spot_imgspot_imgspot_imgspot_img
Monday, July 22, 2024
spot_imgspot_imgspot_imgspot_img

အသက်မွေးဝမ်းကြောင်းပြုနိုင်ဖို့ရည်ရွယ်ပြီး စစ်ရှောင်ကလေးတွေကို ခဲပန်းချီဆွဲသင်တန်း ပို့ချ

ကန္တာရဝတီတိုင်း(မ်)

ကရင်နီပြည် ဒီးမော့ဆိုအနောက်ခြမ်းရှိ စစ်ဘေးရှောင်စခန်းတစ်ခုမှာ ကလေး၊ လူငယ် (၄၀)ကျော်ကို ပန်းချီဆရာမတစ်ဦးမှ အခြေခံ ခဲပန်းချီ ဆွဲနည်းသင်တန်းကို ဩဂုတ်လ ၄ ရက်နေ့မှစ ၁၅ရက်နေ့အထိ နှစ်ပတ်တိတိ ပို့ချပေးနေပါတယ်။

“ဒီနိုင်ငံရေးကာလ စစ်ရှောင်နေတဲ့အခက်ခဲကာလမှာ တော်တော်များများ ကလေးတွေ လမ်းပျောက်ကြတာပေါ့နော်။အဲ့ဒီလမ်းပျောက်ကြတဲ့အပေါ်မှာ တစ်ချို့ကလေးတွေအနေနဲ့ ဒီအခက်ခဲကြားထဲကနေပြီးတော့မှ အသက်မွေး၀မ်းကျောင်းပညာတစ်ခုလောက်ရသွားစေချင်တဲ့ရည်ရွယ်ချက်နဲ့ဒီသင်တန်းကိုလာပို့ချပေးဖြစ်တာပါ” လို့ ခဲပန်းချီသင်တန်းပို့ချပေးတဲ့ လူငယ်ဆရာမတစ်ဦးက ပြောပါတယ်။

ခဲပန်းချီဆွဲနည်းတတ်မြောက်ပြီး နောင်တစ်ချိန်မှာ အသက်မွေးဝမ်းကြောင်းပြုနိုင်ဖို့အတွက် ရည်ရွယ်တာဖြစ်ပြီး စစ်ရှောင်စခန်းက ကလေး၊ လူငယ်အပြင် ပြင်ပလူငယ်တွေလည်း ပါဝင်တက်ရောက်ကြတယ်လို့ သိရပါတယ်။

တစ်ရက်ကို အတန်းနှစ်ချိန်နဲ့ အကြီးတန်း၊ အငယ်တန်းခွဲထားပြီး မနက် ၉နာရီမှ ညနေ ၃ နာရီထိကို အကြီးတန်း၊ ညနေ ၃နာရီမှ ၅နာရီထိကို အငယ်တန်း စသဖြင့် ပိုင်းခြားထားပြီး ပို့ချပေးနေတာပါ။

အသက် (၁၃)နှစ်မှ အသက် (၂၁)နှစ်အထိ ကလေး၊ လူငယ်တွေ တက်ရောက်ကြပြီး စိတ်ပါဝင်စားစွာနဲ့ သင်ကြားနေတာကို တွေ့ရှိရတယ်လို့ သင်တန်းဆရာမက ပြောပါတယ်။ တက်ရောက်ကြတဲ့သူတွေအားလုံးက ပန်းချီလက်စွမ်းရှိတဲ့အတွက် နောင်တချိန်မှာ အသက်မွေးဝမ်းကြောင်းပြုနိုင်မယ်လို့ ဆိုပါတယ်။ ထပ်မံပြီး အခြားစစ်ရှောင်စခန်းတွေမှာလည်း ဖွင့်လှစ်သွားမယ်လို့ သင်တန်းဆရာမကပြောပါတယ်။

“ကလေးကလည်း ပန်းချီအခြေခံရှိထားတဲ့ကလေးတွေဖြစ်တယ်။ အခြေခံမရှိထားတဲ့ကလေးတွေလည်းသူတို့က စိတ်ပါ၀င်စားစွာ လိုက်သင်ကြားနေတာတွေ့ရတယ်”လို့ ဒီးမော့ဆိုမြို့နယ်ပညာရေးကော်မတီ ဘုတ်အဖွဲ့၀င်တစ်ဦးက ပြောပါတယ်။

လိုအပ်တဲ့ ခဲတံ၊ ခဲဖျက်၊ စာရွက်၊ ရောင်စုံခဲတံ တွေကိုတော့ ပညာရေးကော်မတီကနေ ထောက်ပံ့ပေးထားတယ်လို့ သိရပါတယ်။

spot_img
spot_img