ကန္တာရဝတီတိုင်း(မ်)
ရှမ်းပြည်နယ်တောင်ပိုင်း၊ ဆီဆိုင်မြို့မှာ တိုက်ပွဲဖြစ်ပွားနေဆဲဖြစ်ပြီး စစ်ကောင်စီရဲ့ လက်နက်ကြီးပစ်ခတ်မှု၊ ဒရုန်းနဲ့ဗုံးကြဲတိုက်ခိုက်မှုတွေကြောင့် ဆီဆိုင်မြို့မဈေး မီးလောင်ပျက်စီးခဲ့တယ်လို့ ပအိုဝ်းအမျိုးသားလွတ်မြောက်ရေးတပ်မတော် (PNLA) က မတ်လ ၁၂ရက်နေ့မှာ အသိပေးထုတ်ပြန်ထားပါတယ်။
ပြီးခဲ့တဲ့ မတ်လ ၁၁ ရက်နေ့ မနက်ပိုင်းမှာ ဆီဆိုင်မြို့တွင်း တိုက်ပွဲဖြစ်ပွားခြင်းမရှိဘဲ လက်နက်ကြီး အကြိမ် ၄၀ ခန့် ပစ်ခတ်တိုက်ခိုက်ခဲ့တယ်လို့ ဆိုပါတယ်။ နေ့စဉ်ရက်ဆက် ဆီဆိုင်မြို့တွင်းကို စစ်ကောင်စီက လက်နက်ကြီး၊ ဒရုန်းနဲ့ဗုံးကြဲတိုက်ခိုက်ခဲ့တာကြောင့် ဆီဆိုင်မြို့မဈေးအပြင် ဒေသခံတွေရဲ့နေအိမ် အများအပြား မီးလောင်ပျက်စီးခဲ့တယ်လို့ PNLA က ပြောပါတယ်။
ဆီဆိုင်မြို့နယ်အတွင်း နေအိမ်၊ အဆောက်အဦးထိခိုက်ပျက်စီးမှု ၉၀ရာခိုင်နှုန်းဟာ လေကြောင်း၊ လက်နက်ကြီး၊ ဒရုန်း တိုက်ခိုက်မှုတွေကြောင့် ဖြစ်တယ်လို့ သိရပါတယ်။ စစ်ကောင်စီဟာ လူ့အခွင့်အရေးချိုးဖောက်မှု၊ စစ်ရာဇဝတ်မှုကို ပေါ်ပေါ်တင်တင် ကျူးလွန်နေလျက်ရှိပြီး ထိရောက်စွာ အရေးယူနိုင်ဖို့ တိုက်တွန်းထားပါတယ်။
ဆီဆိုင်မြို့နယ်အတွင်းမှာ တိုက်ပွဲဖြစ်ပွားပြီးနောက် အရပ်သားနေအိမ် (၁၈၅)လုံး၊ ဘာသာရေးအဆောက်အဦး (၁၅)ခု၊ စာသင်ကျောင်း(၄)ကျောင်း၊ ဆေးရုံ၊ဆေးခန်း(၂)ခု နဲ့ ဈေး (၁) ခု ပျက်စီးခဲ့တယ်လို့ ပအိုဝ်းလူငယ်အစည်းအရုံး(PYO) ရဲ့ မတ်လ ၁၁ ရက်နေ့ ထုတ်ပြန်ချက်အရ သိရပါတယ်။
