ရပ်/ကျေး အုပ်ချုပ်ရေးမှူးများကို စနစ်တကျရွေးချယ်နိုင်ရေး

လက်ရှိ တာဝန် ထမ်းဆောင်နေသော ရပ်ကျေးအုပ်ချုပ်ရေးမှူးများသည် ၂၀၁၆ ဇန်နဝါရီလက ရွေးချယ်ခံထားရသူများဖြစ်ပြီး တာဝန် ထမ်းဆောင်ခဲ့သည့် ကာလမှာ လပေါင်း ၂ဝ ခန့်သာ ရှိတော့မည်။

မြန်မာတစ်နိုင်ငံလုံးရှိ ပြည်နယ်နှင့် တိုင်းဒေသကြီးရှိ ခရိုင်ပေါင်းမှာ ၆၆ ခု၊ မြို့နယ်ပေါင်းမှာ ၃၇၂၊ ရပ်ကွက်ပေါင်းမှာ ၂၈၂၇၊ ကျေးရွာပေါင်း ၆၄၈၅၃၊ ကျေးရွာအုပ်စုပေါင်းမှာ ၁၃၇၀၈ ရှိသည်။

ရပ်ကွက် သို့မဟုတ် ကျေးရွာအုပ်စု အုပ်ချုပ်ရေး ဥပဒေ တတိယအကြိမ် ပြင်ဆင်သည့် ဥပဒေကို ၂၀၁၆ ခုနှစ် ဒီဇင်ဘာလ ၂ ရက်တွင် ပြည်ထောင်စုလွှတ်တော်က ပြဋ္ဌာန်းခဲ့သည်။

ထိုဥပဒေတွင် အုပ်ချုပ်ရေးမှူးသည် သင့်တင့်သော ပညာအရည်အချင်းရှိသူဖြစ်ခြင်းနှင့် စားဝတ်နေရေး ဖူလုံမှုရှိသူဖြစ်ခြင်း ဆိုသည့်အချက် ၂ ချက်ကို ပယ်ဖျက်ခဲ့သည်။

ရပ်ကွက်၊ ကျေးရွာအတွင်း တစ်ဆက်တည်းနေ အနည်းဆုံး ၁ဝ နှစ် နေထိုင်သူဖြစ်ခြင်းအစား ၅ နှစ်နေထိုင်သူဟု ပြောင်းလဲသတ်မှတ်ခဲ့သည်။

ကျန်းမာရေး ကောင်းမွန်ပြီး ပေးအပ်သည့်တာဝန်ကို ထမ်းဆောင်နိုင်စွမ်းရှိသူဖြစ်ခြင်းဆိုသည်ကို ပေးအပ်သည့်တာဝန်ကို ထမ်းဆောင်နိုင်သူဟူ၍ ပြင်ဆင်ခဲ့ပေသည်။

တတိယအကြိမ် ပြင်ဆင်ချက်တွင် ရပ်ကျေးအုပ်ချုပ်ရေးမှူး၏ သက်တမ်းမှာ နိုင်ငံတော်သမ္မတ၏ ရာထူးသက်တမ်းအတိုင်း ဖြစ်သည်ဟု ဖော်ပြထားသည်။

၂၀၁ရ ရပ်ကျေးအုပ်ချုပ်ရေးမှူး ရွေးကောက်ပွဲကို နိုဝင်ဘာလ ၁ဝ ရက်မှ ဒီဇင်ဘာလ ၁ဝ ရက်အထိ တစ်လအတွင်း ကျင်းပရန် အစိုးရက ညွှန်ကြားထားသည်။

ကိုယ်ရွေးချယ်သည့် အုပ်ချုပ်ရေးမှူးသည် (၁) အကျင့် စာရိတ္တ ကောင်းသူဖြစ်ရပါမည်၊ (၂) ဒီမိုကရေစီဝါဒကို လိုလားပြီး ဝေဖန်ခံနိုင်သူဖြစ်ရပါမည်၊ (၃) မတူကွဲပြားစွာ ရောပြွမ်းနေထိုင်သည့် ရပ်ကျေး မျိုးတွင် ဘာသာပေါင်းစုံ၊ လူမျိုးပေါင်းစုံနှင့် သဟဇာတဖြစ်သူ ဖြစ်ရပါ မည်၊ (၄) စာပေဗဟုသုတနှင့် ရင်းနှီးကျွမ်းဝင်သူဖြစ်ပြီး ပရဟိတ လူမှု ရေးစိတ်ဓာတ်ရှိသူ ဖြစ်ရပါမည်၊ (၅) လက်ရှိ ရပ်ကျေးအုပ်ချုပ်ရေးမှူး တာဝန်ကို ယူဆောင်နေသူဖြစ်ပါက ထိုသူသည် လူထုကြား ပြဿနာကြီးငယ် ပေါ်တိုင်း မိမိအစွမ်းအစနှင့်ပြေလည်အောင် မဖြေရှင်းဘဲ ရဲစခန်းနှင့် တရားရုံးကိုသာ အားကိုးပို့ဆောင်နေသူမျိုးကို မရွေးချယ်မိဖို့ အလွန် အရေးကြီးကြောင်း အသိပညာပေးသူများက လှုံ့ဆော်ထားသည်။

ရပ်ကွက်၊ ကျေးရွာ အုပ်ချုပ်ရေးမှူး ရာထူးသည် ပြည်ထဲရေး ဝန်ကြီးဌာနမှ ပေးအပ်သည့်လစာမှာ ၁၂၀,ဝ၀ဝ ကျပ်ဝန်းကျင်သာ ဖြစ်သည်။

ကန္တာရဝတီတိုင်း(မ်)