မူးယစ်သတင်းပေးတိုင်ကြားသူနှင့် လက်ရဖမ်းဆီးပေးသူများကို ဆုကြေးပေးမည်

လင်းသန့်

မူးယစ်ကုန်သည်များနှင့် ရောင်းဝယ်ဖောက်ကားမှုများအား သတင်းပေး တိုင်ကြားသူများနှင့် လက်ရ ဖမ်းဆီးသူများအား ဆုကြေးများ ချီးမြှင့်ပေးသွားမည်ဟု ဇွန် ၂၆ ရက်နေ့က နေပြည်တော်၌ ကျင်းပသည့် မူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှု တိုက်ဖျက်ရေးနေ့ အခမ်းအနား၌ သမ္မတဦးဝင်းမြင့်က ပြောကြားသည်။

“သတင်းပေးတိုင်ကြားသူတွေကို ထိုက်ထိုက် တန်တန်ဆုကြေး ချီးမြှင့်ပေးရာမှာ သူတို့ရဲ့ လုံခြုံရေးကို အထူးဂရုပြုတဲ့အနေနဲ့ သတင်းထုတ်ပြန်ခြင်း ပြုလုပ်မှာ မဟုတ်သလို နိုင်ငံတော်ရဲ့ ချီးမြှင့်ငွေ ဖြစ်တဲ့အတွက် အခွန် ကင်းလွတ်ခွင့် အထူး အခွင့်အရေးကိုလည်း ပေးအပ်သွားမှာ ဖြစ်ပါတယ်” ဟု သမ္မတက ပြောသည်။

မူးယစ်ဆေးဝါး ထုတ်လုပ်မှု၊ ရောင်းဝယ်ဖောက်ကားမှုများနှင့် စပ်လျဉ်းပြီး သတင်းပေး တိုင်ကြားနိုင်မည့် “မူးယစ်ဆေးဝါး အထူးသတင်း တိုင်ကြားရေးဌာန”ကိုလည်း သမ္မတရုံး၌ ဖွဲ့စည်းထားပြီးဖြစ်သည်။

တိုင်ကြားသူများ၏ လုံခြုံရေး၊ သတင်းအချက်အလက် မပေါက်ကြားရေးအတွက် လုံခြုံမှု အဆင့်အတန်း သတ်မှတ်ပြီး အကာအကွယ်ပေးထားမည်ဖြစ်သည်။

“မူးယစ်ဆေးဝါး တားဆီးကာကွယ်နှိမ်နင်းရေး လုပ်ငန်းအဆင့်ဆင့်မှာ ပြည်သူတွေရဲ့ ပါဝင်မှုကို မြှင့်တင်နိုင်ဖို့ ဆုငွေ ချီးမြှင့်ရေးအစီအစဉ်တွေ၊ အကာအကွယ်ပေးရေး အစီအမံတွေ၊ သတင်း အချက်အလက် လုံခြုံရေး စနစ်တွေကို အရှိန်အဟုန်မြှင့်တင်ပြီး ဆောင်ရွက်နေပြီ ဖြစ်ပါတယ်” ဟု သမ္မတက ပြောကြားသည်။

သတင်းပေး တိုင်ကြားလာသူများ ပေးပို့သည့် သတင်းအချက်အလက်များကို အခြေခံပြီး ဗဟို၌ ဖွဲ့စည်းထားသည့် အထူးအဖွဲ့ကို စေလွှတ်သွားမည်ဖြစ်သည်။ အထူးအဖွဲ့၏ လှုပ်ရှား ဆောင်ရွက်မှုဆိုင်ရာ သတင်းအချက်အလက်များ ပေါက်ကြားခြင်း မရှိရန် အချိန်တိုတိုအတွင်း အလျင်အမြန် ဖြန့်ကျက်ပြီး လျှပ်တစ်ပြက် သွားရောက်ဖမ်းဆီးနိုင်ရန်အတွက် အမိန့်ပေး ကွပ်ကဲမှု လမ်းကြောင်းအား အတိုဆုံးဖြစ်အောင် စနစ်တကျ ပြင်ဆင် ဆောင်ရွက်ထားပြီးဖြစ်သည်ဟုလည်း ဆိုသည်။

Comments

comments

Next Post

ရှားတောမြို့နယ်ထဲက အသက်မွေးဝမ်းကျောင်းကို ခက်ထန်စွာ ရုန်းကန်နေကြရသူများ (ရုပ်သံ)

Thu Jun 28 , 2018
ဒေသခံတွေဟာ စားဝတ်နေရေးအတွက် တောင်ယာလုပ်ငန်းကိုသာ လုပ်ကိုင်ကြပြီး ဝင်ငွေရရှိဖို့ တစ်နိုင်တစ်ပိုင်နှမ်းကို စိုက်ပျိုးလုပ်ကိုင်ကြတာ ဖြစ်ပါတယ်။ ဒါပေမဲ့လည်း မိသားစုဝင်ထဲမှာ အလုပ်လုပ်နိုင်တဲ့ အမျိုးသားတွေ ရှိမှသာ နှမ်းစိုက်ပျိုးဖို့ အားသာကြတာ ဖြစ်ပါတယ်။ မိသားစုတိုင်းတော့ မစိုက်နိုင်ကြပါဘူး။ နေ့စဉ်ညတိုင်း စားသောက်ရဖို့အတွက် တောင်ယာခင်းတွေထဲမှာ ပြောင်း၊ မြေပဲ၊ စပါးနဲ့ ဟင်းသီးဟင်းရွက်တွေကို အဓိကထား စိုက်ပျိုးကြပါတယ်။ https://www.youtube.com/watch?v=X924XjDVQE4&feature=youtu.be   Comments comments