ထျိုးမြာ
(၁၈)ကြိမ်မြောက်လွိုင်ကော်တက္ကသိုလ်ဘွဲ့နှင်းသဘင် ပေးအပ်ပွဲကို ၂၀၁ရ ခုနှစ် ဖေဖော်ဝါရီလကုန် (သို့မဟုတ်) မတ်လ,လဆန်းလောက်တွင် ကျင်းပမည်ဖြစ်သည်ဟု လွိုင်ကော်တက္ကသိုလ်မော်ကွန်းထိန်း ဦးမြင့်ဗိုလ်က ကန္တရဝတီတိုင်း(မ်)သို့ပြောသည်။
“ခန့်မှန်းထားတာက နှစ်လပိုင်းလကုန်(သို့)သုံးလပိုင်းလဆန်း အဲ့ဒီရက်တွေမှာလုပ်မယ်။ ပြီးတော့ ဆရာတို့ကယားဒေးပတ်ဝန်းကျင်ရက်ကို ရှောင်တဲ့အတွက်ကြောင့်မလို့ တစ်လပိုင်းကလုံးဝမဖြစ်နိုင်ဘူး။” ဟု မော်ကွန်းထိန်းက ပြောသည်။
လွိုင်ကော်တက္ကသိုလ်ဘွဲ့နှင်းသဘင်ကို ၂၀၁၁-၂၀၁၂ ခုနှစ် ပညာသင်နှစ်မှစပြီး လေးနှစ်ကြာ သင်ယူအောင်မြင်သွားသည့်သူများအတွက် ကျင်းပမည်ဖြစ်ပြီး ပြီးခဲ့သည့် ၂၀၁၅ခုနှစ်မှစကာ ဘွဲ့နှင်းသဘင်အချိန် ပြောင်းလဲခဲ့ခြင်းဖြစ်သည်။
ယခင်က ဒီဇင်ဘာလတွင် ဘွဲ့နှင်းသဘင်ကျင်းပလေ့ရှိသော်လည်း ၂၀၁၅ ခုနှစ်မှ စတင်ကာ ဘွဲ့နှင်းသဘင်ကျင်းပမည့် နေ့ကို ပြောင်းလဲကျင်းပခဲ့သည်။
ယခုနှစ်အောင်စာရင်းကို နိုင်ဝင်ဘာလ(၁၆)ရက်က ထုတ်ပြန်ကြေညာထားခဲ့ပြီး လွိုင်ကော်တက္ကသိုလ်၏ အောင်ချက်မှာ ပျမ်းမျှ ၉၆ ရာခိုင်နှုန်း ရှိသည်ဟု သိရသည်။
“ ဂုဏ်ထူးတန်းတွေအကုန်လုံးက ရာနှုန်းပြည့်အောင်ကြတယ်။ နောက်မဟာအရည်အချင်းစစ် သင်တန်းဆိုရင်လည်း ရာနှုန်းပြည့်အောင်ကြတယ်။ တစ်ချို့ဘွဲ့ကြိုတန်းတွေမှာကြတော့ မေဂျာပေါ်မှာမူတည်ပြီးတော့ အနိမ့်ဆုံး ကိုးဆယ်ရာခိုင်နှုန်းလောက်ထိ အောင်တယ်။ အမြင့်ဆုံးက တစ်ရာ,ရာခိုင်နုန်းလောက်ထိ အောင်တာကိုတွေ့ရတယ် ” ဟု မော်ကွန်းထိန်းက ပြောသည်။
