ကန္တာရဝတီတိုင်း(မ်)
ကရင်နီပြည်နယ် လွိုင်ကော်မြို့ကနေ ရှမ်းပြည်နယ် တောင်ပိုင်းဖက်မှာ နေရပ်မပြန်ရဲသေးဘဲ စစ်ဘေးရှောင်နေရတဲ့ ပြည်သူတွေ စားနပ်ရိက္ခာ အခက်အခဲကြုံတွေ့နေရတယ်လို့ စစ်ရှောင်ပြည်သူတစ်ဦးက ပြောပါတယ်။
ရှမ်းပြည်နယ် တောင်ပိုင်း နန်းမူကျေးရွာမှာ စစ်ရှောင်နေတဲ့ ပြည်သူတစ်ဦးကတော့ ရိက္ခာအခက်အခဲတွေ ကြုံတွေ့နေရတယ်လို့ ဆိုပါတယ်။
‘’ကျနော်တို့ဒုက္ခ ရောက်နေတာ နှစ်လတောင်ရှိပြီ ၊ ရွာထဲကိုလက်နက်ကြီးတွေ
ကျတော့ထွက်ပြေးခဲ့ရတယ် ။ ခုလည်း ဆီဆန်တွေကတော့ ၃ရက်စာလောက် ပဲကျန်တယ် ။ ပြန်ဖို့လည်းကြောက်နေသေးတယ်လေး ။’’ လို့ ပြောပါတယ်။
အများစုက ထေးသမ၊ ၃မိုင် ပကြဲစံပြနဲ့ ပကြဲစံပြ ကျေးရွာက ပြည်သူတွေ စစ်ရှောင်နေကြတာဖြစ်ပြီး ရွာခံတွေ ကူညီပေးတာတွေတော့ရှိတယ်လို့ ဆိုပါတယ်။
‘’ ခုနေနေတာက စစ်ရှောင်စခန်းလိုတော့ မဟုတ်ဘူး ကျနော်တို့ကို ရွာခံတွေကနေပြီးတော့ လူမနေတဲ့ အိမ်တွေ နဲ့ စာသင်ကျောင်းတွေမှာပေးနေထားတယ်။ ဟင်းသီးဟင်းရွက်တွေ
ကအစ ဝယ်စားနေရပါတယ် ။ အစပိုင်းတော့ရွာခံ တွေကဝေငှပေးနိုင်ပေမယ့် ကြာတော့ သူတို့လည်းမတတ်နိုင် တော့ဘူးလေ ။ “ လို့ သူကဆက်ပြောပါတယ်။
လွိုင်ကော်မြို့တွင်းမှာဆိုရင် ဖေဖော်ဝါရီလ ဒုတိယအပတ်ကစပြီး မြို့တွင်း ပြန်လာနေတဲ့ ပြည်သူတွေရှိနေပါတယ်။ လွိုင်ကော်မြို့ပေါ်က တိုက်ပွဲဖြစ်ပွားမှုများတဲ့ ဒေါဥခူရပ်ကွက်၊ မိုင်းလုံးရပ်ကွက်၊ မှုံပြာရပ်ကွက်တွေမှာ စစ်ကောင်စီထောက်ခံတွေယူပြီး ပြန်လာနေထိုင်နိုင်တယ်လို့ စစ်ကောင်စီက ကြေညာထားပါတယ်။
လွိုင်ကော်မြို့တွင်းမှာ ပြီးခဲ့တဲ့ ဇန်နဝါရီလ ၇ရက်နေ့က စတင်ဖြစ်ပွားခဲ့တဲ့ တိုက်ပွဲကြောင့် တခြားနီးစပ်ရာပြည်နယ်တွေကို စစ်ရှောင်နေကြရတဲ့ ပြည်သူနှစ်သောင်းရှိခဲ့ပါတယ်။
