မော်ချီးတွင် ကျောင်းဆရာမတစ်ဦးကို ရွေ့ပြောင်းအလုပ်သမားက အဓမ္မပြုကျင့်ရန် ကြံစည်မှုဖြစ်ပွား

လင်းသန့်

မော်ချီးကျေးရွာအုပ်စုအနာဂတ်အလင်းတန်းရွာကျေးရွာတွင် မူလတန်းကျောင်းဆရာမတစ်ဦးကို ရွေ့ပြောင်းအလုပ်သမားတစ်ဦးက အဓမ္မပြုကျင့်ရန် ကြံစည်မှုဖြစ်ပွားခဲ့ကြောင်း သိရသည်။

နိုဝင်ဘာ ၉ ရက်နေ့က အလက(ခွဲ) လယ်ပွာခိုမူလတန်ပြ ဆရာမတစ်ဦးသည် အနာဂတ်အလင်းတန်းကျေးရွာရှိ ကျောင်းဆရာမများ နေရာချထားပေးသော အိမ်တွင် တစ်ဦးတည်း အိပ်စက်ရာ ည ၉း၃ဝ အချိန်က လူတစ်ယောက် ခြင်ထောင်ထဲရောက်ရှိလာရာ ဆရာမမှ လန့်နိုးခဲ့ကြောင်း သိရသည်။

အခင်းဖြစ်ပွားခဲ့သည့် နေအိမ် (ဓါတ်ပုံ – စိုင်းလင်းလင်းဦး)

ရဲမှတ်တမ်းအရ နေအိမ်ရှိ အိပ်ရာအထိ ကျူးကျော်ဝင်ရောက်သူဖြစ်သော ဝေလင်းထွန်း (၂၉ နှစ်) (ဘ)ဦးရွှေမန်းက ဆရာမအား တက်ခွခဲ့ပြီ အော်ဟစ်ခြင်းမပြုရန် ခြိမ်းခြောက်ခဲ့ပြီး ဆရာမ၏ ပါးစပ်ကိုလည်း အတင်းပိတ်ဆို့ထားခဲ့သည်။

ထိုသို့ ပြုလုပ်စဉ် ဆရာမက အတင်းရုန်းကန်ထကာ ပတ်ဝန်းကျင်သို့ အော်ဟစ်အကူအညီတောင်းခဲ့သည်။

ဆရာမ၏ အလန့်တကြားအော်ဟစ်သံကို အနီးရှိ နေအိမ်မှ လုပ်ဖေါ်ကိုင်ဖက်ဖြစ်သူ ဆရာမ ဒေါ်ဇင်ဇာဇာထူးနှင့် ရာအိမ်မှူး ဦးသီဟအောင်တို့က အဆိုပါ အခင်းဖြစ်ပွားရာ နေအိမ်သို့ သွားရောက်ခဲ့သည်။

“ကျနော် တီဗီကြည့်နေတုန်း ဆရာမအိမ်ဖက်က အော်သံကြားလို့ အပြင်ထွက်ပြီး လှမ်းကြည့်လိုက်တော့ ပန်ကန်ဆေးတဲ့ ပြတင်းပေါက်က ဖွင့်နေတယ်။ ကျနော် ဆရာမအိမ်ကို အပြေးသွားလိုက်တယ်။ အဲ့ဒီပြတင်းပေါက်ကနေ ကျနော်ဝင်ရတယ်။ အထဲမှာရောက်တော့ အဲ့ကောင်က ဆရာမကို အတင်းချုပ်ထားတယ်။ ကျနော်လည်း အော်ပြီး ဝင်လုံးလိုက်တာ သူ့လက်ထဲကနေ ဆရာမလွှတ်သွားတယ်။ မီးကို သေချာဖွင့်ကြည့်လိုက်တော့ လက်ထဲမှာလည်း ဓါးတစ်ချောင်း ကိုင်ထားသေးတယ်။”ဟု မော်ချီးကျေးရွာအုပ်စု အနာဂတ်အလင်းတန်းကျေးရွာ ကျေးရွာအုပ်ချုပ်ရေးမှူး ဦးသီဟအောင်က ကန္တာရဝတီတိုင်း(မ်)သို့ အတည်ပြုသည်။

အခင်းဖြစ်ပွားခဲ့သည့် နေအိမ် (ဓါတ်ပုံ – စိုင်းလင်းလင်းဦး)

ကျူးလွန်သူ ဝေလင်းထွန်း ကိုင်ဆောင်လာသော အရိုး-အသွား ၆ လက်မရှိ လက်လုပ် ဓါးတစ်ချောင်းကို သက်သေခံပစ္စည်းအဖြစ် သိမ်းဆည်းခဲ့ပြီး မော်ချီးနယ်မြေရဲစခန်းမှူး ရဲအုပ်ကျော်မြင့်ခိုင်က တရားလို ပြုလုပ်ကာ (ပ) ၅/၂၀၁ရ ရာဇသတ်ပုဒ်မ ၄၅၈/၃၇၆/၅၁၁ တို့ဖြစ် အမှုဖွင့်လှစ် အရေးယူနိုင်ရန် ဆောင်ရွက်လျှက်ရှိသည်။

ကျူးလွန်သူ ဝေလင်းထွန်းသည် အနာဂတ်အလင်းတန်းကျေးရွာအနီးတွင် Great Summit Industry ကုမ္ပဏီလီမိတက်မှ တာဝန်ယူ တည်ဆောက်နေသော မော်ချီးနယ်မြေမီးသတ်စခန်း အဆောက်အဦး ဆောက်လုပ်ရန် အလုပ်သမားအဖြစ် လာရောက်လုပ်ကိုင်နေသူ ဖြစ်ကြောင်း သိရသည်။

Comments

comments

Next Post

အဓမ္မပြုကျင့်ရန် ကြံစည်မှုခံခဲ့ရသော ကျောင်းဆရာမ အခြားနေရာသို့ တာဝန်ရွှေ့ပြောင်းပေးရန် လိုလားနေ

Sun Nov 12 , 2017
လင်းသန့် မော်ချီးကျေးရွာအုပ်စုအနာဂတ်အလင်းတန်းရွာကျေးရွာတွင် မူလတန်းကျောင်းဆရာမတစ်ဦးကို ရွေ့ပြောင်းအလုပ်သမားတစ်ဦးက အဓမ္မပြုကျင့်ရန် ကြံစည်မှုဖြစ်ပွားခဲ့ပြီးနောက်ပိုင်း စိတ်ပိုင်းဆိုင်ရာ ထိခိုက်နစ်နာနေရပြီး ၎င်းနေရာသို့ တာဝန်ထမ်းဆောင်ရန် စိတ်ဆန္ဒ မရှိတော့ဘဲ အခြားနေရာသို့ ပြောင်းရွှေ့တာဝန်ပေးရန် လိုလာသည်ဟု ကာယကံရှင်က ပြောသည်။ နိုဝင်ဘာ ၉ ရက်နေ့က အလက(ခွဲ) လယ်ပွာခိုမူလတန်ပြ ဆရာမသည် အနာဂတ်အလင်းတန်းကျေးရွာရှိ ကျောင်းဆရာမများနေထိုင်သော အိမ်တွင် တစ်ဦးတည်း အိပ်စက်နေစဉ် ဝေလင်းထွန်းက နေအိမ်ရှိ အိပ်ရာအထိ ကျူးကျော်ဝင်ကာ အဓမ္မပြုကျင့်ရန် ကြံစည်ခဲ့ခြင်း ဖြစ်သည်။ “ကျမအရမ်း ထိခိုက်ခံစားရတယ်။ ဒါတောင်ဒီလောက်အထိပဲ ဖြစ်သွားလို့သာ တော်သေးတယ်။ ဒီနေရာမှာ မနေချင်တော့ဘူး။ ကျမ နွေးထွေးမှုလိုအပ်တယ်။ ဖြစ်နိုင်ရင် တောင်ငူမှာရှိတဲ့ အမေ့ဆီကိုပဲ ပြန်ပြောင်းနေချင်ပါတယ်။”ဟု ဒေါ်ရို့ထူးက ကန္တာရဝတီတိုင်း(မ်)သို့ […]