ကန္တာရဝတီတိုင်း(မ်)
ကရင်နီပြည်နယ်၊ ဒီးမော့ဆိုအနောက်ဘက်ခြမ်းရှိ ကျေးရွာတစ်ရွာက စာသင်ကျောင်း တစ်ကျောင်းမှာ အသက် ၁၀ အရွယ် လေးတန်းကျောင်းသူ၊ ကျောင်းသားတွေ ပါးချိတ်ရောင်ရမ်းခြင်း အဖြစ်များနေပြီး ကူးစက်မှု မြန်ဆန်လာတဲ့အတွက် ကျောင်းပိတ်ထားရတယ်လို့ ကျောင်းသားမိဘတွေက ပြောပါတယ်။
“လေးတန်း အဖြစ်များဆုံးပဲ၊ အစကတော့ ၅ ယောက်ပေါ့၊ နောက်တစ်ရက်တော့ ၈ ယောက်၊ ၉ ယောက် ဖြစ်လာတော့ ကျောင်းဆက်ဖွင့်ရင် အကုန်လုံးဖြစ်မှာ။ အခုတော့ မူလတန်းကျောင်း ပိတ်ထားလိုက်ရတယ်” လို့ ကျောင်းသားမိဘ တစ်ဦးက ပြောပါတယ်။
အဆိုပါ ကျောင်းသားမိဘမှာ ကလေးငယ် နှစ်ဦး ပါးချိတ်ရောင်ရမ်းမှု ဖြစ်ပွားနေတယ်လို့ ပြောပါတယ်။ ပါးချိတ်ရောင်ရမ်းခြင်းဖြစ်ပွားတဲ့ ကျောင်းသား၊ ကျောင်းသူ တချို့က အဖျားလက္ခဏာရှိနေပေမယ့် တချို့ကတော့ ဖျားနာတာမရှိပဲ သာမန် စားသောက်နိုင်တာမျိုး ရှိတယ်လို့လည်း ဆိုပါတယ်။
“သာမန်ပဲ တချို့ကလေးက စားနိုင် သောက်နိုင်တယ်၊ ကစားနိုင်တယ်၊ ပါးချိတ်ရောင်တာ တခုပဲပေါ့နော်” လို့ ကျောင်းသားမိဘ တစ်ဦးက ပြောပါတယ်။
ပါးချိတ်ရောင်ရမ်းမှု ဖြစ်ပွားနေတာဟာ Grade – 4 ကျောင်းသူ၊ ကျောင်းသားတွေ တစ်တန်းလုံးနီးပါးဖြစ်နေပြီး ကူးစက်မှု ပိုမိုပြန့်ပွားမှာကို စိုးရမ်တဲ့အတွက် စာသင်ကျောင်းကို ပိတ်လိုက်ရခြင်းဖြစ်တယ်လို့ ဆိုပါတယ်။
“ကျောင်းကို ချက်ချင်းပိတ်ပြီးတော့ ဆေးခန်းမြန်မြန် ပြခိုင်းတာပေါ့နော်။ အခုက စိုးရိမ်တာပေါ့။ စစ်ဘေးရှောင်လည်း ဖြစ်တယ်” လို့ ကျောင်းသားမိဘ တဦးက ဆက်ပြောပါတယ်။
အဆိုပါ စာသင်ကျောင်းဟာ Grade-12 အထိ ရှိနေပြီး မူလတန်းတက်ရောက်နေတဲ့ ကျောင်းသူ၊ ကျောင်းသား စုစုပေါင်း လူဦးရေ (၁၀၀) ကျော် ရှိပါတယ်။ ဒီးမော့ဆိုအနောက်ဘက်ခြမ်းမှာတော့ ယခု ရက်ပိုင်းအတွင်း ဆောင်းအအေးပိုလာတာကြောင့် ဖျားနာနေတဲ့ ကလေးတွေ ပိုမိုများပြားလာတယ်လို့ ကျောင်းသားမိဘတွေက ပြောပါတယ်။