နိုဝင်ဘာလ ၂ရ ရက်နေ့မှာ မြန်မာနိုင်ငံကို ပုပ်ရဟန်းမင်းကြီး ပထမအကြိမ် ကြွရောက်လာမယ့်အပေါ် ကယားပြည်နယ်မှ ပြည်နယ်သူ၊ပြည်နယ်သားတွေက ဘယ်လိုမျှော်လင့်နေကြပါသလဲ။
ဒေါ်ထရေးဇာခင်ဦး – ဒေါငံရောက်ကျေးရွာ
ကျွန်မတို့ရဲ့ မြန်မာနိုင်ငံသူ၊ နိုင်ငံသားအားလုံး ငြိမ်းငြိမ်းချမ်းချမ်း ရှိစေဖို့ အဘဘုရားသခင် ကောင်းချီးပေးတော်မူပါလို့ တောင်းဆိုချင်ပါတယ်။
ဦးကာဆမီးရို – ဒေါငံရောက်ကျေးရွာ
ကျွန်တော်အနေနဲ့ အခုလိုမျိုး ပုပ်ရဟန်းမင်းကြီး ကြွရောက်လာမယ့် မြန်မာနိုင်ငံခရီးစဉ်ကို မမျှော်လင့်ပဲနဲ့ တစ်သက်မှတစ်ခါ ရောက်ရှိတဲ့အတွက်ကြောင့် ဝမ်းသာပီတိ ဖြစ်မိပါတယ်။ နောက်ပြီးတော့မှ ကျွန်တော်တို့ အခုလိုမျိုး မြန်မာနိုင်ငံမှာ ပဋိပက္ခဖြစ်နေတဲ့အချိန်မှာ ပုပ်ရဟန်းမင်းကြီးက ကြွရောက်တဲ့အတွက်ကြောင့် ပုပ်ရဟန်းမင်းကြီးအနေနဲ့ ကျွန်တော်တို့ မြန်မာနိုင်ငံသူ၊ နို်င်ငံသားကို ကောင်းချီးပေးဖို့ ကျွန်တော်အနေနဲ့ ဆန္ဒပြုချင်ပါတယ်။
ဒေါ်ဘီဘျားနာ – ငုပလော့ကျေးရွာ
ပုပ်ရဟန်းမင်းကြီး ဒီမှာရောက်တဲ့ခါကျတော့ ဒီလိုမျိုးပေါ့။ ဥပမာ ကျွန်မတို့ အဓိက ဘာသာရေးက ပုပ်ရဟန်းမင်းကြီးရဲ့ မင်္ဂလာရဖို့။ အဲ့ဒါနောက် အထူးသဖြင့် ကျွန်မတို့ ကယားပြည်လို့ ပြောရမှာပေါ့နော။ ငြိမ်းချမ်းရေး ဘယ်လိုနည်းနဲ့ ရနိုင်မလဲ၊ ဘိန်းကို ဘယ်လိုပူးပေါင်းပြီးတော့မှ တိုက်ဖျက်ရမလဲဆိုတာ။ အခု ကျွန်မတို့ ကယားပြည်နယ်မှာဆို အခုလူငယ်တွေ တအား အကျင့်ပျက်သွားတာ၊ ဘာသာရေးနဲ့ ပတ်သက်တာလည်း တအားဆုတ်ယုတ်သွားတယ်လို့ ပြောရမယ်။ ဘိန်းတို့ မူးယစ်ဆေးဝါးတွေကြောင့်ပေါ့နော။ သူတို့က တအားပျက်စီးသွားခါကျတော့ ကျွန်မအနေနဲ့ ပုဒ်ရဟန်းမင်းကြီးကို အဲ့ဒါပြောပြချင်ပါတယ်။
ဦးပက်ထရစ် – ရူးဖယ်ခူရပ်ကွက်
ကျွန်တော်တို့ကို ဘာသာတရားနဲ့ ရေလိုအေးပြီး ပန်းလိုမွှေးပါစေလို့ မင်္ဂလာရေ ကောင်းကောင်းပေးပါလို့။ ပြီးတော့ ကျွန်တော်တို့ မြန်မာနိုင်ငံမှာရှိတဲ့ တိုင်းရင်းသားလူမျိုးပေါင်းစုံ ဘာသာပေါင်းစုံ လူမျိုးမရွေး ဘာသာမရွေး ကျွန်တော်တို့အားလုံးကို မင်္ဂလာရေ ကောင်းကောင်းဆောင်ရွက်ပေးပါလို့ ကျွန်တော်တို့ ပုပ်ရဟန်းမင်းကြီးကို တောင်းဆိုချင်ပါတယ်။
ဒေါ်ရေဂျီးနာ – ငူပလော့ကျေးရွာ
ဘုရားသခင်ရဲ့ ကိုယ်စားလှယ်တော် ကျွန်မတို့ဆီကို ပထဆုံးရောက်ရှိလာတာကို အရမ်းဝမ်းသာတယ်။ အလှူအဒါန်းတွေ နည်းနည်းလုပ်ထားရင်လည်း ပုဒ်ရဟန်းမင်းကြီးဆီ ရောက်တယ်ဆိုရင် ကျွန်မ ကောင်းချီးရမှာပါ။ နောက်ထပ် အခုလို ကျန်းမာရေးအခက်အခဲတွေ ရင်ဆိုင်ရတဲ့အချိန်မှာ ပုဒ်ရဟန်းမင်းကြီး ကောင်းချီးပေးရင် ကျွန်မလည်း ရချင်တယ်။ သူ့ဆီကို သွားဖူးချင်တယ်။ ဒါပေမဲ့ မသွားနိုင်ဘူး။ ကိုယ်လုပ်တဲ့ အလှူအတန်းတွေကြောင့် သူရဲ့ကောင်းချီးကို ရချင်တယ်။ ဘုရားသခင်စေလွှတ်တဲ့ သူ့ရဲ့ကိုယ်စားလှယ်ကို ကျွန်မတို့ကို ကောင်းချီးပေးပါလို့ တောင်းခံချင်တယ်။
