spot_img
Sunday, February 25, 2024
spot_imgspot_imgspot_imgspot_img

စစ်ရှောင်စခန်းတစ်နေရာမှာ သက်ကြီးပိုင်းတွေကို နာတာရှည်ရောဂါများ စစ်ဆေးပေး

ကန္တာရဝတီတိုင်း(မ်)

ဒီးမော့ဆိုမြို့နယ်အရှေ့ခြမ်း စစ်ရှောင်စခန်းတစ်နေရာမှာ အသက် ၄၀ အထက် သက်ကြီးပိုင်းတွေကို မကူးစက်နိုင်သောရောဂါတွေ၊ နာတာရှည်ရောဂါတွေကို စေတနာ့ကျန်းမာရေးအဖွဲ့မှ သွားရောက်စစ်ဆေးပေးခဲ့ပြီး လိုအပ်တဲ့ဆေးဝါးတွေကို ပေးခဲ့တယ်လို့ သိရပါတယ်။

“သွေးတိုးသမားက ဆေးစွဲသောက်ရတယ်။ ဒီရောဂါက တစ်ယောက်နဲ့တစ်ယောက် မကူးစက်နိုင်ဘူး။ ဒါပေမယ့် ဂရုမစိုက်ရင်အသက်အန္တရာယ်ထိရှိတယ်၊ မနက်ပိုင်းဆို ဆေးပုံမှန်
သောက်ရတယ်၊ လေ့ကျင့်ခန်း လုပ်ဖို့သူတို့ကို အကြံပေးတယ်၊ အခုဆိုရင် လူတိုင်း အခက်အခဲဖြစ်တယ်လေး။ စစ်ရှောင်လည်း ဖြစ်တယ်၊ ဝင်ငွေမရှိတော့ အစာရှောင်ခိုင်းလည်း သူတို့အတွက် အခက်အခဲဖြစ်တယ်” လို့ စေတနာဝန်ထမ်းတစ်ဦးက ပြောပါတယ်။

စစ်ဘေးရှောင်နေကြရတာ တစ်နှစ်ကျော်ရှိလာပြီဖြစ်တဲ့အတွက် ဆေးကုသမှုနဲ့ ဆေးဝါးလုံလောက်အောင်မရရှိတဲ့ အသက်ကြီးပိုင်းတွေမှာ သွေးတိုး၊ ဆီးချို၊ သွေးချိုရောဂါ ခံစားနေရသူတွေများတယ်လို့ ဆိုပါတယ်။

စစ်ရှောင် အမျိုးသမီးတစ်ဦးက “ဆီးချိုရှိလား မေးတော့မရှိဘူးပြောတယ် အဲ့တာ ဆရာမတို့ လာတာ ပြန်လာစစ်တာ၊ သွေးတိုးတော့ ရှိတယ်၊ သွေးတိုးက ရှိတာ ကြာပြီ ၅ နှစ် ၆ နှစ်ရှိပြီ။ ဒီစစ်ရှောင်မှာတော့ ဆေးပြတ်တာ မရှိသေးဘူး၊ အရင်က ဟိုပြေး ဒီပြေးတော့ သွေးတိုးဆေး ခဏခဏပြတ်တယ်၊ ညညအိပ်တာ သေနတ်သံမကြားရင် အိပ်ပျော်တယ်၊ သေနတ်သံကြားရင်တော့ အိပ်မပျော်ဘူး၊ လန့်လန့်နိုးနေရတယ်” လို့ ပြောပါတယ်။

ဒီးမော့ဆိုမြို့နယ်အတွင်း စစ်ရှောင်တွေမှာ သက်ကြီးပိုင်းလူနာတွေရဲ့ ၈၅ ရာခိုင်နှုန်းဟာ သွေးတိုး၊ ဆီးချို သွေးချိုအပြင် အခြားသော နာတာရှည်ရောဂါတွေ ခံစားနေရတယ်လို့ စေတနာ့ကျန်းမာရေးအဖွဲ့ထံကနေ သိရပါတယ်။

spot_img
spot_img