spot_img
Tuesday, November 29, 2022
spot_img

အခြေနေပြန်ကောင်းရင် ဒီးမော့ဆိုစျေးမှာ ကိုယ်ပိုင်ဆိုင်လေးနဲ့ စျေးပြန်ရောင်းဖို့မျော်လင့်နေတဲ့ ဒေါ်အမားလျာ

spot_imgspot_imgspot_imgspot_img

ကန္တာရဝတီတိုင်း(မ်)

အသက် ၅၇ နှစ်အရွယ် ဒေါ်အမားလျာဟာ ဒီးမော့ဆိုအနောက်ဖက်ခြမ်းမှာ စစ်ဘေးရှောင်နေတာ ၁နှစ်ကျော်ကြာနေပြီဖြစ်ပါတယ်။ သူ့ရဲ့ ကျောင်းနေအရွယ်ကလေး ၂ ဦးနဲ့အတူ စစ်ဘေးရှောင်နေရတဲ့ တစ်နှစ်အတွင်း အလုပ်အကိုင်မရှိတဲ့အတွက် ဝင်ငွေလည်းမရှိပါဘူး။

သူဟာ ယခင်က ဒီးမော့ဆိုစျေးမှာ စျေးရောင်းရင်း မိသားစုအတွက် အသက်မွေး၀မ်းကျောင်းပြုခဲ့ပေမဲ့ လက်ရှိမှာ အလုပ်လက်မဲ့ဖြစ်နေတာကြောင့် စား၀တ်နေရေးအတွက် အလှူရှင်ကိုသာမှီခိုနေရတယ်လို့ဆိုပါတယ်။

ဒေါ်အမားလျာတို့မိသားစုဟာ ပြည့်စုံတဲ့ မိသားစုမဟုတ်ခဲ့ပေမဲ့ ကရင်နီပြည်မှာ တိုက်ပွဲတွေမဖြစ်ခင်ကတော့ အများနည်းတူ စားနိုင်ဝတ်နိုင်တဲ့ အနေအထားမျိုးရှိခဲ့တာပါ။

” အခုကျတော့စစ်ဘေးရှောင်မှာနေတဲ့ခါကျတော့ ဘာမှအလုပ်အကိုင်လည်းမရှိဘူး ။ နောက်သူ့အဖေ(ခင်ပွန်း) လည်းအလုပ်မရှိ။ ကျမလည်းအလုပ်မရှိခါကျတော့ ဟိုဘာလဲ စား၀တ်နေရေးက သိပ်ကွာခြားသွားတာပေါ့။ အဆင်မပြေတော့ဘူးပေါ့။ အခုက စစ်ဘေးရှောင်နားပဲ ခိုစားရတယ်လို့ပြောရမှာပေါ့။ အလှူရှင်နားရတဲ့ဟာနဲ့ပဲစားရတယ်နောက်အဆင်မပြေဘူးပေါ့” လို့ ဒေါ်အမားလျာက ပြောပါတယ်။

ယခင်က တစ်ပတ်သုံးကြိမ်ဖွင့်တဲ့ ဒီးမော့ဆိုစျေးမှာ အထည်တွေရောင်းကူရင်း ရတဲ့ လုပ်အားခနဲ့ စားဝတ်နေရေးကို ဖြေရှင်းခဲ့တာလို့ ဆိုပါတယ်။
လက်ရှိမှာတော့ အစစအရာရာ ခက်ခဲနေတဲ့ ကာလအတွင်းမှာ စစ်ဘေးရှောင်နေကြရပြီး ၁လမှာ တစ်ခါလောက်ပဲ အသားအရိုး တွေနဲ့ ချက်ထားတဲ့ ဟင်းချိုရည်သောက်ရပါတယ်။

စစ်ရှောင်နေရင်းလည်း တနိုင်တပိုင် စိုက်ထားတဲ့အပင်တွေမအောင်လို့ အိမ်နီးနားချင်းတွေ ကျွေးတဲ့ဟင်းသီးဟင်းရွက်တွေပဲ စားရတယ်လို့ သူကဆိုပါတယ်။

သားသမီး ၇ယောက်ရှိပေမဲ့ အိမ်ထောင်တွေကျသွားပြီဖြစ်ပြီး လက်ရှိမှာ ကျောင်းနေအရွယ် နှစ်ဦး သူနဲ့အတူစစ်ရှောင်စခန်းမှာ နေထိုင်တာဖြစ်ပါတယ်။ တစ်ဦးမှာလည်း ကျောင်းလခမပေးနိုင်တဲ့အတွက် ၁၀ တန်းတက်နေတဲ့ကလေးတစ်ယောက်ကို ကျောင်းနားခိုင်းထားပြီး အငယ်ဆုံးတစ်ဦးသာ ကျောင်းတက်ခိုင်းတယ်လို့ ပြောပါတယ်။ ကလေးကျောင်းလခအတွက်လည်း ရရာအလုပ်ကို လုပ်ကိုင်ပြီး ပေးနေရတယ်လို့ ဆိုပါတယ်။

သူနဲ့အတူ စျေးရောင်းခဲ့ဖူးတဲ့သူငယ်ချင်းလည်း လက်ရှိမှာ အလုပ်လက်မဲ့ ဖြစ်သွားကြောင်းကို ဆက်သွယ်ကြည့်လိုက်မှသိရတယ်လို့သူကဆိုပါတယ်။

အခြေနေပြန်ကောင်းခဲ့ရင် ယခင်ကလို စျေးထဲမှာ အထည်တွေလိုက်ရောင်းကူတာမျိုးမဟုတ်ပဲ ကိုယ်ပိုင်ဆိုင်ခန်းနဲ့ အသား၊ ငါး၊ အသီးအရွက်တွေကို အရင်က ရောင်းဖူးတဲ့မိတ်ဆွေနဲ့ အတူ ပြန်ရောင်းချင်တယ်လို့ သူက အခုလိုပြောပါတယ်။

“အိမ်ပျက်ပျက်၊အိုးပျက်ပျက်ပေါ့ ။ ကျွန်မတို့အိမ်လောင်ပါစေ၊အိမ်ပျက်ပါစေပေါ့ ။ ငါတို့မြေပါပါမလောင်လို့ရှိရင် ရွာပြန်ရလို့ရှိရင် ပြန်ရောက်လို့ရှိရင် တဲ ဒီလိုမျိုးတဲနဲ့ပဲပြန်ဆောက်ပြီး ပြန်နေမယ်လို့စိတ်ကူးထားတယ်” လို့ ဒေါ်အမားလျာက ပြောပါတယ်။

ဒေါ်အမားလျာက မီးယပ်၊ လေးဘက်နာ၊အစာအိမ်၊နှလုံးရောဂါ၊လေနာရောဂါ ၊တက်တဲ့ရောဂါ စတဲ့ရောဂါတွေနဲ့စျေးရောင်းတာကလွှဲရင်အခြားအလုပ်တွေ မလုပ်နိုင်လို့ စား၀တ်နေရေးအတွက် အခက်ပိုကြုံနေရပါတယ်။

ဆောင်းတွင်းရောက်လာတော့ တနေ့ထက်တနေ့ အအေးဒဏ်လည်းပိုလာပြီဖြစ်တဲ့အတွက် ဒေါ်အမားလျာက ပုလင်းတစ်လုံးထဲကို ရေပူထည့်ကာ အမြဲရင်ပိုက်ပြီးသွားလာလှုပ်ရှားနေရပါတယ်။

စားဝတ်နေရေးအတွက် မှီခိုအားထားရာ ဒီးမော့ဆိုစျေးနဲ့ အနီးအနားက ဒေသခံတွေဟာ ပြီးခဲ့တဲ့ ၂၀၂၁ခုနှစ် မေလ တိုက်ပွဲစဖြစ်ချိန်ကစပြီး အိုးအိမ်စွန့်ခွာ စစ်ဘေးရှောင်ခဲ့ရတာ လက်ရှိအချိန်အထိဖြစ်ပါတယ်။

” အရင်တုန်းကဆိုသန့်သန့်ရှင်းရှင်းနဲ့သပ်သပ်ရပ်ရပ်နဲ့ရှိတဲ့ခါကျတော့ အခုပြန်တွေ့တဲ့ခါကျတော့တောလည်းထူ လမ်းလည်းဘာတွေလည်းမရှင်းတော့ဘူးပါ့။ နောက်စိတ်ထဲမှာလည်းတစ်မျိုးဖြစ်တယ်။ စိတ်နာတဲ့သဘောပေါ့” လို့ ဒေါ်အမားလျာက သူ့ရဲ့ခံစားချက်ကို ပြောပြပါတယ်။

ယခင်က ဒေသခံအများစု မှီခိုခဲ့ရတဲ့ ဒီးမော့ဆိုစျေးအနီးမှာ တိုက်ပွဲတွေဖြစ်ပွားတာတွေ၊ ဆိုင်ခန်းတွေဟာလည်း ဖျက်စီးခံရတာတွေရှိနေပေမဲ့ ဒေါ်အမားလျာကတော့ ယခင်ကလို ပြန်ဖြစ်နိုင်မဲ့တစ်နေ့ကို မျှော်လင့်နေပါတယ်။

spot_imgspot_imgspot_imgspot_img

More from the blog

စစ်ရှောင်မိသားစုတစ်ခုရဲ့ မနက်စာ

မနက် ၅နာရီခွဲအချိန်မှာ စစ်ရှောင် အိမ်ရဲ့ မီးဖိုချောင်ထဲ ဒေါ်ဂျူးလိယက်ဟာ မိသားစု မနက်စာအတွက် စတင်ချက်ပြုတ်နေတာဖြစ်ပါတယ်။ ဒေါ်ဂျူးလိယက်ကတော့ မနက်စာအတွက် တခြားသူတွေ မျှဝေထားတဲ့ ကျောက်ဖရုံသီးကို ချက်ပြီး သိမ်းထားတဲ့ မုန်ညင်းချဉ်ခြောက်ကို အထောင်းလုပ်ပြီး မနက်စာအတွက် ပြင်ဆင်နေတာဖြစ်ပါတယ်။ သူတို့ဟာ ဒီးမော့ဆိုအနောက်ဖက်ခြမ်း စစ်ရှောင်စခန်း တစ်နေရာမှာ မိသားစု ၅ယောက်နေထိုင်ကြတာဖြစ်ပါတယ်။ စစ်ရှောင်တွေဟာ...

ကျန်းမာရေးအသိနဲ့ စောင့်ရှောက်မှု အားနည်းနေတဲ့ ဖရူဆိုမြို့နယ်အနောက်ဘက်ခြမ်းက ကယောဒေသ

ကန္တာရဝတီတိုင်း( မ် ) ကရင်နီပြည် ဖရူဆိုမြို့နယ် အနောက်ဘက်ခြမ်း ဒေသဖြစ်တဲ့ ကယောမျိုးနွယ်စုတွေ အများစုနေထိုင်ရာ ဒေသ ဟာ လမ်းပန်းဆက်သွယ်ရေး ခက်ခဲတဲ့ဒေသဖြစ်ပါတယ်။ ဝေးလံခေါင်ဖျားတဲ့ ဒေသဖြစ်တဲ့အလျောက် ကျန်းမာရေး နဲ့ ပါတ်သက်တဲ့ အသိပညာ၊ ကျန်းမာရေး စောင့်ရှောက်မှုတွေ အားနည်းပါတယ်။ ပြီးခဲ့တဲ့ နိုဝင်ဘာလ တတိယအပတ်မှာ ဆေးကုသမှု...

ပျောက်ဆုံးနေတဲ့ သား ၂ယောက်အိမ်အပြန်ကို ဆက်စောင့်နေတဲ့ စစ်ရှောင် မိခင်

ကန္တာရဝတီတိုင်း(မ်) "အဒေါ်တို့ ကယန်းမှာဆိုရင် သူ့လိပ်ပြာ တွေပြန်လာတယ်။ အဲ့လိုအယူအဆရှိတယ်ပေါ့နော်။ အဲ့တာကြောင့်မို့ သူတို့အသက်ရှင်နေသေးတယ်လို့ ယုံကြည်တယ်" ၈လ ကြာပျောက်ဆုံးနေတဲ့ သား၂ယောက်ရဲ့ သတင်းအစအန ကို အခုထိ မကြားရတော့ပေမယ့် အသက်ရှင်နေဆဲပဲလို့ ယုံကြည်နေတဲ့ စစ်ရှောင်မိခင်တစ်ဦးဖြစ်တဲ့ မူကယန်း(အမည်လွဲ) က ပြောပြသွားတာဖြစ်ပါတယ်။ မူကယန်းဟာ ဒီးမော့ဆိုမြို့နယ် ဆောင်ဒူရွာသစ်မှာနေထိုင်ပေမယ့် လက်ရှိမှာတော့ ချယ်ရီကုန်း...

ကယန်းနှစ်သစ်ကူးပွဲကို ကြိုဆိုတဲ့အနေနဲ့ ကျေးရွာတချို့မှာ စစ်ရှောင်တွေနဲ့အတူ ပြိုင်ပွဲတွေ ကျင်းပပြုလုပ်

ကန္တာရဝတီတိုင်း( မ် ) နိုဝင်ဘာလ ( ၂၃ ) ရက်နေ့မှာ ကျရောက်မယ့် ၂၇၆၂ခုနှစ် ကယန်းနှစ်သစ်ကူးနေ့ အကြိုပွဲအနေနဲ့ ကျေးရွာဒေသတချို့မှာ ဆိုရင် စစ်ရှောင်တွေနဲ့အတူ ပြိုင်ပွဲတွေ ကျင်းပ ပြုလုပ်ခဲ့ကြပါတယ်။ ဖယ်ခုံမြို့ ကိုယ်ထူကိုယ်ထကျောင်းတစ်ကျောင်းမှာ ကလေးငယ်တွေအတွက် ပန်းချီ၊ ကဗျာ၊ စာစီစာကုံး၊ စာဖတ်ပြိုင်ပွဲ နဲ့...