ကန္တာရဝတီတိုင်း(မ်)
ကရင်နီပြည်ကြားကာလ အုပ်ချုပ်ရေးကောင်စီ IEC အနေနဲ့ ပြည်သူလူမှုဘဝ လုံခြုံရေးနဲ့ ပြည်သူ့ဝန်ဆောင်မှု လုပ်ငန်းတွေကို ထိထိရောက်ရောက် ဆောင်ရွက်နိုင်ဖို့အတွက် အနည်းဆုံး အထောက်အကူပြု ဌာန ၁၂ ခုကို စုဖွဲ့ဆောင်ရွက်ဖို့ စီစဉ်ထားတယ်လို့ သိရပါတယ်။
ဌာန ၁၂ ခုများထဲမှ ဦးစားပေးဌာနတွေအဖြစ် ဌာန ၇ ခုကို စတင်စုဖွဲ့ဆောင်ရွက်နေကြောင်း ဒီကနေ့
( ဩဂုတ်လ ၆ ရက်နေ့) မှာ ကရင်နီပြည်ကြားကာလ အုပ်ချုပ်ရေးကောင်စီ၏ လှုပ်ရှားဆောင်ရွက်မှုများ ပြည်သူ့ထံ တင်ပြအစီရင်ခံခြင်း ဆိုတဲ့ ခေါင်းစဉ်နဲ့ ၎င်းတို့ရဲ့ ဖေ့ဘုတ်လူမှုကွန်ယက်စာမျက်နှာမှာ အသိပေး ကြေညာထားပါတယ်။
ပညာရေးဌာန၊ ကျန်းမာရေးဌာန၊ လူသားချင်းစာနာထောက်ထားမှုနှင့် ပြန်လည်ထူထောင်ရေးဌာန၊ ပြည်ထဲရေးဌာန၊ ကာကွယ်ရေးနှင့် လုံခြုံရေးဌာန ၊ အမျိုးသမီးနှင့် ကလေးသူငယ်ရေးရာဌာန၊ စီမံကိန်းဘဏ္ဍာရေးနှင့် အခွန်ဌာန စတဲ့ ဌာန ၇ ခုကို ဦးစားပေးဆောင်ရွက်နေပြီဖြစ်ကြောင်း အသိပေးထားပါတယ်။
ဦးစားပေးဌာနများကို ဆောင်ရွက်နေစဉ် တချိန်တည်းမှာပဲ ပြည်သူတွေရဲ့ အခြေခံလိုအပ်ချက်များကို ဖြည့်ဆည်းပေးနိုင်ဖို့ စီစဉ်နေတယ်လို့လည်း ဖော်ပြထားပါတယ်။ အထူးသဖြင့် ကျောင်းနေအရွယ်ကလေးများအားလုံး ပညာသင်ကြားခွင့် ရရှိရေး၊ ပြည်သူများ အခြေခံ ကျန်းမာရေးစောင့်ရှောက်မှုကို လက်လှမ်းမှီရေး၊ စစ်ဘေးရှောင်ပြည်သူတွေနဲ့ ဒေသခံပြည်သူတွေအတွက် အရေးပေါ် စားနပ်ရိက္ခာနဲ့ လူ့အသုံးအဆောင်ပစ္စည်းများ ရရှိနိုင်ရေး၊ တရားဥပဒေစိုးမိုးရေးနဲ့ ပြည်သူ့လုံခြုံမှုအတွက် ပြည်ထဲရေးဌာနအောက်မှာ ရှိတဲ့ ကရင်နီပြည်ရဲ ( KSP) ကို စနစ်တကျ စုဖွဲ့ဆောင်ရွက်ခြင်း၊ တရားစီရင်ရေးစနစ်နဲ့ တရားရုံးများ တည်ထောင်ခြင်း၊ ကျေးရွာ/ ကျေးရွာအုပ်စု/ မြို့နယ်/ပြည်နယ် အဆင့်ဆင့်သော အထွေထွေ အုပ်ချုပ်ရေး ယန္တာရားလည်ပတ်နိုင်ရေးအတွက် ကရင်နီ အထွေထွေ အုပ်ချုပ်ရေးဌာန ( Department of General Administration – Karenni – DGAK ) ဖွဲ့စည်းဆောင်ရွက်ခြင်း စတာတွေကို ပြည်နယ်ကြားကာလ အုပ်ချုပ်ရေးကောင်စီရဲ့ ကြီးကြပ်လမ်းညွန်မှုနဲ့အတူ သက်ဆိုင်ရာ ဌာနအသီးသီးက အားသွန်ကြိုးပမ်း အကောင်အထည်ဖော်နေတယ်လို့ အသိပေး ကြေညာထားပါတယ်။
အကောင်အထည်ဖော်မှုတွေကို သက်ဆိုင်ရာ ပညာရေးအင်အာစုများ၊ ကျန်းမာရေးအင်အားစုများ၊ အရပ်ဘက်အဖွဲ့အစည်းများ၊ ပညာရှင်များ၊ အလှူရှင်များ၊ တော်လှန်ရေးအင်အားစုများ စတဲ့ အင်အားစုများအပြင် KSCC ၊ NUG တို့နဲ့လည်း ပုံမှန်ချိတ်ဆက်ညှိနှိုင်းဆောင်ရွက်နေကြောင်းကို IEC က ၎င်း တို့ရဲ့ လူမှုကွန်ယက်စာမျက်နှာမှာ အသိပေး ကြေညာထားတာ ဖြစ်ပါတယ်။
ကရင်နီပြည် ကြားကာလ အုပ်ချုပ်ရေးကောင်စီ ( Karenni State Interim Executive Council-IEC ) ကို ၂၀၂၃ ခုနှစ် ဇွန်လ ၆ ရက်နေ့မှာ ဦးတည်ချက် ငါးရပ်ကို ချမှတ်ပြီး အဖွဲ့ဝင် ခြောက်ဦးနဲ့ ဖွဲ့စည်းထားတာ ဖြစ်ပါတယ်။
