spot_img
Saturday, December 10, 2022
spot_img

လက်နက်ကြီးရန်ကြောင့် မိဘမေတ္တာ ဆာလောင်နေရတော့မယ့် မောင်နှမ၂ဦး

spot_imgspot_imgspot_imgspot_img

ကန္တာရဝတီတိုင်း( မ် )

အများသူငှာ အိပ်စက် အနားယူနေတဲ့ ညအချိန်မှာ တိုက်ပွဲဖြစ်ပွားတာမရှိပဲ စစ်ကောင်စီအခြေစိုက်တပ်တွေရဲ့ ရမ်းသမ်းပစ်ခတ်နေတဲ့ လက်နက်ကြီးကြောင့် ကြောက်ရွံ့မှုအပြည့်နဲ့ အိပ်စက်ခဲ့ရတဲ့ ညတွေကတော့ ကျော်ဖြတ်ဖူးတဲ့ သူတွေပဲ အသိဆုံးဖြစ်မှာပါ။

လက်နက်ကြီး ပစ်ခတ်နေတဲ့ ညတွေ များစွာ ကျော်ဖြတ်ခဲ့ရပေမယ့် အကာအကွယ်မဲ့တဲ့ စစ်ရှောင်တဲအိမ်လေးနားလက်နက်ကြီး ကျရောက်လိမ့်မယ်လို့ တော့ ဦးအာကိုစတီးနို တို့မိသားစု တွေးထင်ထားမိလိမ့်မှာတော့ မဟုတ်ပါဘူး။

ဓာတ်ပုံ – Naylin Kayan MgLin

ဦးအာကိုစတီးနို နဲ့ ဒေါ်မာရိယာမူထွမ်း ဇနီးမောင်နှံနဲ့ ၎င်းတို့သားသမီးတွေဖြစ်ကြတဲ့ အသက် ၈ နှစ်အရွယ် မောင်တီးလုံးနဲ့ အသက် ၆လအရွယ် မအန်ဂျေးလာ တို့ မိသားစုလေးယောက် အိပ်စက်နေတဲ့ စစ်ရှောင်တဲ့အိမ်လေးရဲ့ဘေးမှာ အောက်တိုဘာလ ၂၃ရက်နေ့ ညနေ ၉နာရီကျော်အချိန် မိုးဗြဲမြို့အခြေစိုက် စစ်ကောင်စီ ခလရ (၄၂၂)တပ်မှ လက်နက်ကြီးပစ်ခတ်တာ တစ်လုံးကျရောက်ခဲ့ပါတယ်။

ဦးအာကိုစတီးနို မိသားစု စစ်ရှောင်အိမ်ကတော့ လွိုင်ကော်မြို့နယ် ကုန်းသာကျေးရွာအနီးက တောင်ယာခင်းနားမှာ တည်ရှိတာဖြစ်ပါတယ်။

အသက် ၃၅နှစ်အရွယ် ကလေးတွေဖခင်ဖြစ်တဲ့ ဦးအာကိုစတီးနိုဟာ လက်နက်ကြီးကျည် ထိမှန်မှုကြောင့် ပွဲချင်းပြီး ဆုံးပါးသွားခဲ့ရပြီး အသက် ၃၃နှစ်အရွယ် ဒေါ်မူထွမ်းကတော့ ဘယ် နားရွက်နောက်ပိုင်းမှာ စိုးရိမ်ရတဲ့ ပေါက်ပြဲဒဏ်ရာရရှိခဲ့ တယ်လို့ ဦးအာကိုစတီးနိုရဲ့ ညီဖြစ်သူ အန်တောညိုက ပြောပါတယ်။

“ အဆက်အသွယ်ရတော့ တောင်ပေါ်မှာတက်ကြည့်တော့ အစ်ကိုက အသက်မရှိတော့ဘူး။ ယောက်မ ခါကျတော့ နည်းနည်းလှုပ်နိုင်သေးတယ် “ လို့ အန်တောညိုက အဲဒီညအဖြစ်အပျက်ကို ပြောပါတယ်။

ဒဏ်ရာပြင်းထန်နေတဲ့ ယောက်မ ဖြစ်သူကို လွိုင်ကော်ပြည်သူ့ဆေးရုံပို့ဆောင်ခဲ့ပြီး အစ်ကို ဖြစ်သူကို အောက်တိုဘာလ ၂၄ရက်နေ့လည် ၁၁နာရီခွဲမှာ သဂြိုလ်ခဲ့ပြီးပြီချင်းမှာပဲ……….

“ အဲ့ဒါတွေပြီးပြီးချင်း ပစ္စည်းတွေဘာတွေ သိမ်းပြီးချင်းမှာတော့ မက်စေ့ဝင်လာတယ်။ missed call ဝင်လာတယ်ပေါ့နော။ ဘယ်သူလဲဆိုပြီးတော့ ပြန်ဆက်ကြည့်တော့ ဒီမှာ နင့်ယောက်မလည်း မရတော့ဘူး။ ဘယ်နားထားမလဲပေါ့။ အဲ့ဆို ဒီဘက်ပဲ ခေါ်လာလိုက်ပေါ့။ မရတော့ဘူးဆိုပြီးတော့ လူတွေပြန်သွားခေါ်ရတယ်။ ပစ္စည်းတွေ ပြန်သွားသယ်လာရတယ်ပေါ့နော။ “ လို့ အန်တောညိုက ဆက်ပြောပြပါတယ်။

လက်နက်ကြီးထိမှန်ခဲ့တဲ့ ဇနီးမောင်နှံနှစ်ဦးဟာ ခင်ပွန်းဖြစ်သူရုပ်အလောင်းကို သဂြိုလ်ပြီးပြီချင်းပဲ ၂၄နာရီအတွင်း ဇနီးဖြစ်သူလည်း သေဆုံးခဲ့ရတာပါ။ ဇနီးဖြစ်သူကိုတော့ အောက်တိုဘာလ ၂၅ မနက် ၉နာရီခွဲမှာ သဂြိုလ်ခဲ့တယ်လို့ အန်တောညိုက ဆိုပါတယ်။

ကျန်ရစ်တဲ့ ကလေးငယ် မောင်နှမ၂ဦးကတော့ လက်နက်ကြီး ကျရောက်ခဲ့တဲ့ ညတွင်းချင်းမှာပဲ အဖေဖြစ်သူကို ဆုံးရှုံးခဲ့ရပြီး နောက်တစ်မနက်မှာပင် အမေဖြစ်သူကို ပါပါဆုံးရှုံးခဲ့ရပါတယ်။ သူတို့နှစ်ဦးရဲ့ ဘဝမှာ မေ့လို့မရမယ့် နာကျင်စရာကောင်းလှတဲ့ အကြီးမားဆုံး ဆုံးရှုံးမှုတစ်ရပ်ကတော့ အတင်းတိုးဝှေ့ လာခဲ့ပါတော့တယ်။

မောင်တီးလုံကတော့ စစ်ရှောင်ယာယီစာသင်ကျောင်းတစ်ခုမှာ KGတန်းတက်ရောက်နေတဲ့ ကျောင်းသားတစ်ဦး ဖြစ်ပါတယ်။ အခုလို သူတို့ မောင်နှမ ၂ဦးက အရွယ်နဲ့မမျှတဲ့ ဆုံးရှုံးမှုကို လောကကြီးက စောစောစီးစီး ကြုံတွေ့စေခဲ့ပြီး တစ်ဘဝစာလုံး မိဘမေတ္တာကို ဆာလောင်ငတ်မွတ်စွာ ဖြတ်သန်းရတော့မှာက သူတို့ ၂ဦး ရဲ့ ကံစီမံရာ ဖြစ်နေပါတော့တယ်။

ကျန်ရစ်သူ တူလေးနဲ့ တူမလေးရဲ့ ရှေ့ရေးအတွက် စိတ်ပူမိတယ်လို့ ဦးလေးဖြစ်သူအန်တောညိုက ဆက်ပြောပါတယ်။

“ အရမ်းကြီးလည်း ဝမ်းနည်းမိတယ်။ စိတ်မကောင်းဖြစ်မိတယ်။ ယူကြုံးမရလည်းဖြစ်မိတယ်။ ပြီးတော့ အမေတို့ ကျနော့် မိဘတို့ ယောက်မရဲ့ အဖေအမေလည်း တကယ်ယူကြုံးမရဖြစ်နေတယ်ပေါ့နော။ သူတို့ငိုတာကို ကြည့်ပြီးတော့ ကိုယ်လည်း စိတ်မထိန်းနိုင်ဘူးဖြစ်တယ်ပေါ့နော။ တွေးလေလေ ပိုဝမ်းနည်းလေလေ ဖြစ်တယ်ပေါ့နော။ “ လို့ သူက ဝမ်းနည်းစွာ ပြောပြနေပါတယ်။

လက်ရှိမှာတော့ မောင်တီးလုံးကို မိခင်ဖြစ်သူရဲ့ အမေ (အဖွား) ဆီမှာ ကျောင်းဆက်တက်ဖို့ လိုအပ်တဲ့အတွက် ဆက်နေနေမှာဖြစ်ပြီး ၆လသား နို့စို့အရွယ် သမီးငယ် အန်ဂျေးလာ ကိုတော့ အခြေအနေအတိုင်းအတာ တစ်ခုအထိ ဝါရီကောခူစစ်ရှောင်မှာ ဆေးဖက်ဆိုင်ရာကူညီပေးနေတဲ့ အရံသားဖွား ဆရာမ တစ်ယောက်က စောင့်ရှောက်ပေးထားမှာဖြစ်တယ်လို့ သိရပါတယ်။

ဓာတ်ပုံ – Naylin Kayan MgLin

သို့ပေမယ့် မိဘဖြစ်သူ၂ဦးကလည်း ရုတ်တရက် ဆုံးပါးသွားတာဖြစ်သလို လက်ရှိအချိန်မှာ စစ်ရှောင်နေရတာဖြစ်တဲ့အတွက် သူတို့ ၂ဦးအတွက် အခက်အခဲတွေတော့ ရှိတယ်လို့ ကုန်းသာစစ်ရှောင်စခန်းမှာ ကျန်းမာရေးစောင့်ရှောက်မှုပေးနေတဲ့ ဆရာမ ရို့စ်က ပြောပါတယ်။

“ ရှေ့ရေးခါကျတော့။ စားဝတ်နေရေးလည်းရှိတယ်။ ပညာရေးလည်းရှိ။ ကျန်းမာရေးလည်းရှိတယ် ဆိုတဲ့အခါကျတော့ ကျမတို့အနေနဲ့ အရမ်းဆင်းရဲတော့ သူတို့ကို ထောက်ပံ့ပေးဖို့ အရမ်းခက်ခဲလိမ့်မယ်လို့ ကျမထင်တယ်။ ဘာဖြစ်လို့လဲဆိုရင် နှစ်ဖက်မိဘတွေလည်း အရမ်းဆင်းရဲတယ်။ အခုကလေးကလည်း လသားအရွယ်ပဲရှိသေးတယ်ဆိုတော့ သူသောက်ဖို့ နို့ကအစ ကျမတို့ လိုက်ရှာပေးရမဲ့ အနေအထားတွေ ရောက်နေတယ်ပေါ့နော။ သူ့ကို ထိန်းသိမ်းဖို့သပ်သပ် အဲ့လိုမျိုးပေါ့နော။ “ လို့ ဆရာမ ရို့စ်က ပြောပါတယ်။

ကရင်နီပြည်မှာဆိုရင် အောက်တိုဘာလ ၁ ရက်နေ့မှ ၂၆ရက်နေ့အတွင်း လက်နက်ကြီး ကြောင့် အရပ်သားပြည်သူ ထိခိုက်ဒဏ်ရာရသူ ၁၀ဦး နဲ့ သေဆုံးသူ နှစ်ဦးရှိနေတာဖြစ်ပါတယ်။ စစ်ကောင်စီကနေပြီး ရည်ရွယ်ချက်ရှိရှိ အရပ်သားပြည်သူတွေကို ပစ်မှတ်ထားတိုက်ခိုက်လာတာတွေကို ပြုလုပ်နေတာဖြစ်တယ်လို့လည်း ကာကွယ်ရေးတပ်ဖွဲ့တွေ၊ အရပ်ဖက်အဖွဲ့အစည်းတွေက ဆိုကြပါတယ်။

အခုလို ပြည်သူတွေကို ပစ်မှတ်ထား တိုက်ခိုက်တာတွေ မပြုလုပ်ဖို့ အန်တောညိုက တောင်းဆိုပါတယ်။

“ အခုလိုမျိုး အပြစ်မရှိတဲ့ ပြည်သူတွေကို ပစ်မှတ်ထားပြီးတော့ တိုက်ခိုက်တဲ့ စစ်ကောင်စီကိုလည်း အရမ်းကြီးတော့ မုန်းတီးတယ်ပေါ့နော။ နောက်ပြီးတော့ ဒါလည်း မလုပ်သင့်တဲ့ အရာတစ်ခုပေါ့နော။ ဒီအပြစ်မဲ့ပြည်သူတွေကို ပစ်မှတ်ထားပြီးတော့ ပစ်ခတ်တိုက်ခိုက်ခြင်းမပြုဖို့ အဲဒါတစ်ခုလေးတော့ ပြောချင်တယ်။ နောက်ပြီးတော့ တောင်းဆိုချင်တာပေါ့နော။ အပြစ်မဲ့ပြည်သူတွေရှိတဲ့နေရာကို မတိုက်ခိုက်ဖို့ လက်နက်ကြီးတွေမထုဖို့ ပြောချင်တယ် အဲတစ်ခုပေါ့နော။ “

အခုလို စစ်ကောင်စီကနေ လက်နက်ကြီးပစ်ခတ်မှုကြောင့် မိဘမဲ့ဖြစ်ခဲ့ရတဲ့ ကလေးငယ်တွေကို ကူညီမှုပေးနိုင်ဖို့ ဆောင်ရွက်နေတယ်လို့ ကရင်နီစစ်ဘေးရှောင်ကူညီစောင့်ရှောက်ရေးကွန်ယက် တာဝန်ရှိသူ တစ်ီဥးကပြောပါတယ်။

“ လောလောဆယ်တော့ ကျနော်တို့ဒီ လုပ်ဆောင်မှုတော့ မရှိသေးဘူး။ ဒါပေမဲ့ ကျနော်တို့ စီစဉ်ထားတာပေါ့နော။ နောက်ပိုင်းမှာ လုပ်ပေးဖို့ရှိတယ်။ လောလောဆယ်တော့ ကျနော်တို့ ဘတ်ဂျက်လိုင်းရအောင် စီစဉ်နေတုန်းပဲရှိသေးတယ်ပေါ့နော။ နောက်ပိုင်းဆိုရင်တော့ အဲဒီလိုလုပ်ဖို့ရှိတယ်။ NGO တို့ INGO တို့နဲ့ ချိတ်ပြီးတော့ ကျနော်တို့ ကူညီဖို့တော့ရှိတယ်ပေါ့နော။ အခုလက်ရှိ ကလေးသူငယ်တွေ သူ့မိဘဆုံးသွားတာတွေကို ကူညီပေးနိုင်ဖို့ ကျနော်တို့ ကြိုးစားနေပါတယ်။ ” လို့ သူက ပြောပါတယ်။

ဒီလိုရမ်းသမ်းပစ်ခတ်မှုကြောင့် သေဆုံးသွားတဲ့ ထိခိုက်ဒဏ်ရာရသွားတဲ့ အရပ်သားပြည်သူတွေကို ပြည်တွင်းကရော၊ ပြည်ပက သက်ဆိုင်တဲ့ အစိုးရအဖွဲ့အစည်းတွေ ကူညီပေးနိုင်မှုနဲ့ ကျူးလွန်သူတွေကို တိတိကျကျ အရေးယူနိုင်မှုဟာ ရှိမနေသေးပါဘူး။

ဓာတ်ပုံ – Naylin Kayan MgLin

ဒီကနေ့ ( အောက်တိုဘာလ ၂၆ ရက်နေ့ ) မနက် ၄နာရီအချိန်မှာလည်း လွိုင်ကော်မြို့ ဝါရီကောခူကျေးရွာအတွင်း နေအိမ်တစ်လုံးနား လက်နက်ကြီးကျရောက်ပြီး လက်နက်ကြီးကျည်စ ထိမှန်မှုကြောင့် မိသားစုဝင်သုံးဦးထိခိုက်ဒဏ်ရာရရှိခဲ့ပါတယ်။

ဒီလိုပစ်ခတ်မှုတွေကို စစ်ကောင်စီတပ်သားတွေဟာ ဆက်လက်ပြုလုပ်နေပြီး အရပ်သားပြည်သူတွေဟာလည်း အကူအညီကင်းမဲ့စွာ စစ်ပွဲတွေကြားမှာ အသက်ကို စတေးနေကြရဆဲဖြစ်ပါတယ်။

spot_imgspot_imgspot_imgspot_img

More from the blog

ငွေကြေးမတတ်နိုင်၍ ကင်ဆာရောဂါကို ဆေးမီးတိုနှင့် ကုသနေတဲ့ အမျိုးသမီး

CJ (ကန္တာရဝတီတိုင်း(မ်)) အသက် ၄၃ နှစ် ရှိပြီဖြစ်တဲ့ ဒေါ်မာရိဟာ ရင်သားကင်ဆာ ရောဂါကိုခံစားနေရတဲ့ ရောဂါသည် တစ်ဦးပါ။ ဖရူဆိုမြို့နယ် ထီးသဲကူး ကျေးရွာမှာနေထိုင်ပြီး အဲဒီကင်ဆာရောဂါကို ဆေးမီးတိုတွေ၊ သစ်ဥသစ်မြစ်တွေ နဲ့ သက်သာလို သက်သာငြား ကုသနေပါတယ်။ ဒေါ်မာရိဟာ သူရဲ့ ရင်သားကင်ဆာကို ၂၀၁၈ ခုနှစ်က...

စစ်တပ်အာဏာသိမ်းပြီးနောက် ဖားဆောင်းမြို့မှာ ဘာတွေ ဖြစ်နေလဲ။

မော်ဦးမြာ/ ကန္တာရဝတီတိုင်း(မ်) လွိုင်ကော်မြို့နဲ့ မိုင် ၈၀ ခန့်အကွာမှာ တည်ရှိတဲ့ ဖားဆောင်းမြို့နယ်ဟာ ကရင်နီပြည်ထဲက သေးငယ်တဲ့ မြို့လေးတစ်မြို့ဖြစ်ပြီး ဖြတ်သန်းစီးဆင်းလာတဲ့ သံလွင်မြစ်ရဲ့ ဂုဏ်ရှိန်ကြောင့် လူသိများတဲ့ မြို့ငယ်လေး ဖြစ်ပါတယ်။ ဒါ့အပြင် နှစ်ပေါင်းရာချီရှိနေပြီဖြစ်တဲ့ မော်ချီးခဲသတ္တုတွင်း တည်ရှိရာ မြို့ငယ်လေးတစ်မြို့လည်း ဖြစ်ပါတယ်။ ထိုင်း - ကရင်နီနယ်စပ်ကို...

ပျက်စီးသွားတဲ့ ပန်းပု အိမ်မက်

ကန္တာရဝတီတိုင်း(မ်) ဒီးမော့ဆိုမြို့နယ် ငူးပလော့ရပ်ကွက်မှာနေထိုင်တဲ့ အသက် ၂၈ နှစ်အရွယ် ဒေါမိနစ်က အများနဲ့မတူပဲ ပန်းပုပညာကို ထူးထူးခြားခြား စိတ်၀င်စားရူးသွပ်နေသူတစ်ယောက်ပါ။ သူက အသက် ၁၈နှစ်အရွယ်လောက်မှာ ပန်းပုစထုခဲ့ပြီး ပန်းပုပညာကို သီးသန့်သင်ကြားခဲ့တာရယ်လို့မရှိခဲ့ဘူး။ ကိုယ်တိုင်ပန်းပုထုရင်း ထုရင်းနဲ့ပဲ အလုပ်က လူကိုသင်သွားတယ်ဆိုတဲ့အတိုင်း အချိန်တွေကြာလာတာနဲ့ ဒေါမိနစ်ကလည်း ပန်းပုထုကျွမ်းကျင်လာ လက်ရာသေသပ်လှလာခဲ့တာ လို့သူကပြောပါတယ်။ "ပန်းပုထုတာကတော့ အာရုံထဲမှာတော့ရှိနေ။...

အသက် ၂၃ နှစ်အရွယ် အာဂ မိခင် မော်ရှားမြာ

မော်ဦးမြာ ( ကန္တာရဝတီတိုင်း(မ်) ) အသက် ၂၃ နှစ်အရွယ်သာ ရှိသေးတဲ့ မော်ရှားမြာဟာ လက်ရှိမှာတော့ ကရင်နီပြည်နယ်ရဲ့ စစ်ဘေးဒဏ်ကြောင့် တောတွင်းတနေရာမှာ သွားရောက်တိမ်းရှောင်နေရပြီး ၈ လသားအရွယ် သားတစ်ဦးကို စစ်ဘေးရှောင်နေစဉ် ခက်ထန်ကြမ်းတမ်းစွာ မွေးဖွားခဲ့ရပါတယ်။ ၈ လသားအရွယ် သားလေးဟာ သူမရဲ့ သားဦး ဖြစ်ပါတယ်။ “ကလေးက...