မူအက်စတာ
ယခုနှစ်အတွင်း ဖြစ်ပေါ်ခဲ့သည့် အယ်လ်နီညိုရာသီဥတုကြောင့် ကယား(ကရင်နီ)ပြည်နယ် ဖရူဆိုမြို့နယ်အတွင်းရှိ ကျေးရွာအများစုတို့မှာ ရေရရှိရေးစီမံကိန်းများကိုသာ အများဆုံးလိုအပ်နေကြသည်ဟု လူထုဗဟိုပြုစီမံကိန်း (CDD)ပရောဂျက် နည်း ပညာအကြံပေးအဖွဲ့ ခေါင်းဆောင် ကိုကျော်စွာက ပြောသည်။
“ရေရှားလို့ အယ်နီညိုရာသီဥတုဖြစ်ပေါ်လို့ ရေခမ်းကုန်တာ” ဟု ကိုကျော်စွာက ပြောသည်။
လူထုလိုအပ်ချက်များအတွက် ပြုလုပ်ပေးသည့် လူထုဗဟိုပြုစီမံကိန်းတွင် ဖရူဆိုမြို့နယ်အတွင်း ရေရရှိရေးမှာ အရေးကြီးဆုံး ကဏ္ဍ ဖြစ်လာခဲ့ပြီး စီမံကိန်းတွင်ပါဝင်နေသည့် လုပ်ငန်းပေါင်း ၆၄ ခုထဲမှ မဖြစ်မနေလုပ်ဆောင်သွားရမည့် အစိတ်အပိုင်း လည်း ဖြစ်လာခဲ့သည်။လုပ်ဆောင်ခဲ့ပြီးသည့် စီမံကိန်းများကိုလည်း စောင့်ကြည့်လျှက်ရှိပြီး နှစ်စဉ်နှစ်တိုင်း ပြန်လည်ပြုပြင်ထိန်းသိမ်းသည့်အပိုင်းများကို ဆောင်ရွက်ပေးလျက်ရှိသည်ဟု ဖရူဆိုမြို့နယ် လူထုဗဟိုပြုစီမံကိန်း၊ မြို့နယ်စီမံကိန်း တာဝန်ခံ ဦးစောဘရာထူးက ပြော သည်။
“ တချို့နေရာတွေကတော့ ဒီဌာနဖြစ်ဖြစ် ၊ စီမံကိန်းဖြစ်ဖြစ် ဒီတစ်နှစ် လုပ်ပြီးသွားပြီဆိုရင် နောက်တစ်နှစ် ပျက်သွားနိုင်တယ် ။ နောက်တစ်နှစ်အတွက်ဆ်ို ကျနော်တို့ ပြန်လည်ပြုပြင်တဲ့အပိုင်းတွေကိုတော့ အမြဲလုပ်နေရမှာပေါ့” ဟု ဦးစောဘရာထူးက ပြောသည်။
အခြားလုပ်ဆောင်ချက်များမှာ ကျေးရွာချင်းဆက်လမ်းများ ၊ ကျေးရွာခန်းမဆောင်၊ မူကြိုကျောင်းတို့ဖြစ်သည်ဟုသိရသည်။ ဒုတိယအများဆုံး လုပ်ဆောင်ပေးသည့် လုပ်ငန်းမှာ ကျေးရွာချင်းဆက်လမ်း ဆောက်လုပ်ပေးခြင်းဖြစ်ကြောင်း သိရသည်။
ကျေးလက်မှ ရေရရှိရေး လုပ်ဆောင်ပေးနေသည်မှာ အဆင်ပြေနေသော်လည်း လမ်းပန်းဆက်သွယ်ရေးအပိုင်းတွင် အခက်အခဲ များစွာရှိနေသေးသည်။
လူထုဗဟိုပြုစီမံကိန်း၏ ဘတ်ဂျက်သည် ဖရူဆိုမြို့နယ်အတွက် ကျပ်သိန်းပေါင်း ၂၈၀ဝ သိန်းရရှိပြီး အုပ်စုတိုင်းကို အချိုးကျပြန်လည် ခွဲဝေပေးရသည့်အတွက်ကြောင့် လမ်းပန်းဆက်သွယ်ရေးဘတ်ဂျက်အတွက် မလုံလောက်နိုင်သေး ကြောင်းသိရသည်။
ယခုနှစ်အတွင်း ဖရူဆိုမြို့နယ်တွင် ၎င်းစီမံကိန်းကို ကျပ်သိန်းပေါင်း ၂၈၀ဝ အသုံးပြုခဲ့ရာ ရေရရှိရေးတွင် ကျပ်သိန်းပေါင်း ၁၆၈ဝ ကျော် အသုံးပြုခဲ့သည်ဟု သိရသည်။ လူထုဗဟိုပြုဖွံ့ဖြိုးရေးစီမံကိန်းသည် စိုက်ပျိုးရေး၊ မွေးမြူရေး နှင့်ဆည်မြောင်ဝန်ကြီးဌာန ၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ဆောင်ရွက်သည့်စီမံကိန်းတစ်ခုဖြစ်သည်။ ၎င်းစီမံကိန်းကို မြန်မာအစိုးရက ကမ္ဘာ့ဘဏ်မှ ချေးငွေဖြင့် အကောင်အထည်ဖော်ခြင်းဖြစ်သည်။
