spot_img
Sunday, February 25, 2024
spot_imgspot_imgspot_imgspot_img

ဖရူဆိုမြို့မှာ တောမီးလောင်ရာမှတဆင့် နေအိမ်တချို့မီးလောင်မှုထဲ ပါဝင်

CJ (ကန္တာရဝတီတိုင်း(မ်))

ပြီးခဲ့တဲ့ ဖေဖော်ဝါရီလ ၇ ရက်နေ့ နဲ့ ၈ ရက်နေ့မှာ ကရင်နီပြည် ဖရူဆိုမြို့ပေါ်မှာ တောမီးလောင်ရာကနေ နေအိမ်တချို့ မီးလောင်ခဲ့တယ်လို့ ဒေသခံပြောကြားချက်အရ သိရပါတယ်။

“တောမီးလောင်တာ ၂ ရက်လောက် ဆက်နေတယ်၊ ၇ ရက်နေ့မှာနဲ့ ၈ ရက်နေ့အထိလောက်မှာ လောင်နေတာ ညအချိန်အထိပေါ့၊ ၂၄ နာရီလောက်ကြာမယ် ထင်တယ်” လို့ ဒေသခံတစ်ဦးက ပြောပါတယ်။

ဖရူဆိုမြို့ပေါ်ရှိ မြန်မာ့ဆက်သွယ်ရေးရုံးအနီးအနား ရပ်ကွက်က နေအိမ်တချို့ ၁၀ လုံးထက်မနည်း မီးလောင်ရာမှာ ပါသွားတယ်လို့ ဆိုပါတယ်။

“မနောကုန်းမှာလို့ ပြောတယ်၊ သူများပုံပို့လာလို့ သိရတာ၊ တစ်ချို့ကျတော့ စစ်တပ်က သူ့ဟာသူ ရှို့တယ် ပြောတယ်၊ အဲကနေ လောင်သွားတယ် ပြောတာပဲ သေချာတော့ မသိဘူး၊ အိမ် ဘယ်နှစ်လုံး ပါသွားလည်း ဆိုတာ မသိရဘူး” လို့ ဒေသခံတစ်ဦးက ဆိုပါတယ်။

ဖရူဆိုမြို့ပေါ်မှာ စစ်ကောင်စီတပ်စွဲထားတာဖြစ်ပြီး တောမီးကို စစ်ကောင်စီတပ်သားတွေ ရှို့တယ်လို့ ဒေသခံတွေ ပြောဆိုကြပေမယ့် ကန္တာရဝတီတိုင်း(မ်)အနေနဲ့ သီးခြားအတည်ပြုနိုင်ခြင်းမရှိပါဘူး။

ဒေသခံတွေဟာ တိုက်ပွဲကြောင့် ထွက်ပြေးတိမ်းရှောင်နေရတာကြောင့် တောမီး၊ ရှို့မီးတွေကနေတဆင့် ကျန်ခဲ့တဲ့နေအိမ်တွေ ပိုမို မီးလောင်သွားမှာကို စိုးရိမ်နေကြပါတယ်။

ဖရူဆိုမြို့နယ်မှာ စစ်ကောင်စီတပ်အခြေစိုက်ဖြစ်တဲ့ ခမရ (၄၂၈)၊ ခမရ (၅၃၁) အပြင် အမှတ်(၁၄) တန်းမြှင့် စစ်လေ့ကျင့်ရေးကျောင်းလည်းရှိပါတယ်။ အာဏာသိမ်းပြီးနောက် ဒေသတွင်းတိုက်ပွဲတွေကြောင့် ဖရူဆိုဒေသခံ ၆ထောင်ဝန်းကျင်ဟာ စစ်ဘေးရှောင်နေရပြီး ယနေ့အချိန်ထိ နေရပ်ပြန်နိုင်ခြင်းမရှိကြသေးပါဘူး။

spot_img
spot_img