန်ပြီးလွှင့်ပေးသွားမှာ ဖြစ်ပါတယ်။ Comments comments

ဆက်စပ်သတင်းများ