ကရင်နီဒုက္ခသည်စခန်းတွင် ကလေးငယ်များ အသက်ရှုလမ်းကြောင်းရောဂါ ကူးစက်ခံနေရ

ဖရဲ့ရယ်

ထိုင်း-မြန်မာနယ်စပ်ရှိ ကရင်နီဒုက္ခသည် အမှတ် ၁ စခန်းမှ လက်ရှိအဖြစ်များဆုံး ရောဂါသည် အသက်ရှူလမ်းကြောင်းရောဂါဖြစ်ပြီး အများအားဖြင့် ၁၀ နှစ်အောက်ကလေးငယ်များ ကူးစက်ခံနေရတာဖြစ်သည်ဟု စခန်းရှိ ကရင်နီကျန်းမာရေးဌာနမှ သိရသည်။

“ဘာဖြစ်လို့ အဲဒီရောဂါဟာ ပိုဖြစ်ပွားများသလဲဆိုတော့ ကျနော်တို့ နေထိုင်တဲ့နေရာက တအားကျဉ်းတယ် တစ်ဦးနဲ့ တစ်ဦး ကူးစက်မူက တအားလွယ်ကူတယ်” ဟု ကရင်နီကျန်းမာရေးဌာန ဒု-ညွန်ကြားရေးမှူး ဆရာဟင်နာရီက ပြောသည်။

ရာသီဥတုပြောင်းလဲမူကြောင့် အသက်ရှူလမ်းကြောင်းရောဂါသည် နှစ်စဉ် ဖြစ်ပွားနေလျက်ရှိသည်ဟု သိရသည်။ သို့သော် ယခုနှစ် အသက်ရှူလမ်းကြောင်း ကူးစက်ခံနေရသည့် လူနာသည် ယခင်နှစ်များထက်များလာသည်ဟု သိရသည်။

ကရင်နီဒုက္ခသည်စခန်းတွင်းတွင် ဆေးခန်းလာပြနေကြသည့် ကလေးငယ်များနှင့် မိခင်များ မြင်တွေ့ရစဉ် (ဓါတ်ပုံ – ဖရဲ့ရယ်)

“တစ်နေ့တစ်နေ့ ဆေးခန်းမှာ အသက်ရှူလမ်းကြောင်းရောဂါနဲ့ လာရောက်ကုသတဲ့ လူနာဟာ အနည်းဆုံး ၄၀ ယောက်ရှိတယ်” ဟု ပင်မဆေးခန်း ကြီးကြပ်ရေးမှူး ဆရာမမယ်မိုက ပြောသည်။

တစ်ကိုယ်ရေ သန့်ရှင်းရေးများ အထူးလိုအပ်ကြောင်း၊ ကလေးငယ်များ အမြဲဝတ်နေသည့် အဝတ်အစားများကိုလည်း သန့်ရှင်းစာ လျှော်ဖွတ်ပေးရန် လိုအပ်ကြောင်း၊ အာဟာရရှိသော အစားအစာများကို စားပေးရန်နှင့် မိဘများက ဂရုစိုက် စောင့်ကြည့်မူ လိုအပ်ကြောင်း ပြောသွားပါသည်။

အသက်ရှူလမ်းကြောင်းရောဂါ ကူးစက်ခံနေရသော လူနာတစ်ဦးသည် နှာစီးချောင်းဆိုး၊ ကိုယ်ပူ မြင့်တက်နိုင်ပြီး ခန္စာကိုယ်တစ်ခုလုံး နာကျင်ကိုက်ခဲမူတွေ ဖြစ်စေသည်။

“အသက်ရှူလမ်းကြောင်းရောဂါဟာ အလွန်ဆိုးရွားစွား ဖြစ်ပွားနိုင်တဲ့ရောဂါ မဟုတ်တဲ့အတွက် တအား စိုးရိမ်စရာ မလိုဘူး။ ကူးစက်မူမခံရအောင် ကိုယ့်ကိုယ်ကို ကာကွယ်နိုင်ဖို့လည်း လိုအပ်တယ်။ ကူးစက်ခံနေရတဲ့လူနာတွေလည်း ကိုယ့်ကိုယ်ကို သေချာဂရုစိုက်ဖို့ လိုအပ်တယ်” ဆရာဟင်နာရီက ဆက်ပြောသည်။

၎င်းရောဂါကူးစက်မှုများပြားလာသည့်အတွက် စခန်းတွင်းရှိ ကျောင်းများကိုပင် ပိတ်ထားရသည်ဟုသိရသည်။

စခန်းထဲတွင် လက်ရှိ အသက်ရှူလမ်းကြောင်းရောဂါ ကူးစက်ခံနေရသော လူနာဦးရေ စုစုပေါင်း ၈၀၀ ကျော် ရှိပြီး သေဆုံးသူမရှိကြောင်း သိရသည်။

Comments

comments

Next Post

ပြည်နယ်အတွင်းရှိသစ်များကို တန်ပေါင်း တစ်သောင်းတစ်ထောင်ကျော်အထိ သယ်ယူခွင့်ပြုထား

Wed Oct 16 , 2019
မော်ဦးမြာ ကယား(ကရင်နီ)ပြည်နယ်အတွင်းရှိ သံလွင်မြစ်အရှေ့ဘက်ကမ်းမှ သစ်များကို အစိုးရအနေဖြင့် တရားဝင်ထုတ်ခွင့် တန်ပေါင်းတစ်သောင်းတစ်ထောင်ကျော် သယ်ယူခွင့်ပြုထားသည်ဟု ကယားပြည်နယ် သဘာဝသံယဇာတနှင့် သစ်တော ထိန်းသိမ်းရေးဝန်ကြီးဌာနမှ ဝန်ကြီး ဦးတီရယ်က ပြောသည်။ “တရားမဝင်တဲ့ သစ်တွေကို တရားဝင်အောင် လုပ်ပေးရတာပေါ့။ ပြည်ထောင်စုကလည်း ဒီဟာနောက်ဆုံးပဲ နောက်ဘယ်အဖွဲ့အစည်းမှ မပေးတော့ဘူးဆိုတဲ့စာလည်း ရှိပါတယ်။ သစ်က အလကား ဖြစ်မှာစိုးလို့ပေါ့နော။” ဟု ဝန်ကြီး ဦးတီရယ်က ပြောသည်။ ပြည်ထောင်စုအစိုးရ၏ ခွင့်ပြုချက်ဖြင့် ကယား(ကရင်နီ) ပြည်နယ်အတွင်းရှိ သစ်များကို နောက်ဆုံးကြိမ်အဖြစ် ခွင့်ပြုခြင်းဖြစ်သည်ဟုဆိုပါသည်။ သံလွင်အရှေ့ဘက်ခြမ်းမှ သစ်များသည် ကရင်နီအမျိုးသားတိုးတက်ရေးပါတီ(KNPP)သစ်များဖြစ်ပြီး သစ်တောဦးစီးဌာနမှ သိမ်းဆည်းလိုက်ကာ မြန်မာ့သစ်လုပ်ငန်းသို့လွှဲပြောင်းလိုက်ခြင်းဖြစ်ကြောင်း၊ ထိုမှတဆင့် ကုမ္မဏီများကို လေလံပြန်ပစ်လိုက်ရမှ လေလံအောင်သည့် ကုမ္မဏီများက သစ်များကို […]