လူထုဆန္ဒရယူနိုင်မှ ဘိလပ်မြေစက်ရုံဆောက်ပါဟု ကယား ဝန်ကြီးချုပ်ပြော

ဒီးမော့ဆိုမြို့နယ်အတွင်းရှိ လယ်ခိုသာကျေးရွာ၌ ၂၀၁၈ ဧပြီလက ဘိလပ်မြေစက်ရုံစီမံကိန်းတည်ဆောက်ရန် လျာထားသည့် အနီးဆုံးကျေးရွာများမှ ဆန္ဒပြုပွဲများ ပြုလုပ်ခဲ့စဉ်(ဓါတ်ပုံ- Khun Steven)

ခူးစိုးရယ်ဦး

ဒေသခံလူထုများ၏ ခွင့်ပြုချက် သဘောထားဆန္ဒများ ရယူနိုင်ပါက ဘိလပ်မြေစက်ရုံစီမံကိန်းကို ရင်းနှီးမြှုပ်နှံခွင့်ပြုပေးမည်ဟု ကယားပြည်နယ်ဝန်ကြီးချုပ်က ပြောကြားသည်။

“ကျွန်တော်က ပြည်သူလောက် အာဏာမရှိဘူး၊ ပြည်သူသာ အာဏာအရှိဆုံး၊ ပြည်သူကိုသာ ရအောင် စည်းရုံးပါ။” ဟု ကယားပြည်နယ်ဝန်ကြီးချုပ် ဦးအယ်လ်ဖောင်းရှိုက ပြောသည်။

ကယားပြည်နယ် လွိုင်ကော်မြို့မှ ချိကယ်အုပ်စု ပကျဲကျေးရွာအနီးတွင် ရင်းနှီးမြုပ်နှံမှုအတွက် ဘိလပ်မြေစက်ရုံတည်ဆောက်လိုသည့် ကုမ္ပဏီနှင့် ပြည်နယ်အစိုးရအဖွဲ့တို့ ဇွန်လ ၂၁ ရက်နေ့က ကယားပြည်နယ်အစိုးရရုံးတွင် ဆွေးနွေးစဉ် ၎င်းက ပြောကြားခဲ့သည်။

ကယားပြည်နယ် ချိကယ်ကျေးရွာတွင် အကောင်အထည်ဖေါ်ရန် လျာထားသည့် ဘိလပ်မြေစက်ရုံစီမံကိန်းအား ရင်းနှီးမြှုပ်နှံ ခွင့်ပြုပေးနိုင်ရန် ကုမ္ပဏီက ပြည်နယ်အစိုးရထံ တောင်းဆိုခဲ့ခြင်းဖြစ်သည်။

ရည်မှန်းချက်၊ ရည်ရွယ်ချက်၊ စည်းမျဉ်းစည်းကမ်း၊ လုပ်ထုုံးလုပ်နည်းများကို တာဝန်ရှိသူများက သိရှိလိုက်နာမှုရှိမှ အကြီးစားရင်းနှီးမြှုပ်နှံမှုများကို အကောင်အထည်ဖေါ်ရန် ဝန်ကြီးချုပ်က တိုက်တွန်းထားသည်။

ဘိလပ်မြေစက်ရုံ ထူထောင်ပြီးလျှင် ပြည်သူလူထုအတွက် ရေ ၊ မီး ၊ လမ်း ၊ ကျန်းမာရေး၊ ပညာရေး ၊ စီးပွားရေးစသည့်ကို ကူညီဆောင်ရွက်ပေးသွားမည်ဟု ကုမ္ပဏီက အဆိုပြုကမ်းလှမ်းသည်။

ဘိလပ်မြေစက်ရုံစီမံကိန်းကို လက်ခံ၊ မခံ ပြည်သူလူထု၏ ဆန္ဒသဘောထားကို စစ်တမ်းကောက်ယူရန် မကြာခင် စတင်မည်ဟု ကုမ္ပဏီက ဆိုသည်။

စစ်တမ်းအတွက် ကုမ္ပဏီနှင့် အစိုးရဌာနဆိုင်ရာများက ပူးပေါင်းဆောင်ရွက်ရန် စီစဉ်ထားသည်။

ဘိလပ်မြေစက်ရုံအတွက် အနီးအနားက ကျေးရွာများ၏ သဘောထားဆန္ဒကို ကောက်ယူကာ အသိပညာပေးခြင်းကို ကနဦး လုပ်စေချင်ကြောင်း ချိကယ်ကျေးရွာအုပ်စု အုပ်ချုပ်ရေးမှူး ဦးလူရယ်က ပြောသည်။

“ပြည်သူအတွက် ဘာအကျိုးရှိမလဲ ပြီးတော့ ပြည်သူတွေအတွက် အကျိုးယုတ်စေမဲ့အရာ ရှိမရှိ၊ ပြည်သူတွေအတွက် ပိုအကျိုးရှိလာမလားဆိုတာကို လေ့လာသုံးသပ်ရမယ်။”ဟု ၎င်းက ပြောသည်။

“ဒီစီမံကိန်းကို လုပ်မယ်ဆိုတာ မသိဘူး။ ဒီအစည်းအဝေးကို ခေါ်မှဘဲ သိတယ်။”ဟု ၎င်းက ထပ်မံပြောပါသည်။

ယခင်နှစ်များက လွိုင်ကော်တွင် ဘိလပ်မြေစက်ရုံရင်းနှီးမြှုပ်နှံရန် ကုမ္ပဏီများမှ တစ်ကြိမ်ထပ်မကသော ကြိုးပမ်းမှုများရှိခဲ့သော်လည်း ဒေသခံအချို့နှင့် အရပ်ဘက်အဖွဲ့အစည်းများ၏ ကန့်ကွက်မှုကြောင်း မအောင်မြင်ဖြစ်ခဲ့ရသည်။

ယမန်နှစ်ကလည်း ညီညာစွမ်းအားလုပ်ငန်းစုကုမ္ပဏီလီမိတက်( SPG- Square Power Group Company Limited )မှ ဘိလပ်မြေစက်ရုံ အကောင်အထည်ဖေါ်ရန် ပြန်လည်အစပြုခဲ့သော်လည်း ပွင့်လင်းမြင်သာမှုမရှိဟုဆိုကာ အရပ်ဘက်အဖွဲ့အစည်းများက ကန့်ကွက်ထားသည်။

Comments

comments

Next Post

တရားမဝင်ယမ်း လက်ဝယ်ထားရှိသူများကို ၂ လအတွင်း ဖေါ်ထုတ် တရားစွဲဆို

Tue Jun 26 , 2018
နော်ဒွေးအယ်ခူ ကယားပြည်နယ်၊ လွိုင်ကော်မြို့ နွားလဝိုးကျေးရွာ စက်မှုဇုန်ရှိ ယာဉ်ကြီးရပ်နားစခန်းသိုလှောင်ရုံအတွင်း တရားမဝင်ယမ်းနှင့် ဆက်စပ်ပစ္စည်းများ တွေ့ရှိခဲ့ရမှုနှင့် ပတ်သက်၍ ကွင်းဆက်တရားခံများကို အမှုဖွင့်တရားစွဲဆိုထားကြောင်း လွိုင်ကော်မြို့မရဲစခန်းမှ သိရသည်။ ဖြစ်စဉ်တွင်တရားခံဖြစ်သူ ဒေါ်မြမြစိမ်း(ခ)အားတုံအား လက်နက်ဥပဒေ ပုဒ်မ ၁၈(ဂ)/ ၁၉(စ)၊ လျူကြင်းအား လက်နက်ဥပဒေ ပုဒ်မ ၁၉(စ) ဖြင့်လည်းကောင်း၊ ယာဉ်မောင်း ခင်မောင်ဝင်းနှင့် ယာဉ်နောက်လိုက် သန်းထွေးအောင်တို့အား လက်နက်ဥပဒေ ပုဒ်မ ၁၉(ဃ) ဖြင့်လည်းကောင်း ဥပဒေနှင့်အညီ အမှုဖွင့်အရေးယူထားသည်။ လွိုင်ကော်စက်မှုဇုန်၌ ဇွန်လ(၃)ရက်နေ့တွင် တွေ့ရှိခဲ့ရသော တရားမဝင်ယမ်းနှင့်ဆက်စပ်ပစ္စည်းများနှင့် ပတ်သက်၍ ပါဝင်ပတ်သက်သည့် ကွင်းဆက်တရားခံများအား (၂)ပတ်အတွင်း ဖော်ထုတ်နိုင်ခဲ့သည်။ ဖမ်းဆီးရမိသည့် တရားမဝင်ယမ်းနှင့်ဆက်စပ်ပစ္စည်းများကို တရားခံ ဒေါ်မြမြစိမ်း(ခ)အားတုံသည် Online မှတဆင့် […]