ထီးဆိုဒူးအလှ စီမံကိန်းများကြောင့် အကျည်းတန်စေတော့မှာလား

ကန္တာရဝတီတိုင်းမ်

ကယားပြည်နယ်အစိုးရ၏ခွင့်ပြုချက်ဖြင့် စွတ်ပိုင်ကုမ္ပဏီမှ ကယားပြည်နယ်၊ ဖရူဆိုမြို့နယ်ရှိ ထီးဆိုဒူးရေဝေရေလဲ အမြဲစိမ်းသစ်တောတွင် ခရီးသွားလုပ်ငန်းလုပ်ဆောင်ရန် အစီအစဉ်များ ရေးဆွဲနေကြသည်မှာ နောက်ဆုံးအဆင့်သို့ ရောက်ရှိနေပြီဖြစ်သည်။

ခရီးသွားလုပ်ငန်းကုမ္ပဏီမှ ထီးဆိုဒူးတွင် လုပ်ဆောင်မည့် လုပ်ငန်းများမှာ ရုံးခန်းဆောက်လုပ်ခြင်း၊ စားသောက်ဆိုင်၊ အမှတ်တရပစ္စည်းအရောင်းဆိုင်၊ မြင်းစီးစခန်း၊ ရေလွှာလျှောစီး၊ အလှသစ်ပင်စိုက်ပျိုးခြင်း၊ မီးတားလမ်းဖောက်လုပ်ခြင်း၊ လျှပ်စစ်မီးသွယ်တန်းခြင်း၊ ကားလမ်းဖောက်လုပ်ခြင်း၊ ရွှေ့ပြောင်းနိုင်သော ဘန်ဂလိုများ တည်ဆောက်ခြင်း၊ ရေချိုးကန်(ပူ/အေး)၊ သန့်စင်ခန်းများ၊ ဂေါက်ကွင်းငယ်၊ အဝေးကြည့်မှန်ပြောင်းစခန်း၊ အရံမီးစခန်း၊ ကားပါကင်၊ Mini-mart ၊ သစ်တောပျိုးဥယျာဉ်နှင့် သစ်တောဥယျာဉ်တည်ဆောက်ခြင်း၊ တိရစာ္ဆန်ဥယျာဉ်တည်ဆောက်ခြင်းနှင့် ယက္ကန်းနှင့် အထည်ရောင်းချခြင်းတို့ကို ဆောင်ရွက်မည်ဖြစ်ကြောင်း သိရသည်။

ဆက်လက်ပြီးကုမ္ပဏီမှ ဒေသခံများအတွက် လျာထားသည့်သင်တန်းများမှာ အင်္ဂလိပ်စာသင်တန်း၊ စာရင်းကိုင်သင်တန်း၊ ဖွံ့ဖြိုးရေးသင်တန်းများ၊ ဟိုတယ်လုပ်ငန်းများ စီမံခန့်ခွဲမှုသင်တန်းများ၊ စာပေနှင့်ယဉ်ကျေးမှုမြင့်တင်ခြင်း၊ စားသောက်သူများအခွင့်အရေး၊ ဂေဟစနစ်၊ ကွန်ပျူတာသင်တန်းများနှင့် ချက်ပြုတ်ရေးသင်တန်းများကို ပေးရန် လျာထားကြောင်း သိရသည်။

၎င်းစီမံကိန်းများအားလုံးအတွက် အသုံးပြုမည့် မြေဧကမှာ ၇၁.၄၅ဧကဖြစ်သည်။

ကုမ္ပဏီအနေဖြင့် ၎င်းတို့ခရီးသွားလုပ်ငန်းများ လုပ်ဆောင်မည့်နှစ်ကာလများတွင်သာ လုပ်ကိုင်မည်ဖြစ်ပြီး စီမံကိန်းပြီးလျှင်ပြည်နယ်အစိုးရထံသို့ လက်လွှဲမည်ဖြစ်ကြောင်း သိရသည်။ စီမံကိန်းလုပ်ဆောင်နေသည့် ကာလအတွင်း ဒေသခံများကိုသာ ဦးစားပေး အလုပ်ခန့်အပ်မည် ဖြစ်သည့်အတွက်ကြောင့် ဒေသခံများ အလုပ်အကိုင်ရရှိနိုင်တော့မည် ဖြစ်သည်။ လုပ်ငန်းမှရရှိလာသည့် အကျိုးအမြတ်များကိုလည်း ဒေသတွင်းရှိပညာရေး၊ ကျန်းမာရေးအပိုင်းတွင် ပြန်လည်လုပ်ဆောင်ပေးမည်ဖြစ်ကြောင်း ကုမ္ပဏီတာဝန်ရှိသူများက ဆိုသည်။

ကယောဒေသရှိ ထီးဆိုဒူးစီမံကိန်းနှင့် ထီးပရူနူခရီးသွားလုပ်ငန်း စီမံကိန်းတို့အတွက် နှစ်ခုပေါင်းအမေရိကန်ဒေါ်လာ (၁၀)သန်း အသုံးပြုမည်ဖြစ်ကြောင်း သိရသည်။ ၎င်းငွေကြေးများကို ဂျပန်နိုင်ငံအလှူရှင်မှ ထောက်ပံ့ပေးမည်ဖြစ်ပြီး ထီးဆိုဒူးလုပ်ငန်းအတွက် ပြည်နယ်အစိုးရသို့ လစဉ်ကျပ် (၁)သိန်းပေးသွင်းရမည် ဖြစ်သည်။ ထီးပရူနူခရီးသွားလုပ်ငန်းအတွက်မူ လစဉ် (၁)သောင်းကျပ် ပေးသွင်းရမည်ဖြစ်ကြောင်း ကုမ္ဗဏီတာဝန်ရှိသူများထံမှ သိရသည်။

၎င်းစီမံကိန်းများကို အဆင်ပြေချောမွေ့စွာ လုပ်ဆောင်နိုင်ရန်အတွက် စာပေယဉ်ကျေးမှုကော်မတီ၊ ကယောအမျိုးသားဗဟိုကော်မတီ၊ လက်နက်ကိုင်အဖွဲ့ဝင်များမှ ဆရာတော်ဆိုတေးရိုဖားမော၏ မင်္ဂလာအေးရိပ်သာတွင် ဒေသခံများနှင့် ကုမ္ဗဏီတာဝန်ရှိသူများတို့ ဆွေးနွေးတိုင်ပင်မှုများကိုမေလ ၁၈ရက်တွင် ပြုလုပ်ခဲ့သည်။

ထီးဆိုဒူးသည် ကယားပြည်နယ်၏ တစ်ခုတည်းသော ရေဝေရေလဲထိန်းသိမ်းပေးသည့်တော၊ တစ်ပြည်နယ်လုံး၏ ရာသီဥတုကို မျှတအောင် ထိန်းသိမ်းပေးထားသည့် တောဖြစ်သည်။ ၎င်းတောအတွင်း သစ်ပင်များ၏ လုံးပတ်မှာ ပေ(၃၀)ပတ်လည်ရှိသည့် အဖိုးတန်သစ်များ အများအပြားရှိသည်။ ထို့အပြင် သဘာဝအလျောက် ပေါက်ရောက်သည့် စားပင်သီးပင်များလည်း ပေါများပြီး သားရဲတိရစာ္ဆန်များ ပေါက်ဖွားနားခိုသည့် တောကြီးတစ်ခုလည်း ဖြစ်သည်။

နွေ၊ မိုး၊ ဆောင်း သုံးရာသီပတ်လုံး စိုစွတ်နေပြီး သစ်တောအတွင်း စမ်းချောင်းများလည်း ပြည့်နှက်နေသည်။ တစ်ခုဝမ်းနည်းစရာကောင်းသည်မှာ ၎င်းတောအတွင်း သစ်ပင်များခုတ်လှဲကာ သစ်ဆွဲခြင်း၊ တောင်ယာများခုတ်ထွင်ခြင်းများကြောင့် ကျေးရွာနှင့် နီးသည့်ဧရိယာအချို့တွင် သစ်ပင်ကြီးများ အနည်းငယ်သာ ကျန်တော့သည်။

ကုမ္ပဏီမှ လုပ်ငန်းများလာရောက်လုပ်ဆောင်လျှင် ဒေသခံများလုပ်ကိုင်စားသောက်သည့် ရွှေ့ပြောင်းတောင်ယာများကို ဖယ်ပြီး သဘာဝသစ်တောဥယျာဉ် လှလှပပတည်ဆောက်ကာ ရွှေ့ပြောင်းတောင်ယာစနစ် ပပျောက်အောင် လုပ်ဆောင်မည်ဟု သိရသည်။

သဘာဝတရားနှင့် ပြည့်နှက်နေသည့် ထီးဆိုဒူးသစ်တောတွင် ယခုလို လုပ်ငန်းကြီးများ လာရောက်လုပ်ကိုင်မည့်အပေါ် ဒေသခံများအပါအဝင် ဘာသာရေးခေါင်းဆောင်ကြီးများပါ ၎င်းတို့၏ ဆန္ဒသဘောထားများကို ပြောဆိုခဲ့ကြသည်။

̏ ဘယ်အလုပ်ကိုပဲ သေသေချာချာလုပ်ဖို့လိုတယ်၊ ကိုယ်အလုပ်လုပ်မယ့် လုပ်ငန်း ဒေသခံတွေနဲ့ ပတ်သက်ရင် ကိုယ်လုပ်မယ့်ဒေသက ဒေသခံတွေသိဖို့လိုတယ်၊ ခိုက်ရန်ဖြစ်ပွားမှုတွေ မရှိဘဲ ဘုရားတရားနဲ့လုပ်၊ လုပ်မယ့်တည်နေရာ၊ လုပ်ငန်းအမျိုးအစားတွေ ချပြဖို့လိုမယ်။ ဒေသခံရေမြေတွေကို ဂရုစိုက်ရမယ်၊ စီမံကိန်းတစ်ခုလုပ်ရင် သေချာဆွေးနွေးတိုင်ပင်ပြီးတော့ ကိုယ့်ဒေသဖွံ့ဖြိုးတိုတက်အောင် လုပ်ဆောင်ကြပါ ˝ဟု ဆရာတော်(ငြိမ်း)ဆိုတေးရိုဖားမောက ၎င်းနေအိမ်တွင် လုပ်ဆောင်သည့် အစည်းအဝေးတွင် ပြောကြားခဲ့သည်။

ဆက်လက်ပြီး ကယောအမျိုးသား ဗဟိုကော်မတီဝင် ဦးမာခိုးအီချစ်ထွန်းကလည်း ထီးဆိုဒူး၏ပတ်ပတ်လည် ကျေးရွာများ၏ ထောက်ခံချက်နှင့် တစ်မျိုးသားလုံး၏ ထောက်ခံချက်မည်မျှ ရရှိထားကြောင်း၊ ၎င်းတို့၏ ထောက်ခံချက်ကို ဦးဆုံးရယူပြီးမှသာလျှင် လုပ်ငန်းများ လုပ်ဆောင်သင့်ကြောင်း ပြောကြားသည်။

̏ ဒေသခံတွေရဲ့ ထောက်ခံမှုကတော့ ၅၀%လောက်ရပြီလို့ပြောလို့ ရပါတယ်။ ဘာလို့လဲဆိုရင် ဒေသခေါင်းဆောင်တွေ ဟို ၂ရရက်နေ့ကဆွေးနွေးပွဲဆိုရင် ရွာ ၁၄ရွာမှာဆိုရင် ဒေသခံခေါင်းဆောင် တစ်ရွာကို ၅ယောက်ပါပါတယ်။ အဲ့လိုမျိုးဆွေးနွေးခဲ့တာပေါ့နော၊ ဒါပေမယ့် သူတို့ရွာကို ပြန်ပြီးတော့ ရှင်းပြမယ်၊ ရှင်းပြပြီး ရွာဒေကနေတစ်ဆင့် ပြန်ထွက်လာတဲ့ result တွေနဲ့ပေါ့နော။ တစ်ချို့ကလည်း သဘောတူတယ် တစ်ချို့ကလည်း သဘောမတူဘူး။ ဘာကြောင့် သဘောမတူတာလဲဆိုရင် သူတို့မေးတဲ့မေးခွန်းတွေကို ပြေလည်အောင်ဖြေရှင်းနိုင်မယ်ဆိုရင်တော့ အောင်မြင်မှာပါ။˝ ဟု စွတ်ပိုင်ကုမ္ပဏီ Operation Director ဒေါ်နုနုအောင်ကျော်က ပြောသည်။

အမျိုးသားခေါင်းဆောင်ကြီးများအပြင် ဒေသခံများကိုပါ အသိပေးခြင်း၊ ဒေသခံပြည်သူလူထုများ၏ သဘောထားကို တောင်းခံ/ကောက်ခံခြင်းမရှိဘဲ လုပ်ဆောင်သည်မှာ အဆင်မပြေနိုင်ကြောင်းနှင့် ပြည်သူလူထုကို နံပါတ်တစ်နေရာတွင် ထားပြီးဒေသတွင်း လုပ်ငန်းများ လုပ်ဆောင်သင့်ကြောင်း ခေါင်းဆောင်များ ပြောကြားကြသည်။

သစ်များဖုံးလွှမ်းနေသည့် ထီးဆိုဒူးတောတွင် ကုမ္ပဏီများမှ လာရောက်လုပ်ငန်းလုပ်ဆောင်လျှင် အနည်းဆုံး၎င်းနေရာများကို ခုတ်ထွင်ရှင်းလင်းမည်ဖြစ်သည့်အပြင် ဆောက်အဦးများလည်း ဆောက်လုပ်တော့မည် ဖြစ်သည်။ လုပ်ငန်းမှာ နှစ်တိုစီမံကိန်းမဟုတ်သည့်အတွက်လည်း ရေရှည်တွင် သစ်တောများပြုန်းတီးမှုများ ဖြစ်ပေါ်လာတော့မည်။ ထို့ကြောင့် စီမံကိန်းများ မဖြစ်မနေလုပ်ဆောင်ရန် လိုအပ်လျှင် သဘာဝကိုမပျက်စီးသည့် တောင်တက်တောင်ဆင်း ခြေလျှင်ခရီးသွားပုံစံ၊ Home stay တို့လိုပုံစံမျိုး လုပ်ဆောင်စေလိုကြောင်း ဒေသခံများက ပြောသည်။

̏ လုပ်ငန်းတွေ လုပ်ဆောင်မယ်ဆိုရင်တော့ အနည်းဆုံးတော့ သူတို့သစ်ပင်တွေကို ဖြတ်မှာပဲ၊ နောက်တစ်ချက်က အဲ့မှာ ရေ မရှိမဖြစ်ဘူးလေ ရေတွေကို သူတို့သုံးပြုလာမယ်၊ ပြီးရင် ဟော်တယ်မော်တယ်ပုံစံတွေလာမယ်ဆိုရင် ရေတွေအသုံးပြုလာမယ် ပြီးရင်အညစ်အကြေးတွေ သူတို့စွန့်ပစ်မယ့်နေရာတွေ ပေါ်လာလိမ့်မယ်။ အဲ့မှာစွန့်ပစ်ပစ္စည်းတွေရှိမယ်။ သဘာဝကိုဆန့်ကျင်တဲ့ စွန့်ပစ်ပစ္စည်းတွေ များစွာပေါ်လာလိမ့်မယ်။ အဲ့ဒီအချိန်မှာ သစ်တောတွေလည်းး ထိခိုက်မယ်။
တစ်ဖက်ကနေကြည့်ရင် ကုမ္ပဏီတွေ ဘာတွေဝင်လာမယ်ဆိုရင် တိုးတက်တဲ့အခြေအနေလို့ ပြောလို့ရပေမယ့်လည်း ကျွန်တေ်ာကတော့ ဒီသစ်တောတွေ ထိန်းသိမ်းချင်တဲ့အတွက်တော့ မလာစေချင်ဘူး၊ ရပ်တန့်စေချင်တယ်ပေါ့။˝ဟု ကယောလူငယ်ထာဖိုးအီက ပြောသည်။

̏ ကုမ္ပဏီဝင်လာမယ်ဆိုပြီး ကျွန်တော်တို့ကိုဆင်ဖြူတောင်မှာ အစည်းအဝေးဖိတ်ထားတယ်။ ကျွန်တော်တို့ကိုဖိတ်တော့ ကျွန်တော်တို့၊ အစတုန်းကသူတို့က ဒီဒေသခံတွေလက်ခံမယ်လို့ သူတု့ိထင်ရင်ထင်မယ်ပေါ့၊ ဒါပေမယ့် ကျွန်တော်တု့ိလက်မခံခဲ့ဘူးလေ။ နောက်ဆုံး အရင်တစ်ပတ်နှစ်ပတ်မှာ ဆရာတော်ကျောင်းတိုက်မှာ အစည်းအဝေးပြန်လုပ်တော့ သူများအကုန်လုံး ကန့်ကွက်ထားတယ် လို့ပဲသတင်းကြားထားတယ်။ အဲ့လိုပဲကျွန်တော်တို့ ဟိုးဆင်ဖြူတောင်မှာလည်း ကျွန်တော်တု့ိကန့်ကွက်ထားတယ် အခုလည်းကျွန်တော်တို့ ကန့်ကွက်ထားတယ် အဲ့လိုမျိုးပေါ့။˝ဟု ဘာဒိုကျေးရွာ ဓမ္မဆရာဦးလွီးဇီက ပြောသည်။

̏ ကုမ္ပဏီအနေနဲ့ လက်ရှိလုပ်ဆောင်နေတာတွေကို ခေတ္တရပ်ဆိုင်းပေးပါ၊ လုံးဝကြီးရပ်ဆိုင်းပါ မပြောပေမယ့် ရပ်ဆိုင်းပေးပါ။ အချိန်တစ်ခုအထိပေါ့ လောလောဆယ်တော့ ကျွန်တော့်တစ်ယောက် အနေနဲ့တော့ လုံးဝလက်မခံနိုင်သေးဘူး˝ ဟု ကယောစာပေယဉ်ကျေးမှု ဗဟိုကော်မတီမှ ဦးမြင့်မောင်မောင်က ပြောသည်။

လက်ရှိလုပ်နေသည့် လုပ်ငန်းများကို ခေတ္တရပ်ဆိုင်းပြီး တစ်မျိုးသားလုံးနှင့် သက်ဆိုင်သည့်ကိစ္စကို ထပ်မံအချိန်ယူကာ ဆွေးနွေးစေလိုကြောင်း ကုမ္ပဏီကို တောင်းဆိုကြသည်။

သို့ပေမယ့် စီမံကိန်းကို ခေတ္တရပ်ဆိုင်းခြင်းမျိုးမဟုတ်ဘဲ ရာသက်ပန်ရပ်ဆိုင်းပေးရန်နှင့် မည်သူမျှ ဝင်မလာစေရန် ကန့်ကွက်ပေးရန် လူငယ်တစ်ဦးက ၎င်း၏ဆန္ဒသဘောထားကို ပြောကြားသည်။

̏ တောင်းဆိုတဲ့အပေါ် ဘယ်လိုအခြေအနေမျိုး ပေးနိုင်မလဲဆိုတော့ တစ်ဖက်ကတောင်းဆိုတဲ့ ကုမ္ပဏီတွေ ရှိတယ်လေ၊ ကုမ္ပဏီကို ဒါတွေတင်ပြရမယ်ပေါ့၊ သူတို့ဆောက်ချင်တဲ့ ဘန်ဂလိုတွေမဖြစ်နိုင်ဘူးပေါ့နော။ ဒီလိုမျိုး home stay တို့ long trip တို့ ဒေသခံတွေနဲ့သွားတဲ့ ပုံစံတွေဆိုရင် သူတို့ ဒေသခံတွေ ခွင့်ပြုရင် အစိုးရကို ပြန်တင်ပြပြီး စီမံကိန်း ပြန်ဆွဲရမယ်ပေါ့။ သူတို့ အကြိုက်လည်း မလွတ်အောင်ပေါ့။˝ဟု ဒေါ်နုနုအောင်ကျော်က ပြောသည်။

ဒေသခံများက ၎င်းထီးဆိုဒူးသစ်တောအတွင်းသို့ မည်သည့်ကုမ္ပဏီ၊ မည်သည့်သာသနာ၊ မည်သည့်ဌာနမှ ဝင်ရောက်ရန် လက်ခံနိုင်မည်မဟုတ်ကြောင်းနှင့် တတ်နိုင်သမျှ ထိန်းသိမ်းစောင့်ရှောက် ကာကွယ်သွားမည်ဖြစ်ကြောင်း ပြောဆိုကြသည်။

ထီးဆိုဒူးသည် ဖရူဆိုမြို့နယ်၊ ဒီးမော့ဆိုမြို့နယ်နှင့် ရှမ်း/တောင်နိမိတ်ကြားတွင် တည်ရှိပြီး ကျေးရွာပေါင်း မြောက်များစွာက မှီခိုအားထားနေသည့် တောဖြစ်သည်။ မေလ၂၁-၂၃ရက်နေ့တို့တွင် ဂရုဏာ(လွိုင်ကော်)မှ ဦးဆောင်ကာ ဒေသခံများနှင့် ကယောလူငယ်များပါဝင်သည့် ထီးဆိုဒူးဧရိယာကို GPS ဖြင့် တိုင်းတာသည့်ခရီးစဉ်တစ်ခု လုပ်ဆောင်ခဲ့ကြသည်။ လက်ရှိတွင် ထီးဆိုဒူးဧရိယာမှာ ၂၁၀ဝဧကခန့်ရှိသည်ဟု တိုင်းတာရရှိကြောင်း သိရသည်။

လက်ရှိကျန်ရှိနေသည့် ၂၀၀ဝကျော်သော ဧရိယာကို ထပ်မံမပျက်စီးရန်၊ တစ်ပြည်နယ်လုံး၏ ရာသီဥတုမျှတရန်အတွက် သဘာဝတရားအတိုင်း လှပနေသည့်တောလေးကို ထိန်းသိမ်းစောင့်ရှောက်ကြဖို့ တိုက်တွန်းရင်း…