တောင်သူတွေနဲ့ တပ်မတော်ဖြစ်ပွားနေတဲ့ ပြဿနာကို အစိုးရက ဖြေရှင်းပေးဖို့ ပြည်နယ်အခြေစိုက် တိုင်းရင်းသားပါတီတွေတောင်းဆို

အန်ထောနီ

တောင်သူတွေနဲ့ မြန်မာ့တပ်မတော်တို့ ဖြစ်ပွားနေတဲ့ ပြဿနာတွေကို ပြည်ထောင်စု အစိုးရသော်လည်းကောင်း ပြည်နယ်အစိုးရသော်လည်းကောင်း တစ်စုံတစ်ရာ ဖြေရှင်းပေးတာတို့ ညွန်ကြားချက်တွေထုတ်ပေးတာတို့ ဆောင်ရွက်သင့်တယ်လို့ ကယား(ကရင်နီ)ပြည်နယ် အခြေစိုက် တိုင်းရင်းသားပါတီတွေက တောင်းဆိုလိုက်ပါတယ်။

“အစိုးရတွေက ဒါချက်ချင်းလုပ်ဆောင်ပေးသင့်တဲ့အရာဖြစ်တယ်။ နောက်ထပ်အမှုမျိုးတွေမတက်လာအောင်လည်း ပြင်ဆင်တဲ့အနေနဲ့ ပြင်ဆင်တဲ့ အနေအထားဖြစ်အောင် ညွန်ကြားချက်တွေ ဥပဒေတွေပြင်တာတွေ တစ်စုံတစ်ရာ လုပ်ဖို့လိုအပ်တယ်။ ဒါပေမယ့်လက်ရှိအစိုးရက လက်ရှိအခြေအနေအထိ ဘာတစ်ခုမှ မပြင်ထားဘူး။”လို့ ကယန်းအမျိုးသားပါတီ ဥက္ကဌ ခွန်းဘီထူးက ပြောပါတယ်။

ပြည်နယ်တရားလွှတ်တော် ရုံးချိန်းသို့ ရောက်ရှိလာတဲ့ တောင်သူတွေနဲ့ အရပ်ဖက်အဖွဲ့အစည်းမြင်တွေ့ရစဉ်။ ဓါတ်ပုံ – နော်ဒွေးအယ်ခူ

ကယားပြည်နယ် ၊ လွိုင်ကော်ခရိုင် ၊ လွိုင်ကော်မြို့နယ်ရှိ တပ်မတော်တပ်ရင်းဖြစ်ကြတဲ့ အမတ (၃၅၆)၊ ခမရ (၂၅၀) နှင့် ဒီးမော့ဆိုမြို့နယ်ရှိ အမတ (၃၆၀) တို့ က တောင်သူလယ်သမား ၃၇ ဦးနှင့် ကရင်နီပြည်တောင်သူလယ်သမားသမဂ္ဂဝန်ထမ်း(၃)ဦး စုစုပေါင်း (၄၀) ဦးတို့ကို မြို့နယ် အသီးသီးက ထောင်ဒါဏ်နှင့် ငွေဒါဏ် အသီးသီးချမှတ်ထားခဲ့ပြီးဖြစ်ပါတယ်။

မြို့နယ်တရားရုံးမှချမှတ်ထားတဲ့ ပြစ်ဒဏ်တွေကို မကျေနပ်လို့ဆိုပြီး တပ်မတော်တပ်ရင်းတွေကနေ ပြည်နယ်တရားလွှတ်တော်တရားရုံးကို ပြင်ဆင်ချက်ပြန်လည်တက်သည့်အကြောင်းအရင်းတွေကို သဘောမတူကြောင်းနှင့် အစိုးရဖက်မှ ဝင်ရောက်ဖြေရှင်းပေးဖို့အတွက် ကယားပြည်နယ် ဒီမိုကရက်တသ်စပါတီ (KySDP) နှင့် ကယန်းအမျိုးသားပါတီ(KNP) တို့က ဇူလိုင်လ ၁၅ ရက်နေ့မှာ ထုတ်ပြန်လိုက်ပါတယ်။

“ နောက်တစ်ခုကဘာလဲဆိုရင် တောင်သူုလယ်သမားတွေကလည်း အရင်တုန်းကလည်း တရားရုံးချိန်းတွေရှိတယ် နောက်ပြီးတော့မှ အချုပ်ထောင်ထဲနေနေရတဲ့အပေါ်မှာလည်း သူတို့အနေနဲ့က အများကြီး စိတ်ပိုင်းဆိုင်ရာကော ပင်ပန်းနွမ်းနယ်မှု စိတ်ထိခိုက်မှုတွေလည်း အများကြီးရှိလာတဲ့အပေါ်မှာ တော်တော်လေး ခံစားလိုက်ကြရတယ်ပေါ့နော်။ဒါပေမယ့် အခုကထပ်ပြီးတော့မှ ဒီလိုဖြစ်လာရတဲ့အပေါ်မှာကတော့ လူ့အခွင့်အရေးချိုးဖောက်မှုတစ်ခုလို့ပဲ မြင်တယ်။ ဆိုတော့ ဒီဟာတွေကလည်း အစိုးရမှာ တာဝန်ရှိတယ်။” လို့ ကယားပြည်နယ်ဒီမိုကရက်တစ်ပါတီ အထွေထွေအတွင်းရေးမှူး ဦးသဲရယ် ကပြောပါတယ်။

တောင်သူလယ်သမားအရေးကိစ္စနှင့်ပတ်သက်၍ ထုတ်ပြန်ချက်အပေါ် အစိုးရမှ တစ်စုံတစ်ရာ အကြောင်းပြန်ခြင်းမရှိသေးဘူးလို့သိရပါတယ်။

ကယားပြည်နယ် အစိုးရအဖွဲ့ ပြည်နယ်ဝန်ကြီးချုပ်ကို ကန္တာရဝတီတိုင်း(မ်)မှ ဖုန်းဖြင့် ဆက်သွယ်မေးမြန်းရာမှာ အချိန်မပေးနိုင်သေးကြောင်း လာမည့် ရှေ့တစ်ပတ်တွင်း ရုံးချိန်တွင် တွေ့ဆုံမေးမြန်းဖို့ ချိန်းဆိုလိုက်ပါတယ်။

တပ်မတော်ကနေ ပြင်ဆင်ချက်တက်ပြီးနောက် ပြည်နယ်တရားလွှတ်တော်ရုံးသို့ ဇူလိုင်လ ၁၀ ရက်နေ့က လွိုင်ကော်မြို့နယ်အတွင်းရှိတောင်သူတွေကို ရုံးချိန်းခဲ့ပြီး ယနေ့ ဇူလိုင်လ ၁၆ ရက်နေ့မှာတော့ ဒီးမော့ဆိုမြို့နယ်ရှိ ဒေါဆိုရှေ့တောင်သူတွေကို ရုံးချိန်း ချိန်းဆိုခဲ့ပါတယ်။

Comments

comments

Next Post

ကယန်းအမျိုးသားပါတီဥက္ကဌ ခွန်းဘီထူးနှင့် ဆက်သွယ်မေးမြန်းခြင်း

Fri Jul 17 , 2020
လာမယ့် ၂၀၂၀အထွေထွေရွေးကောက်ပွဲမှာ ကယားပြည်နယ်အခြေစိုက် ဒေသခံတိုင်းရင်းသားပါတီဖြစ်တဲ့ ကယန်းအမျိုးသားပါတီအနေနဲ့ ကိုဗစ်ကာလအတွင်းမှာ ရွေးကောက်ပွဲမဲဆွယ်စည်းရုံးဖို့ ဘယ်လိုပြင်ဆင်ထားသလဲ။ ရွေးကောက်ပွဲကော်မရှင်ရဲ့လုပ်ဆောင်ချက်တွေကို ဘယ်လိုပြောဆိုထားပါသလဲ စတဲ့အကြောင်းအရာနဲ့ပတ်သက်ပြီး ကယန်းအမျိုးသားပါတီဥက္ကဌ ခွန်းဘီထူးကို ကန္တာရဝတီတိုင်း(မ်)က ဆက်သွယ်မေးမြန်းထားပါတယ်။ မေး။ ။ ရွေးကောက်ပွဲကလည်း နီးလာပြီဆိုတော့ မဲဆွယ်ဖို့အတွက် ဒီကိုဗစ်ကာလအတွင်းမှာ ဘယ်လို ပြင်ဆင်မှုတွေလုပ်ထားလဲ ဘယ်လိုပုံစံနဲ့ မဲဆွယ်သွားမလဲ။ ဖြေ။ ။ ကျတော်တို့ကယန်းအမျိုးသားပါတီမှာတော့ ခိုင်လုံတဲ့လူထုထောက်ခံမှု အတိုင်းအတာလေးတစ်ခု ကျတော်တို့ရထားတဲ့အတွက် မဲဆွယ်တဲ့ပုံစံကိုတော့ တစ်အိမ်ဝင်တစ်အိမ်ထွက် မဟုတ်ရင်လည်း လူနည်းစုနဲ့မဲဆွယ်တဲ့ပုံစံပြောင်းလို့ရတယ်။ ပြီးတော့ ဒီနေ့ဒီအချိန်မှာလည်း IT အွန်လိုင်းတွေနဲ့တဆင့် မဲဆွယ်တဲ့ဟာလုပ်သွားလို့ရတယ်။ ဒါကတော့ အကြမ်းဖျင်းဆွေးနွေးထားတဲ့ဟာမျိုးပေါ့ ဒီလိုပုံစံမျိုးတော့ ပြောင်းလဲလုပ်လို့ရတယ်ပေါ့နော ဒါပေမယ့် စည်းကမ်းဘယ်လိုထွက်လာမလဲဆိုတာတော့ မသိသေးဘူးပေါ့နော။ UEC ကထုတ်ပြန်ထားတဲ့စည်းမျဉ်းစည်းကမ်းဘယ်လိုဖြစ်မလဲမသိသေးဘူးပေါ့နော။ အဲ့အပေါ်မှာလည်း […]