spot_imgspot_imgspot_imgspot_img
Monday, April 22, 2024
spot_imgspot_imgspot_imgspot_img

ရေယိုကျေးရွာအတွင်း သတ်ဖြတ်ခံရသူတွေမှာ အသက်၁၈နှစ်မပြည့်သေးသူ ၄ဦးပါဝင်

ကန္တာရဝတီတိုင်း(မ်)

လွိုင်ကော်မြို့နယ် ရေယိုကျေးရွာအတွင်း သတ်ဖြတ်ခံရပြီး အိမ်သာကျင်းထဲ ပစ်ထည့်ခံရတဲ့သူတွေထဲမှာ အသက်၁၈နှစ်မပြည့်သေးတဲ့ နာနတ်တောက လူငယ်၄ဦးပါဝင်တယ်လို့ ဒေသခံတွေဆီက သိရပါတယ်။

သတ်ဖြတ်ခံရသူမှာ အသက် ၁၇နှစ်အရွယ်သာရှိသေးတဲ့ မောင်ယူဂျင်း၊ မောင်ဖီဒေးလယ်နဲ့ မောင်ဒေးဗစ်ကျော်စိုး(ခ) ကျော်ကျော် ၊ အသက် ၁၆နှစ်သာရှိသေးတဲ့ မောင်ဂျွန်ပေါလ်တို့ဖြစ်ပါတယ်။

သေဆုံးသွားသူထဲ မောင်ယူဂျင်းဟာ တစ်ဦးတည်းသော သားဖြစ်ပြီး မကြာသေးခင်က သူ့ရဲ့ ဖခင်ဟာ နာမကျန်းဖြစ်ပြီး သေဆုံးသွားတယ်လို့ ယူဂျင်းရဲ့ အဒေါ်ဖြစ်သူက ပြောပြပါတယ်။
သေဆုံးသူတွေထဲ မောင်ယူဂျင်းပါသွားကြောင်းကိုလည်း အတည်ပြုတယ်လို့ သူက ဆက်ပြောပါတယ်။

“ ၂၇ရက်နေ့ ၃နာရီခွဲမှာ သူ့အမေက သတင်းရောက်လာတယ်။ ကြည့်ပါအုံး။ ငါ့သားရော ဟုတ်ရဲ့လား ကြည့်ပါအုံး။ မမက ကြည့်လိုက်တာတော့ မဟုတ်လောက်ပါဘူး။ သေချာမေးကြည့်အုံး အင်္ကျီဘာအရောင်ဝတ်ထားတာလဲ။ တွေ့တဲ့လူကို မေးကြည့်လိုက်အုံး အဲ့ဒီနေ့က အင်္ကျီဘာအရောင်ဝတ်ထားတာလဲ။ နောက်ဆုံး သူ့ပုံကို ပို့လာပေးတာ အမလေး မမတူလေးကို နောက်ဆုံးသတ်သွားတာ သိလား။ အားလုံးထဲမှာ မမတူလေးက နောက်ဆုံးမှသေရတာသိလား။ အခုပုံစံကြည့်ရတာ ဘာဖြစ်လို့လဲဆိုတော့ အားလုံးက ရုပ်ပျက်ကုန်ပြီးလေ။ သူတစ်ယောက်ဘဲ ရုပ်သိပ်မပျက်တာ။ “ မောင်ယူဂျင်းရဲ့ အဒေါ်က ပြောပါတယ်။

သေဆုံးသူတွေမှာ လွိုင်ကော်မြို့ နောင်ယားနဲ့ နာနတ်တောရပ်ကွက်က လူငယ်တွေသာ ဖြစ်ပြီး စစ်ကောင်စီက သတ်ဖြတ်ထားတာဖြစ်တယ်လို့ ကရင်နီလူ့အခွင့်အရေး ညွှန်ကြားရေးမှူး ဆရာ ဗညားက ပြောပါတယ်။

“ အိမ်မှာ ကျန်ခဲ့ပြီးတော့ အိမ်တွေကို စောင့်ရှောက်နေတဲ့ လူငယ်တွေဖြစ်တယ်။ အဲ့တာကို စစ်ကောင်စီက ၂၄ရက်နေ့ ၂၅ရက်နေ့ကတည်းက နယ်မြေရှင်းလင်းရေး ဆိုတဲ့ ခေါင်းစဉ်နဲ့ ရွာတွေကို အိမ်တွေကို ရပ်ကွက်တွေကို တစ်အိမ်တက်တစ်အိမ်ဆင်းပြီးတော့ လိုက်လံမွေနှောက်တာတွေရှိတယ်။ စစ်ဆေးမေးမြန်းပြီးတော့ ဖမ်းဆီးသွားတာတွေ ရှိတယ်ပေါ့နော။ အဲ့ဒီအထဲမှာ လူငယ်တွေ ပါသွားခြင်းဖြစ်တယ်။ အဲ့တော့ ၂၄ ၊ ၂၅ရက်နေ့မှာ ဖမ်းဆီးသွားပြီးတော့ ဒီရေယိုရွာပေါ့။ သူတို့က လမ်းကြောင်းနဲ့ ကြည့်မယ်ဆိုလို့ရှိရင် ဒီဘက်က လာတယ်ပေါ့နော။ နာနတ်တောကနေတစ်ဆင့် ရေယိုဘက်ကို ဆင်းလာပြီးတော့မှ အဲ့ဒီလူငယ်တွေကို ညှင်းပန်းနှိပ်စက်ပြီးတော့မှ နောက်ဆုံးမှာတော့ သေနတ်နဲ့ ပစ်ခတ်ပြီးတော့ သတ်ဖြတ်ခဲ့တယ် ဆိုတဲ့ လုံးဝ ၁၀၀ရာခိုင်နှုန်း အတည်ပြုနိုင်တဲ့ အချက်အလက်တွေကို ကျနော်တို့ ပြန်ရပါတယ်။“ လို့ ဆရာဗညားကပြောပါတယ်။

ကရင်နီပြည်နယ်မှာ ၂၀၂၂ခုနှစ် ဇန်နဝါရီလ အတွင်း စစ်ကောင်စီက ဖမ်းဆီးနှိပ်စက်ပြီး သတ်ဖြတ်ထားတဲ့ ဒေသခံ ၁၀ဦးအထိရှိနေတယ်လို့ ဆရာဗညားက ဆက်ပြောပါတယ်။

spot_img
spot_img