ဦးမြာ
၂၀၁၈ ခုနှစ် ဧပြီလ တစ်ရက်နေ့မှစ၍ လျှပ်စစ်မီတာဘောက်များအား အတန်းအစား ၃ မျိုးဖြင့် ပြည်သူများထံ ချပေးသွားမည်ဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ဝန်ကြီး ဦးဘော့စ်ကိုက မတ်လ ၂၆ ရက်နေ့တွင် ပြောသည်။
လျှပ်စစ်ဓါတ်အား ပမာဏအလိုက်သုံးစွဲမှုအပေါ် အခြေခံ၍ လျှပ်စစ်မီတာဘောက်များကို သင့်လျှော်သည့် အတန်းအစားအလိုက် ရွေးချယ်တပ်ဆင်နိုင်မည်ဖြစ်သည်။ မီတာဘောက်များကို ၄ သောင်းခွဲ၊ ရ သောင်းခွဲနှင့် ၉ သောင်းတန် စသည်ဖြင့် အတန်းအစားအလိုက် ဈေးနှုန်း သတ်မှတ်ထားသည်။
“အရင်တုန်းက ကျတော်တို့ ၉ သောင်းနဲ့ တပြေးညီချတယ် မဟုတ်လား အခုက အဲ့လို မဟုတ်တော့ဘူး ဘယ်လိုချမလဲဆိုတော့ ၄ သောင်းခွဲတန်ရှိမယ် ရ သောင်းခွဲတန်ရှိတယ် ၉ သောင်းတန်ရှိတယ်”ဟု ဝန်ကြီး ဦးဘော့စ်ကိုက ပြောသည်။
ယခုကဲ့သို့ ချပေးရခြင်း၏ ရည်ရွယ်မှာ ကျေးလက်နေ ပြည်သူလူထုများအားလုံး တန်းတူညီမျှ မီးလင်းနိုင်ရေးအတွက်ဖြစ်ကြောင်း ၎င်းက ဆက်ပြောသည်။
ဈေးနှုန်းများအလိုက် မီးအားများကို ချိန်ဆထားသည့်အတွက် လျှှပ်စစ်အသုံးနည်းသည့် နေအိမ်များက ဈေးနှုန်းသက်သာသည့် မီတာဘောက်ကို ဝယ်ယူနိုင်သလို အသုံးများသည့် နေအိမ်များက အမြင့်ဆုံး မီတာဘောက်ကို ရွေးချယ်နိုင်မည်ဖြစ်သည်။
“တပ်ဆင်နိုင်အောင်ဆိုပြီး သုံးမျိုးသုံးစားခွဲပေးလိုက်တာ တကယ့်တကယ် ပိုက်ဆံ မတတ်နိုင်တဲ့သူတွေကတော့ ၄ သောင်းခွဲတန်ပဲ ဝယ်လိုက်ပေါ့ နောက်မှ တဖြည်းဖြည်းပြောင်းလို်က်ပေါ့။”ဟု ဝန်ကြီး ရှင်းပြသည်။
ဒီးမောဆိုမြို့နယ်အတွင်း လျှပ်စစ်မရရှိသေးသော ကျေးရွာအုပ်စု သုံးအုပ်စု ကျန်ရှိနေပြီး ၎င်းကျေးရွာအုပ်စုများသို့ လျှပ်စစ်မီးများ ပေးဝေနိုင်ရန် ခွဲရုံများ တည်ဆောက်မည်ဖြစ်ကြောင်း သိရသည်။
လက်ရှိ၌ ကယားပြည်နယ်တွင် လျှပ်စစ်ဓါတ်အားကို ၇ဝ ရာခိုင်နှုန်းကျော် ဖြန့်ဝေးပေးနိုင်ပြီး ကျန်ရှိ ဒေသများကို ၂၀၂ဝခုနှစ်တွင် ရရှိနိုင်ရန် ဆောင်ရွက်သွားမည်ဖြစ်ကြောင်းလည်း ကယားပြည်နယ် လမ်းပန်းဆက်သွယ်ရေးနှင့် လျှပ်စစ်ဝန်ကြီး ဦးခင်မောင်ဖြူက ပြောကြားထားသည်။
