spot_img
Tuesday, November 29, 2022
spot_img

ပြန်လည် သိမ်းဆည်းရန် လျာထားသော တပ်သိမ်းမြေကို ရွာသားများကန့်ကွက်

spot_imgspot_imgspot_imgspot_img

ထျိုးမြာ——-

ဦးပိုင်ကုမ္ပဏီမှ ဆီဆိုင်ဆောက်လုပ်ရန်အတွက် အမှတ်(၉၀၃) စစ်မြေပြင်အင်ဂျင်နီယာတပ်ခွဲ(လွိုင်ကော်)မြေနေရာဟုဆိုပြီး နေအိမ်တစ်လုံးကို ဖယ်ရှားပေးရန် စာပို့တောင်းဆိုသည့်အပေါ် ဒေသခံများမှ စိုးရိမ်းနေကြသည်။

အမှတ်(၉၀၃) စစ်မြေပြင်အင်ဂျင်နီယာတပ်ခွဲ(လွိုင်ကော်)၏ တပ်ပိုင်မြေနယ်နိမိတ်ဟုဆိုကာ မြေနီကုန်းကျေးရွာရှိ ဒေါ်နန်းကွယ်၏ နေအိမ်ကို ရက်သုံးဆယ်အတွင်း ရွေ့ပေးရန် အမှတ်(၉၀၃) စစ်မြေပြင်အင်ဂျင်နီယာတပ်ရင်း လွိုင်ကော်မြို့က စက်တင်ဘာလ(၉)ရက်နေ့တွင် ဒေါ်နန်းကွယ်ထံ အကြောင်းကြားစာပို့ထားသည်ဟုသိရသည်။

ထို့အပြင် တပ်ပိုင်မြေနယ်နမိတ် (၁၅၆.၂၈) ဧကအား ပြည်ထဲရေးဝန်ကြီးဌာနမှ ၁၉၉၅ ခုနှစ်တွင် မြေသိမ်းဆည်းမိန့်ရရှိခဲ့ပြီးဖြစ်သောကြောင့် တပ်မြေအတွင်းရောက်ရှိနေသော ဒေါ်နန်းကွယ်၏နေအိမ်အား ရက်(၃၀) ရက်အတွင်းဖယ်ရှားပေးရန်နှင့် (၃၀) ရက်အတွင်း ဖယ်ရှားပေးခြင်းမရှိပါက တည်ဆဲဥပဒေများနှင့်အညီ တရားစွဲဆိုသွားမည်ဖြစ်ကြောင်း စာထဲတွင် ရေးထားသည်။

ဦးပိုင်ကုမ္မဏီမှ ဆီဆိုင်ဆောက်လုပ်ရန် ဒေါ်နန်းကွယ်၏ နေအိမ်ကို ဖယ်ရှားစေခြင်းဖြစ်ပြီး နောက်ပိုင်းတွင် ဧရိယာ (၁၅၆)ဧကအတွင်းတွင် ရှိသော မြေနေရာများကိုလည်း ဖယ်ရှားခိုင်းရန်ရှိနေကြောင်း မြေနီကုန်းကျေးရွာဥက္ကဌ ဦးဆော်ရယ်က ပြောသည်။

“ဒေါ်နန်းကွယ်ကိုပဲ ပြောရမလားဆို အင်းပထမဆုံး အဲ့နေရာအရေးကြီးလို့ ကျနော်တို့အဲ့နေရာကိုပဲ အရင်ယူလိုက်မယ်။ အဲ့ဒါတွေကလည်း တစ်ဖြေးဖြေး ကျနော်တို့ရွှေ့ခိုင်းမယ်။ နောက်ဖြစ်နိုင်ရင် ဒီနားအိမ်တွေရဲ့ အိမ်ထောင်စုနာမည်တွေကိုပေါနော အဲ့ဒါတွေကောက်ပေးတဲ့ သူကပြောတော့ ကျနော်လည်း အဲ့အထိတော့ ကျနော်လည်းမလုပ်ပေးနိုင်ဘူး၊ မကောက်ပေးနိုင်ဘူး။ တစ်ကယ်လို့ ဆရာတို့သိချင်တယ်ဆိုရင် ကိုယ့်ဟာကိုသွားကောက်လို့ရှိပိုအဆင်ပြေမယ်။ ကျနော်တို့သွားပြောလို့ရှိရင် မကောင်းဘူးလို့ ကျနော်သူ့ကိုပြောတော့ အင်းဒါဖြစ်ရင်လည်း ကျနော်တို့ဟာ ကျနော်တို့ ကောက်သွားလိုက်မယ်လို့ အဲ့လိုပဲပြောသွားလိုက်တယ်။ သူကလည်း ဘာမှဆက်မပြောတော့ဘူး ” ဟု ပြောပါသည်။

ဒေသခံများအနေနှင့် စစ်တပ်မှ သိမ်းဆည်းရန် လျာထားသော မြေဧရိယာပေါင်း (၁၅၆)ဧကအတွင်းရှိ တောင်သူများကို ဖယ်ရှားစေခြင်း မပြုလုပ်သေးသော်လည်း ဧရိယာအတွင်းရှိ တောင်သူများက စိုးရိမ်နေကြကြောင်း သိရသည်။ သို့သော် ၎င်းတို့၏ မြေယာများကို ဖယ်ရှားပေးနိုင်မည် မဟုတ်ကြောင်းနှင့် ရက် ၃ဝ အတွင်း ဖယ်ရှားပေးရန် ဒေါ်နန်းကွယ်ထံမှ စာပို့ထားခြင်းကိုလည်း ဒေသခံများက ဝိုင်းဝန်းကာကွယ်သွားမည်ဖြစ်ကြောင်း သိရသည်။

“ကျနော်တို့တောင်သူတွေက ဟိုးအရင်ကတည်းက ပိုင်ဆိုင်မှုနဲ့ နေခဲ့တဲ့ဟာကို ၂၆၁ သိမ်း၊ ၂၅ဝ သိမ်း၊ အမြောက်တပ်သိမ်း သိမ်းပေါင်းလည်းများနေပြီ ပြန်လဲမရခဲ့ဘူး။ ပိုလျံမြေလည်း ပြန်မရဘူး။ အခု လျာထားမြေမှာ ပြန်လာသိမ်းပြန်ပြီ ၂၂ နှစ်ကြာမှ အဲ့တော့ ကျနော်တို့ ရွာသူရွာသားတွေကတော့ ကာကွယ်သွားမယ် ကျနော်တို့ကတော့ လုံးဝစွန့်လွတ်ဖို့တော့ မရှိဘူး။ ပေးဖို့လည်းမရှိပါဘူးလို့ ကျနော်အဲ့လိုပဲ ပြန်ပြောလိုက်တယ်”ဟု ဒေါ်နန်းကွယ်၏သား ကိုမြတ်စိုးက ပြောသည်။

တပ်သိမ်းရန် လျာထားသော မြေဧရိယာအတွင်းရှိ မြေယာပို်င်ရှင်များသည် ၁၉၆၉- ၇ဝခုနှစ်တွင် စတင်နေထိုင်လုပ်ကိုင်လာသော တောင်သူများဖြစ်ကြသည်ဟု သိရသည်။

Related Stories