မဟာမိတ်တိုင်းရင်းသားပါတီ ၃ ပါတီပေါင်းပြီး ကြားဖြတ်ရွေးကောက်ပွဲဝင်ပြိုင်မည့် ကိုယ်စားလှယ်လောင်း တစ်ဦးရွေးခြယ်

ထျိုးမြာ

၂၀၁ရ ခုနှစ် ဧပြီလတွင်ကျင်းပမည့် ကြားဖြတ်ရွေးကောက်ပွဲအတွက် ကယားလူမျိုးစုဒီမိုကရေစီပါတီ၊ လူမျိုးပေါင်းစုံဒီမိုကရေစီပါတီနှင့် ကယန်းအမျိုးသားပါတီ သုံးပါတီပူးပေါင်းပြီး မဟာမိတ်ပါတီများအနေဖြင့် ကြားဖြတ်ရွေးကောက်ပွဲတွင် ဝင်ရောက်ယှဉ်ပြိုင်မည့်ကိုယ်စားလှယ်လောင်းတစ်ဦးကို ဒေသခံလူထုနှင့် ပူးပေါင်းပြီး ရွေးချယ်ခဲ့ကြသည်။

“သုံးပါတီပေါင်းပြီးတော့မှ ကိုယ်စားလှယ်တစ်ဦးရွေးချယ်ပြီးတင်သွင်းဖို့ ကျနော်တို့သဘောတူညီမှုရခဲ့ကြတယ်။ အဲဒီအပေါ်မှာလည်း ကိုယ်စားလှယ်တွေအနေနဲ့ အားလုံးဝိုင်းရွေးတဲ့အချိန်မှာတော့ လူမျိုးပေါင်းစုံဒီမိုကရေစီပါတီထဲက ကိုသဲရယ် က အရွေးခံရပြီးတော့မှ ကို်ယ်စားလှယ်လောင်းအဖြစ်လျာထားခံရတယ်ပေါ့။ ဆိုတော့ ကိုသဲရယ်ကို ရွေးချယ်တဲ့နေရာမှာ ကျနော်တို့သုံးပါတီလုံးရဲ့သဘောထားဖြစ်ပါတယ်။ ကျနော်တို့သုံးပါတီလုံးကနေပြီးတော့မှ သူ့ကိုပဲ ဝိုင်းဝန်းပံ့ပိုးကြမှာဖြစ်ပါတယ် ” ဟု ကယန်းအမျိုးသားပါတီ ဥက္ကဌခွန်းဘီထူးက ပြောသည်။

ကြားဖြတ်ရွေးကောက်ပွဲအတွက် ကယားပြည်နယ်လွှတ်တော် ဖရူဆိုမြို့နယ်၊ မဲဆန္ဒနယ်အမှတ်(၁)နေရာတွင် ပြီးခဲ့သည့် ၂၀၁၅ ရွေးကောက်ပွဲ၌ အနိုင်ရရှိသွားသည့် အမျိုးသားဒီမိုကရေစီအဖွဲ့ချုပ်မှ ဦးသိုးရယ် ကွယ်လွန်သွားသည့်အတွက် ၎င်းလစ်လပ်သွားသည့်နေရာတွင် ပြည်နယ်တိုင်းရင်းသားမဟာမိတ်ပါတီအနေဖြင့် ဦးသဲရယ်က ဝင်ပြိုင်မည်ဖြစ်သည်။

လူမျိုးပေါင်းစုံဒီမိုကရေစီပါတီဥက္ကဌ ဦးဖိုးရယ်က “ကျနော်တို့ မနေ့ကလိုမျိုးဆို ပြည်သူလူထုနဲ့လည်း ကျနော်တို့တွေ့ထားပြီးပြီ။ နောက်ရှေ့ဆက်လည်း ကျနော်တို့ကွင်းဆင်းအုံးမှာပါ။ သူတို့က သူတို့ကြိုက်တဲ့ကို်ယ်စားလှယ်လောင်းကို သူတို့ကိုယ်တိုင်ရွေးချယ်ထားတယ်ဆိုတော့ မျှော်လင့်ချက်တော့ အများကြီးရှိပါတယ် ” ဟု သူကပြောသည်။

ပြည်ထောင်စု ရွေးကောက်ပွဲကော်မရှင်၏ ကြားဖြတ်ရွေးကောက်ပွဲလျာထားလုပ်ငန်းစဉ်အချိန်စာရင်းအရ လွတ်တော်ကိုယ်စားလှယ်လောင်းအမည်တင်သွင်းနိုင်မည့်နေရက်ကို ၂၈ ရက် နိုဝင်ဘာ ၂၀၁၆ မှ ရ ရက် ဒီဇင်ဘာလ ၂၀၁၆ ခုနှစ်အထိဖြစ်သည်။

ဦးသဲရယ်မှာ ပြီးခဲ့သည့်ရွေးကောက်ပွဲ၌ လူမျိုးပေါင်းစုံဒီမိုကရေစီပါတီအနေဖြင့် ပြည့်သူ့လွှတ်တော် ဖရူဆိုမဲဆန္ဒနယ်အဖြစ် ဝင်ရောက်ယှဉ်ပြိုင်ခဲ့သည့်သူဖြစ်ပြီး လက်ရှိ ကရင်နီပြည် တောင်သူလယ်သမားသမဂ္ဂတွင် ဥက္ကဌအဖြစ် ဆောင်ရွက်နေသူဖြစ်သည်။

Comments

comments

Next Post

တစ်ရက်လျှင် ကျပ်သုံးသိန်းအရှုံးပေါ်နေသည့် လွိုင်ကော် မီးရထားရပ်နားဖွယ်ရှိနေ

Thu Dec 1 , 2016
ထျိုးမြာ ကယားပြည်နယ် လွိုင်ကော်မြို့မှ သာစည် ဘူတာသို့ ပြေးဆွဲနေသောမီးရထားမှာ တစ်ရက်လျှင် ကျပ်သုံးသိန်းခန့် အရှုံးပေါ်နေသောကြောင့် ရပ်နားရန်အခြေအနေရှိသည်ဟု လွိုင်ကော်ဘူတာရုံမှ ဒုတိယရုံပိုင် ဦးမင်းမင်းဦးက ပြောသည်။ “လက်ရှိမှာ အရှုံးပေါ်နေလို့ ရပ်လိုက်ဖို့အခြေအနေရှိတယ်။ တစ်ရက်တစ်ရက်ကို သုံးသိန်းလောက်ရှုံးတယ်။ ပြည်နယ်အစိုးရက ခွင့်ပြုရင် ဖြုတ်ဖို့ရှိတယ် ” ဟု ၎င်းကပြောသည်။ သာစည်အထိသာရောက်သည့် အမှတ် (၁၄၈)အစုံ လွိုင်ကော်- သာစည်မီးရထားသည် သွားလာသည့် ခရီးသည် မရှိတော့သဖြင့် အရှုံးပေါ်နေရခြင်းဖြစ်သည်။ “ ခရီးသည်တွေကမရှိဘူး။ တစ်ရက်ကို သုံးယောက်နှုန်းလောက်တောင်မရှိဘူး။ လမ်းစရိတ်ပြတ်တဲ့သူတွေပဲ လာစီးတယ် ”ဟု ဦးမင်းမင်းဦးကပြောသည်။ ပြည်နယ်အစိုးရအနေနှင့် ရပ်ရန်ခွင့်ပြုပါက ရုံးချုပ်အနေနှင့် ရပ်စဲထားရန်ရှိသော်လည်း ဝန်ထမ်းများ သွားရေးလာရေး အဆင်ပြေစေရန်နှင့် စက်ပစ္စည်းအင်္ဂါရပ်နှင့်အညီရှိစေရန်အတွက် […]