spot_img
Monday, November 28, 2022
spot_img

မိုးဗြဲမြို့မှာ ၃ရက်ဆက် တိုက်ပွဲပြင်းထန်နေပြီး ပျက်စီးဆုံးရှုံးမှုရှိ

spot_imgspot_imgspot_imgspot_img
လက်နက်ကြီးထိမှန်မှုကြောင့် ၁၀နှစ်အရွယ်ကလေးတစ်ဦး သေဆုံးခဲ့။ (“ဓါတ်ပုံ – CJ)

ကန္တာရဝတီတိုင်း( မ် )

မိုးဗြဲမြို့တွင်းမှာ စက်တင်ဘာလ ၈ ရက်နေ့ကစပြီး ၁၀ရက်နေ့အထိ ၃ရက်ဆက်တိုက် စစ်ကောင်စီတပ်နဲ့ ကရင်နီဒေသခံကာကွယ်ရေးပူးပေါင်းတပ်ဖွဲ့တို့အကြား တိုက်ပွဲပြင်းထန်နေတယ်လို့ သိရပါတယ်။

“အခုက ပြန်ပြီးတော့စတာပေါ့နော။ အခုက ဘယ်အချိန်လို့ ပြောရမလဲဆိုတော့ ၁၀ နာရီ ၄၅မိနစ်မှာ ပြန်စတာပေါ့နော။ အခုက ဆက်တိုက်ကြီးဖြစ်နေတာပေါ့နော။ ၁၁ အထိတော့ ဆက်တိုက်ကြီးဖြစ်နေသေးတယ်။” လို့ မိုးဗြဲ ဒေသခံအမျိုးသမီးတစ်ဦးက ပြောပါတယ်။

ပြီးခဲ့တဲ့ ရက်ကတိုက်ပွဲအတွင်း စစ်ကောင်စီဘက်က လက်နက်ကြီးတွေ၊ လေကြောင်းတွေနဲ့ ပစ်ခတ်မှုရှိခဲ့ပြီး ဒေသခံထောင်ဂဏန်းကလည်း နီးစပ်ရာ ဘုန်းတော်ကြီးကျောင်းတွေ လုံခြုံတဲ့နေရာတွေမှာ သွားရောက် ခိုလှုံနေရပါတယ်။

လက်နက်ကြီးထိမှန်မှုကြောင့် လူနေအိမ်ထိခိုက်ပျက်စီးခဲ့။ (ဓါတ်ပုံ – CJ)

တိုက်ပွဲ ပထမရက်အတွင်း လက်နက်ကြီးပစ်ခတ်မှုကြောင့် သားအဖ နှစ်ယောက် လက်နက်ကြီးစ ထိမှန်ပြီး အသက် ၁၀ နှစ်ဝန်းကျင်အရွယ် သားတစ်ဦး အသက်ဆုံးရှုံးခဲ့ရတယ်လို့ ကူညီကယ်ဆယ်ရေးလုပ်ငန်း ဆောင်ရွက်ပေးခဲ့တဲ့ Mobye PDF Rescue Team-MPRT အဖွဲ့ဝင် တစ်ဦးက ပြောပါတယ်။

“အဲ့ဒီ ကလေးနဲ့ အမျိုးသားတစ်ဦးက လက်နက်ကြီးကြောင့်ပေါ့နော။ လက်နက်ကြီးက စင်ထွက်တာပေါ့နော။ အဲ့ဒါနဲ့ အဲ့ဒီလိုဖြစ်သွားတယ်။ ကလေးက လက်မှာ ဒဏ်ရာ ရရှိသွားတယ်ပေါ့နော။ အဲ့ဒါ ဘယ်လိုပြောရမလဲ ထွက်လို့လည်း မရတဲ့အခါကျတော့ သူ့အဖေကနေပြီးတော့ သွေးတိတ်အောင် လုပ်ပေးခဲ့တယ်ပေါ့နော။ အဲ့ဒါနဲ့ အဆင်မပြေဖြစ်သွားတော့ အချိန်လည်းနည်းနည်းကြာသွားတော့ ကလေးရဲ့ အသက် ဆုံးရှုံးလိုက်ရတယ်လို့ပဲ ယူဆရတယ်ပေါ့နော။” လို့ သူက ပြောပါတယ်။

သားအဖနှစ်ယောက်ဟာ တိုက်ပွဲဖြစ်ပွားနေတဲ့ မိုးဗြဲ ပွဲကုန်း ( ၃ ) ရပ်ကွက်က ဖြစ်ပြီး တိုက်ပွဲအတွင်း ထိခိုက်ဒဏ်ရာရခဲ့တာဖြစ်ပါတယ်။ ထိခိုက်ဒဏ်ရာရပြီးနောက် စက်ရုံတစ်ခုမှာ အရပ်သား ၁၃ယောက်နဲ့အတူ ပိတ်မိနေခဲ့ပြီး တိုက်ပွဲ ဒုတိယရက်မှာပဲ ပြန်လည်ကယ်ထုတ်နိုင်ခဲ့တာ ဖြစ်ပါတယ်။

လက်ရှိအချိန်အထိ တိုက်ပွဲဖြစ်ပွားနေသေးတဲ့အတွက် ဒေသခံတွေဟာလည်း နေအိမ်ကို မပြန်နိုင်သေးပဲ ဘုန်းတော်ကြီးကျောင်းမှာ ရှိတဲ့ ရိက္ခာတွေကိုပဲ ချက်ပြုတ်စားသောက်နေရတယ်လို့ သူက ဆက်ပြောပါတယ်။

“နောက်ထပ်တော့မရှိသေးဘူး။ အရပ်သားထိခိုက်တာတော့ မရှိသေးဘူး။ ဒါပေမယ့် အရပ်သားတွေရဲ့ နေအိမ်တို့ အဆောက်အအုံတို့လည်း ထိခိုက်တာတွေ ရှိသေးတယ်ပေါ့နော။ အခုလောလောဆယ် အခြေအနေအထိပေါ့နော။ အသံကြားပြီဆိုတာနဲ့ နီးစပ်ရာ ဘုန်းကြီးကျောင်းတွေမှာ သွားရောက်ခိုလှုံတယ်။ ဘုန်းကြီးကျောင်းမှာရှိတဲ့ အစားအသောက်တွေနဲ့ပဲ ချက်ပြုတ်စားသောက်နေရတယ်ပေါ့နော။” လို့ Mobye PDF Rescue Team-MPRT အဖွဲ့ဝင် တစ်ဦးက ပြောပါတယ်။

တိုက်ပွဲတွေ ဆက်လက်ပြင်းထန်နိုင်တဲ့အတွက် ဒေသခံတွေအနေနဲ့ လုံခြုံတဲ့နေရာတွေမှာ နေပေးဖို့ မိုးဗြဲ PDF တာဝန်ရှိသူတစ်ဦးက အသိပေးထားပါတယ်။

“စစ်ရေးက ဆက်ပြီးတော့ တင်းမာနိုင်တဲ့အတွက် လုံခြုံတဲ့နေရာကို နေပေးပါ။ ပြည်သူတွေ ပြီးရင် မှန်ကန်တဲ့ သတင်းတွေကို ကျနော်တို့ အဆီအရောက်ပို့ပေးပါ။ ပြည်သူတွေပူးပေါင်းမှပဲ ကျနော်တို့ တိုက်ပွဲဟာ အမြန်ဆုံးပြီးဆုံးနိုင်မှာ ဖြစ်တဲ့အတွက်ကြောင့်မလို့ အဲ့ဒါလေး ပြောကြားချင်ပါတယ်။” လို့ သူက ပြောပါတယ်။

ဈေးဆိုင်တန်းများ ပျက်စီးခဲ့။ (ဓါတ်ပုံ – CJ)

တိုက်ပွဲအတွင်း စစ်ကောင်စီဘက်က ၃၀ ထက်မနည်း ကျဆုံးနိုင်ပြီး ထိခိုက်ဒဏ်ရာတွေလည်း အများအပြား ရရှိနိုင်တယ်လို့ ကရင်နီအမျိုးသားများ ကာကွယ်ရေးတပ် ( KNDF ) က စက်တင်ဘာလ ၉ ရက်နေ့မှာ ထုတ်ပြန်ထားပါတယ်။

စစ်ကောင်စီတပ်ဟာ ဝါရီဆူးပလိုင်ကျေးရွာကနေ မိုးဗြဲမြို့တွင်းကို အင်အား ( ၁၀၀ ) ဝန်းကျင်နဲ့ စစ်ကြောင်းထိုးလာပြီးနောက် တိုက်ပွဲစတင် ဖြစ်ပွားခဲ့တာ ဖြစ်ပါတယ်။ တိုက်ပွဲအတွင်း စစ်ကောင်စီရဲ့ လက်နက်ခဲယမ်းတွေကိုလည်း ကရင်နီဒေသခံ ကာကွယ်ရေး ပူးပေါင်းတပ်ဖွဲ့ဖက်က သိမ်းဆည်းရမိတာတွေလည်း ရှိနေပါတယ်။

spot_imgspot_imgspot_imgspot_img

More from the blog

လွိုင်ကော်မြို့ပေါ်မှာ လျှပ်စစ်မီးပြတ်တောက်ပါက မီတာခဆောင်မှသာ ပြန်လည်ပြင်ဆင်ပေးနေ

ကန္တာရဝတီတိုင်း( မ် ) ကရင်နီပြည် လွိုင်ကော်မြို့ပေါ်မှာ အိမ်သုံးလျှပ်စစ်မီးတွေ အကြောင်းအမျိုးမျိုးကြောင့်ပြတ်တောက်သွားရင် လျှပ်စစ်မီတာခ ဆောင်ပြီးမှ ပြန်ပြင်ပေးနေတာတွေ ရှိတယ်လို့ လွိုင်ကော်မြို့ ဒေသခံ တစ်ဦးက ပြောပါတယ်။ “မီးပျက်ရင် မီတာခတွေ ဆောင်ပြီးမှ ပြင်ပေးတယ်။ ကိုယ့်အိမ်က ပြတ်လို့ သွားပြင်ခိုင်းရင် မီတာခဆောင်ခိုင်းတာမျိုးပေါ့။” လို့ သူက ပြောပါတယ်။ ၂၀၂၁ခုနှစ်...

စေတနာ့ဝန်ထမ်းတွေနဲ့ အလယ်တန်းအထိ တိုးချဲ့ဖွင့်လှစ်တဲ့ ကိုယ်ထူကိုယ်ထကျောင်း

ကန္တာရဝတီတိုင်း(မ်) ကရင်နီပြည်၊ ဒီးမော့ဆိုမြို့နယ်အနောက်ဖက်ခြမ်းရှိ ရွာတစ်ရွာက ကျောင်းတစ်ကျောင်းမှာ ဒေသခံကလေးတွေနဲ့ စစ်ရှောင်ကလေးတွေ ပညာဆက်ပြီးဆည်းပူးနိုင်ဖို့ လက်ရှိပညာသင်နှစ်မှာ ကျောင်းဖွင့် ထားတာ ၅ လ လောက်ရှိပြီလို့ ဆိုပါတယ်။ KG အတန်းကနေ ရှစ်တန်းအထိ ဖွင့်လှစ်ထားတဲ့ အဲ့ဒီကျောင်းမှာ ကျောင်းသူ၊သား ၁၅၀ ကျော် ပညာသင်ယူဆည်းပူး နေကြတာပါ။ အဆိုပါကိုယ်ထူကိုယ်ထကျောင်းမှာ စေတနာ့ဝန်ထမ်း...

မိုးဗြဲမှာ ကလေး ၃ဦး တောထဲသွားရင်း မိုင်းနင်းမိခဲ့၊ တစ်ဦးစိုးရိမ်ဒဏ်ရာရ

ကန္တာရဝတီတိုင်း(မ်) မိုးဗြဲမှာ ယမန်နေ့ (နိုဝင်ဘာလ ၂၇ရက်) မွန်းလွဲ ၁၂နာရီအချိန် တောထဲသွားလည်နေတဲ့ ကလေးငယ် ၃ဦး မိုင်းနင်းမိခဲ့ပြီး တစ်ဦးမှာ စိုးရိမ်ရတဲ့ ဦးခေါင်း ဒဏ်ရာရရှိခဲ့တယ်လို့ မိုးဗြဲပြည်သူ့ကာကွယ်ရေးတပ် ပြန်ကြားရေးတာဝန်ရှိသူတစ်ဦးက ဆိုပါတယ်။ “ တစ်ယောက်ကတော့ စိုးရိမ်ရတဲ့ အနေအထားမှာရှိတယ်။ ကျန်တဲ့သူကတော့ ပေါင်တစ်ချက်ထိတယ်။ ပေါင်ရယ် ၊...

ဖရူဆိုမြို့နယ် က စစ်ဘေးရှောင်စခန်းတစ်ခုမှာ လူဦးရေရဲ့ တစ်ဝက်ခန့် ဖျားနာနေ၊

CJ (ကန္တာရဝတီတိုင်း(မ်)) ကရင်နီပြည် ၊ ဖရူဆိုမြို့နယ်တောင်ဘက် ဆိုသယ် စစ်ဘေးရှောင်စခန်းမှာ ရာသီအကူးအပြောင်းကြောင့် စစ်ရှောင်ပြည်သူတွေ တစ်ဝက်ခန့် ဖျားနာနေပြီး လူဦးရေ ၃၀၀ ခန့်က ရောဂါပြင်းထန်တယ်လို့ စေတနာဝန်ထမ်း သူနာပြု တစ်ဦးကပြောပါတယ်။ အဆိုပါ ဆိုသယ် စစ်ရှောင်စခန်းမှာ လူဦးရေ ၁၇၀၀ ရှိနေတာပါ။ " ကလေးတွေဆို...