spot_img
Friday, February 23, 2024
spot_imgspot_imgspot_imgspot_img

ရှေ့တန်းဆေးကုသမှုအပြန် မိုင်းနင်းမိပြီး DMO-PDF အမျိုးသမီးဆေးမှူးတစ်ဦး ကျဆုံး

ကန္တာရဝတီတိုင်း( မ် )

ကရင်နီပြည် ဒီးမော့ဆိုမြို့ ဆောင်ဒူရွာသစ်ကျေးရွာမှာ DMO-PDF အမျိုးသမီးဆေးမှူးတစ်ဦးဖြစ်တဲ့ မဇယ်ရာမီးနာဟာ ရှေ့တန်းဆေးကုသမှုအပြန် စစ်ကောင်စီထောင်ထားတဲ့မိုင်းကို နင်းမိပြီး ကျဆုံးခဲ့တယ်လို့ ဒီးမော့ဆို ပြည်သူ့ကာကွယ်ရေးတပ် ( DMO-PDF )က ဒီကနေ့ စက်တင်ဘာလ ၂၀ ရက်နေ့မှာ ထုတ်ပြန်ထားပါတယ်။

စက်တင်ဘာလ ၁၈ရက်နေ့ ညနေ့ ( ၄ ) နာရီအချိန်မှာ အသက် ၅၀ ဝန်းကျင်ရှိပြီဖြစ်တဲ့ ဦးလေးဖြစ်သူနဲ့ ရှေ့တန်းဆေးကုသပြီး အပြန်မှာ မိုင်းနင်းမိခဲ့တာ ဖြစ်ပါတယ်။

မိုင်းနင်းမိပြီး ကျဆုံးသွားတဲ့ မဇယ်ရာမီးနာဟာ DMO-PDF တပ်ရင်း(K)မှာ ဆေးမှူးတာဝန်ထမ်းဆောင်ခဲ့တဲ့ အသက် ၁၈နှစ်အရွယ်ဖြစ်ပါတယ်။

မဇယ်ရာမီးနာနဲ့အတူ လိုက်ပါသွားတဲ့ ဦးလေးဖြစ်သူ ‌ဦးပေါလူခွန်းကတော့ ဘယ်ဘက်လက်နဲ့ ဘယ်ဘက်ခြေတောက်မှာ ပြင်းထန်တဲ့ဒဏ်ရာရရှိခဲ့ပြီး လက်ရှိမှာ ဆေးဝါးကုသမှု ခံယူနေရတယ်လို့ သိရပါတယ်။

တာဝန်ထမ်းဆောင်ရင်း ကျဆုံးသွားခဲ့ရတဲ့ မဇယ်ရာမီးနာရဲ့ ဈာပနကို ဒီကနေ့ စက်တင်ဘာလ ၂၀ ရက်နေ့မှာ ကတ်သလစ်ခရစ်ယာန်ထုံးတမ်းအစဉ်အလာနဲ့အတူ ဂူသွင်းသင်္ဂြိုလ်ခဲ့တယ်လို့ DMO-PDF ထုတ်ပြန်ချက်မှာ ဖော်ပြထားပါတယ်။

မဇယ်ရာမီးနာ ကျဆုံးသွားခဲ့ရတဲ့အတွက် မိသားစုနဲ့အတူ ဝမ်းနည်းကြေကွဲကြောင်းနဲ့ ဖက်ဒရယ်သူရဲကောင်းအဖြစ် မှတ်တမ်းတင် ဂုဏ်ပြုသွားမှာဖြစ်တယ်လို့ DMO-PDFက ထုတ်ပြန်ထားပါတယ်။

DMO-PDF ရဲ့ ထုတ်ပြန်ချက်တွေအရ ကရင်နီပြည်မှာ ၂၀၂၂ခုနှစ်အတွင်း စစ်ကောင်စီကိုတော်လှန်တိုက်ခိုက်နေတဲ့ DMO-PDF တပ်ဖွဲ့ဝင် ၁၅ဦး ကျဆုံးခဲ့ရတယ်လို့ သိရပါတယ်။

spot_img
spot_img