ခနောက်စိမ်းနှင့် ခဲသတ္တုလုပ်ကွက်များ အသေးစားတူးဖေါ်လုပ်ကိုင်ရန် လျှောက်ထားနိုင်ပြီ  

မော်ချီးသတ္တုတွင်း၌ ခဲလုပ်ကွက်များလုပ်ကိုင်နေသူများ(ဓါတ်ပုံ-လင်းသန့်)

နော်ဒွေးအယ်ခူ

ကယားပြည်နယ် မြို့နယ်လေးခုရှိ မြေဧရိယာ ၄ သောင်းကျော်ပေါ်တွင် ခနောက်စိမ်းနှင့် ခဲသတ္တုများတူးဖော်ထုတ်လုပ်ရန် အသေးစားနှင့် လက်လုပ်လတ်စားလုပ်ကွက်များကို ဦးရာလူစနစ်ဖြင့် လျှောက်ထားနိုင်ကြောင်း ကယာပြည်နယ်သတ္တုတွင်းဦးစီးဌာနမှ သိရသည်။

“လုပ်ကွက်ကိုလျှောက်ထားနိုင်ပြီ။ ဒါပေမယ့် လျှောက်ထားတာကိုတော့ မြေစာရင်းပုံစံနဲ ့ပြောရရင် မြေယာပိုင်ဆိုင်မှု ပုံစံ-၁၀၅က လက်ထဲမှာရှိရမယ်။ကိုယ့်ရဲ ့လယ်၊ကိုင်းထဲမှာ ကိုယ်ပိုင်တဲ့တောတောင်ထဲမှာဆိုရင်တော့ မြေပိုင်ဆိုင်မှုက ကိစ္စမရှိဘူး။ဒါပေမယ့် သူများရဲ ့လယ် မြေ ခြံထဲမှာဆိုရင်တော့ ကိုယ်က မြေပိုင်ဆိုင်မှုကိုအရင်စလုပ်ရမယ်။”ဟု  ကယားပြည်နယ်သတ္တုတွင်းဦးစီးဌာန ပြည်နယ်တာဝန်ခံ ဦးမောင်အေးက ပြောသည်။

ခနောက်စိမ်း၊ ခဲသတ္တု အသေးစားနှင့် လက်လုပ်လက်စားတူးဖော်ခြင်းလုပ်ကွက်များကို ဘောလခဲခရိုင်အတွင်းရှိ မယ်စဲ့မြို့နယ် ဟွေပုံလောင်းဒေသရှိ မြေဧရိယာ တစ်သောင်းလေးထောင်ကျော်နှင့် ရွာသစ်မြို့ ပိလုတောင်ဒေသရှိ မြေဧရိယာ ၉ ထောင်ကျော်တွင် ချထားမည်ဖြစ်သည်။

လွိုင်ကော်ခရိုင်အတွင်း၌ ဖရူဆိုမြို့နယ် တောင်ဂူဒေသရှိ မြေဧရိယာရှစ်ထောင်ကျော်နှင့် ဒီးမော့ဆိုမြို့နယ် ဒေါဝယ်မောဒေသရှိ မြေဧက ၁ သာင်းကျော်တွင် လုပ်ကွက်များချထားပေးမည်ဖြစ်သည်။

ကယားပြည်နယ်အစိုးရက အသေးစားလုပ်ကွက်တစ်ခုလျှင် မြေ ၁ဝ ဧကနှုန်းဖြင့်လုပ်ကိုင်ခွင့် သက်တမ်းငါးနှစ်မှ ၁ဝ နှစ်အထိ ခွင့်ပြုမည်ဖြစ်ပြီး လက်လုပ် လက်စားလုပ်ကွက်တစ်ခုလျှင် အိမ်ထောင်စုတစ်စုအတွက် မြေ ၃ ဧကနှုန်းဖြင့် လုပ်ကိုင်ခွင့်သက်တမ်း ၁ နှစ်ခွင့်ပြုမည်ဟု  ဆိုသည်။

အသေးစားသတ္တုထုတ်လုပ်ခြင်းကို ကုမ္ပဏီအမည်ဖြင့် လျှောက်ထားရန်လိုအပ်ပြီး လက် လုပ်လက်စားလုပ်ကွက်များကို အိမ်ထောင်စုစာရင်းတစ်ခုလျှင် တစ်ကွက်နှုန်းဖြင့် သတ်မှတ်ထားသည့် လုပ်ထုံး၊ လုပ်နည်းများနှင့် အညီလျှောက်ထားနိုင်ကြောင်း ပြည်နယ်သတ္တုတွင်းဦးစီးဌာနမှ သိရသည်။

“လက်လုပ်လက်စားဆိုရင် ဒေသခံတွေပေါ့ ပုံစံ ၁ဝက ဒီမှာပေါက်ရမယ်။မော်ချီးမှာ နေတဲ့သူက မော်ချီးမှာလျှောက်လို ့ရတယ် ဘောလခဲနေရင် ဘောလခဲမှာ လျှောက်လို ့ရမယ်။ အဓိကတော့ ဒေသခံတွေကိုအလုပ်အကိုင်အခွင့်အလမ်းတွေ ပွင့်စေချင်တယ်။”ဟု ဦးမောင်အေးက ပြောသည်။”

အသေးစားသတ္တုထုတ်လုပ်ရာတွင် ကုမ္ပဏီအမည်ဖြင့် လျှောက်ထားရန်လိုအပ်သော်လည်း ဒေသခံတွေအနေဖြင့် ရင်းနှီးမြှုပ်နှံမှု လုပ်နိုင်ပါက ဦးစားပေးမည်ဖြစ်ကြောင်းနှင့် မလုပ်နိုင်ပါက ကုမ္ပဏီမှရင်းနှီးမြှုပ်သူများကို ဦးစားပေးမည်ဖြစ်ကြောင်း ၎င်းကဆိုသည်။

လက်ရှိတွင် ကယားပြည် နယ်အတွင်း ခနောက်စိမ်းနှင့် ခဲသတ္တုတူးဖော်ခြင်း အကြီးစားနှင့် အလတ်စားထုတ်လုပ်ခြင်း လုပ်ငန်းများတွင် ပြည်ပကုမ္ပဏီများ ရင်းနှီးမြှုပ်နှံမှုမရှိသေးသော်လည်း အကြီးစားလုပ်ကွက် ၁ ကွက်အပါအဝင် အသေးစားလုပ်ကွက် စုစုပေါင်း ၂၃ ကွက်ကို ပြည်တွင်းနှင့် ဒေသခံကုမ္ပဏီများအား လုပ်ကိုင်ခွင့်ပြုထားသည်။

Comments

comments

Next Post

နိုင်/ကျဉ်းကူညီစောင့်ရှောက်ရေးအသင်းမှ လူ့အခွင့်အရေးသင်တန်း မြို့နယ်အလိုက် ပို့ချပေးမည်

Fri Jun 29 , 2018
ခူးစိုးရယ်ဦး လူ့အခွင့်အရေး၊ အသွင်ကူးပြောင်းရေးဆိုင်ရာ တရားမျှတမှုနှင့် လူ့အခွင့်ရေးချိုးဖောက်မှု မှတ်တမ်းတင်ခြင်း အစရှိသော သင်တန်းများကို ကယားပြည်နယ်ရှိ မြို့နယ် ရ မြို့ကို သွားရောက်ပြီး အေအေပီပီ (AAPP – Assistance Association for Polities Prisoners) မှ နိုင်ငံရေးအကျဉ်းသား ကူညီစောင့်ရှောက်ရေးအသင်းမှ သင်တန်းပို့ချပေးသွားမည်ဖြစ်ကြောင်း သိရသည်။ အေအေပီပီက မြန်မာနိုင်ငံတဝန်း၌ ၎င်းသင်တန်းများကို လိုက်လံပို့ချခဲ့ပြီး ကယားပြည်နယ်ကို ၂၀၁၈ ခုနှစ် ဇွန်လ တတိယအပတ်က လွိုင်ကော်မြို့တွင် သင်တန်းပေးခဲ့သည်။ နိုင်ငံရေးအကျဉ်းသား မရှိသော၊ နိုင်ငံသားနှင့် နိုင်ငံရေးအရေးများကို ကာကွယ်၊ ထိန်းသိမ်း၊ ဖြည့်ဆည်းပေးသော လွတ်လပ်သည့် ဒီမိုကရက်တစ် လူ့အဖွဲ့အစည်း ဖြစ်လာစေရေးနှင့် အမျိုးသားပြန်လည်သင့်မြတ်ရေးကို ကူညီပေးရန် […]