spot_imgspot_imgspot_imgspot_img
Saturday, July 13, 2024
spot_imgspot_imgspot_imgspot_img

လွိုင်ကော်တိုက်ပွဲအတွင်း စစ်ကောင်စီ (၁၅)ဦး ထက်မနည်းသေဆုံး၊ လက်နက်ကြီးပစ်ခတ်မှုကြောင့် ဘုရားကျောင်းအပါအဝင် နေအိမ်ပျက်စီးမှုရှိ

ကန္တာရဝတီတိုင်း(မ်)

ကရင်နီပြည် လွိုင်ကော်မြို့နယ်တစ်နေရာမှာ ယမန်နေ့ (ဖေဖော်ဝါရီ ၄ရက်) ည အချိန် စစ်ကောင်စီတပ်နဲ့ ကရင်နီဒေသခံကာကွယ်ရေးပူးပေါင်းတပ်တို့ တိုက်ပွဲပြင်းထန်ခဲ့ပြီး နှစ်ဖက်ထိခိုက်ကျဆုံးမှုရှိခဲ့တယ်လို့ ကရင်နီတပ်မတော် စစ်ရေးချုပ် ဗိုလ်မှူးကြီး ဘုန်းနိုင် ကပြောပါတယ်။

“ ရန်သူဖက် ၁၅ယောက်သေတယ်လို့ ပြောတယ်။ ကျနော်တို့ဖက် KNDFက တစ်ယောက် ဒဏ်ရာရတယ်။ PDFဖက်က တစ်ယောက် ကျဆုံးပြီး တစ်ယောက် ဒဏ်ရာရတယ်။ “ လို့ ဗိုလ်မှူးကြီး ဘုန်းနိုင် ကပြောပါတယ်။

တိုက်ပွဲအတွင်း ပူးပေါင်းတပ်ဖွဲ့မှ တစ်ဦးကျဆုံးသလို စစ်ကောင်စီဖက်ကတော့ ၁၅ဦးထက်မနည်း ထိခိုက်ကျဆုံးနိုင်တယ်လို့ သူက ပြောပါတယ်။ ဖေဖော်ဝါရီလ ၄ရက်နေ့ ည ၁၀နာရီကနေ မနက် ၂နာရီအထိ တိုက်ပွဲဖြစ်ပွားခဲ့တာဖြစ်ပြီး စစ်ကောင်စီအခြေစိုက်တပ်ရင်းတွေကနေ လက်နက်ကြီးအချက်ရေပေါင်းများစွာ ပစ်ခတ်ခဲ့တယ်လို့ သိရပါတယ်။

စစ်ကောင်စီရဲ့ လက်နက်ကြီး ပစ်ခတ်မှုကြောင့် “ ဝမ်းနည်းသောမယ်တော် “ ဘုရားကျောင်း ထိခိုက်ပျက်စီးမှုရှိခဲ့သလို ပြည်သူတွေရဲ့ နေအိမ် အလုံး(၂၀)ကျော် ထိခိုက်ပျက်စီးခဲ့တယ်လို့ သိရပါတယ်။

“ ၁၀နာရီခွဲအချိန် လက်နက်ကြီး အဆမတန် တစ်ညလုံး လက်နက်ကြီးထုတာပေါ့။ အိမ်က အလုံး ၂၀ ထိခိုက်သွားတယ်။ လူထုနေအိမ်ပေါ့။ ဘုရားကျောင်းတစ်ကျောင်းထိခိုက် ပျက်စီးသွားတယ်။ အဲ့တိုက်ပွဲထဲမှာ ရဲဘော်တစ်ဦးကျသွားတယ်ပေါ့နော။ ပြည်သူလူထု အသေးစားတစ်ယောက် ဒဏ်ရာရသွားတယ်။ ပြည်သူလူထုကတော့ထိခိုက်မှုမရှိဘူးပေါ့။ “ လို့ ကရင်နီမေတ္တာရှင် ကယ်ဆယ်ရေးပြန်ကြားရေး တာဝန်ခံ တစ်ဦးက ပြောပြပါတယ်။

လက်နက်ကြီးပစ်ခတ်မှုကြောင့် ဝါရီကောခူကျေးရွာက နေအိမ် ၂၀ ကျော် ထိခိုက်ပျက်စီးခဲ့သလို စစ်ကောင်စီပစ်ခတ်ခဲ့တဲ့ လက်နက်ကြီး တွေကို ကောက်ယူရာမှာ လက်နက်ကြီး အလုံး ၇၀ ကျော်လောက် ရှိနေတယ်လို့ သူက ဆက်ပြောပြပါတယ်။ လက်နက်ကြီးအမျိုးအစားတွေက ၆၀ မမနဲ့ ၁၂၀ မမ တွေ ဖြစ်တယ်လို့ သိရပါတယ်။

ဖေဖော်ဝါရီလ ၃ရက်နေ့ ည ၆နာရီကျော်အချိန်မှာလည်း လွိုင်ကော်အရှေ့ဖက်ခြမ်းတစ်နေရာကို တိုက်ပွဲဖြစ်ပွားခြင်းမရှိပဲ စစ်ကောင်စီက လေကြောင်းနဲ့ ဗုံးကြဲတိုက်ခိုက်ခဲ့ပြီး စစ်ရှောင်ဆေးခန်းအပြင် စာသင်ဆောင်၊ စာရွက်စာတမ်း၊ ရိက္ခာဆန် မီးလောင်ပျက်စီးခဲ့ပါသေးတယ်။

ကရင်နီပြည်မှာ အာဏာသိမ်း ၂နှစ်ကာလအတွင်း တိုက်ပွဲပေါင်း ၅၀၀ ကျော် နဲ့ လေကြောင်းတိုက်ခိုက်မှု ၂၀၀ နီးပါး ဖြစ်ပွားခဲ့တယ်လို့ တိုးတက်သောကရင်နီပြည်သူ့အင်အားစု PKPFက ဖေဖော်ဝါရီ (၁)ရက်နေ့မှာ ထုတ်ပြန်ပါတယ်။

ကရင်နီပြည်တွင်း မြို့နယ်အလိုက် စစ်ကောင်စီတပ်နဲ့ ဒေသခံကာကွယ်ရေးပူးပေါင်းတပ်ဖွဲ့တို့ တိုက်ပွဲပြင်းထန်လာနိုင်တယ်လို့ တော်လှန်ရေးအင်အားစုတွေက ပြောပါတယ်။ စစ်ကောင်စီတပ်ကနေ တိုက်ပွဲဖြစ်ပွားခြင်းမရှိလည်း စစ်ရှောင်နဲ့ အရပ်သားနေထိုင်ရာနေရာတွေကို လက်နက်ကြီးသော်လည်းကောင်း၊ လေကြောင်းတိုက်ခိုက်မှုသော်လည်းကောင်း အသုံးပြုတိုက်ခိုက်နေတယ်လို့ သိရပါတယ်။

spot_img
spot_img