သီးနှံများပေါ်တွင် နှစ်ရှည်ပင်လာရောက်စိုက်ပျိုးသည့်အတွက် သီးနှံပင်ပျက်စီး

လွိုင်ကော်မြို့နယ် ဒေါဘူးငံ (၅) မိုင်ရွာသားများ စိုက်ပျိုးထားသည့် ပြောင်းခင်း၊ ပဲစင်းငုံခင်းများပေါ်တွင် စစ်တပ်မှ မြေကျင်းများတူးပြီး နှစ်ရှည်ပင်များ လာရောက်စိုက်ပျိုးထားသဖြင့် ပြောင်းပင်များနှင့် ပဲစင်းငုံပင်များ ပျက်စီးဆုံးရှုံးမှုများ ရှိနေသည်ဟု ရွာသားများက ပြောဆိုခဲ့ကြသည်။

ဒေါဘူးငံ(၅)မိုင်ရွာသားများသည် မထေားခူကျေးရွာ အနောက်ဖက်ခြမ်းတွင် ၅ ဧကခန့် စိုက်ပျိုးထားခဲ့ကြပြီး အဆိုပါမြေမှာ    တပ်ပိုင်မြေနှင့် အနီးအနားရှိနေသည့် နေရာဖြစ်ကြောင်း ရွာသားများက ကန္တာရဝတီတိုင်း(မ်)သို့ ပြောသည်။

“တကယ်လို့ သူတို့က ကြိုပြောမယ်ဆိုရင် ကျနော်တို့က မလုပ်လို့လည်းရပါတယ်။ ဒါပေမယ့် ရှိနေပြီးမှ လုပ်စားရတဲ့ ပြည်သူလူထု တောင်သူတွေကလည်း မရှိမဲ့ရှိမဲ့ ဝမ်းစာ အသက်မွေးဝမ်းကြောင်းက ဒါပဲရှိတယ်။” ဖျက်ဆီးခံရသည့် သီးနှံပင်များ၏   တန်ဖိုးနစ်နာကြေးကိုသာ ပြန်လည်ရလိုကြောင်း ဒေါဘူးငံ/(၅)မိုင်ရွာမှ ဦးစရီးလိုက ပြောသည်။

ယင်းအဖြစ်အပျက်အတွက် နစ်နာခဲ့သည့် တောင်သူများနှင့်အတူ ကျေးရွာအုပ်ချုပ်ရေးမှူးများမှ စုပေါင်းလက်မှတ်ထိုးပြီး         ကယားပြည် စိုက်ပျိုးရေးနှင့် မွေးမြူရေးဝန်ကြီးသို့ အသနားခံစာပေးပို့ထားကြောင်း သိရသည်။

ဒေသကွပ်ကဲမှုစစ်ဌာနချုပ်(ဒ.က.စ)(လွိုင်ကော်)သို့ သီးစားခ ပြန်လည်ပေးသွင်းပြီး စစ်တပ်မြေဧရိယာအတွင်းသို့ တောင်သူများမှ လွန်ခဲ့သည့် ၃ နှစ်အထိ ဝင်ရောက် စိုက်ပျိုးလုပ်ကိုင်ခြင်းများ ရှိခဲ့သော်လည်း နောက်ပိုင်းနှစ်များတွင် တောင်သူများ        ဝင်ရောက်လုပ်ကိုင် စိုက်ပျိုးခြင်းများမရှိတော့ကြောင်း သိရသည်။

ဒေါဘူးငံ /စံပြ (၅)မိုင်ရွာသားများအနေဖြင့် ယင်းစိုက်ပျိုးမြေများကို လွန်ခဲ့သည့် ၂၅ နှစ်ကတည်းက အစဉ်တဆက် စိုက်ပျိုးလာခဲ့ကြခြင်းဖြစ်ကြောင်းလည်း ရွာသားများ၏ ပြောပြချက်အရ သိရှိရသည်။ ယင်းကိစ္စနှင့် ပတ်သက်၍ ဒကစ(လွိုင်ကော်)သို့ ကန္တာရဝတီတိုင်း(မ်)မှ ဆက်သွယ်မေးမြန်းရန် ကြိုးစားခဲ့သော်လည်း တစ်စုံတစ်ရာ အကြောင်းပြန်ခဲ့ခြင်းမရှိခဲ့ပေ။

Comments

comments

Next Post

မူးယစ်ဆေးဝါးတိုက်ဖျက်ရေး ခိုင်မာသည့်ငြိမ်းချမ်းရေးအပေါ်မူတည်နေ

Mon Sep 19 , 2016
တစ်နိုင်ငံလုံးအတိုင်းအတာဖြင့် မူးယစ်ဆေးဝါးတိုက်ဖျက်ရေးလုပ်ငန်းထိရောက်အောင် မြင်မှုရှိရန်မှာ နိုင်ငံရေးဆွေးနွေးမှု နှင့် ခိုင်မာသည့်ငြိမ်းချမ်းရေးအပေါ်တွင်လည်း မူတည်နေသည်ဟု ညီညွတ်သောတိုင်းရင်းသားများ ဖက်ဒရယ်ကောင်စီ UNFC ဒုုတိယဥက္ကဋ္ဌနိုင်ဟံသာက ပြောသည်။ “နိုင်ငံရေးအရ ခိုင်မာတဲ့လမ်းစဉ်မရှိသေးတဲ့အတွက် တစ်ဖက်က ဘယ်သူမှ မလုပ်ချင်ကြဘူး။ များသောအားဖြင့်ဒေသခံပြည်သူ့စစ်တွေက အကျိုးစီးပွားတွေရှိတယ်။ ဒါတွေကလည်းပြောရရင် အစိုးရကဖွဲ့ထားတဲ့ အင်အားစုတွေပဲ တစ်ဖက်ကတိုက်နေရတဲ့အင်အားစုကလည်းတချို့က ဝင်ငွေရဖို့လုပ်နေရင်လည်းလုပ်နေမှာပဲ၊ နှစ်ဖက်စလုံးညှိရမှာပါပဲ။ ခိုင်မာတဲ့ငြိမ်းချမ်းရေးမရသမျှတော့ မူးယစ်ဆေးဝါးတိုက်ဖျက်လို့မရနိုင်သေးဘူး။” ဟု ၎င်းက ပြောသည်။ မူးယစ်ဆေးဝါးကိစ္စရပ်များမှာ နိုင်ငံတဝန်းလုံးမှ လူငယ်များ၏ ပြဿနာဖြစ်သည့်အတွက် လူငယ်များပူးပေါင်းဆောင်ရွက်ပြီး မိမိ၏ အနာဂတ်လမ်းကြောင်းကိုရွေးခြယ်သင့်သည်ဟု ကရင်နီအမျိုးသားတိုးတက်ရေးပါတီ KNPP က ဒုဥက္ကဌ ခူးဦးရယ်က ပြောသည်။ “ကျယ်ကျယ်ပြန့်ပြန့်လှုပ်ရှားနေတာလူငယ်တွေဖြစ်တယ်။ များတယ်လို့ပြောလိုက်တာကလည်း အပြစ်ပြောတာတော့မဟုတ်ဘူး တကယ်တန်းအဓိကကျတဲ့သူတွေအတွက် ကျနော်တို့အဓိကပြောရမယ့်ပုံစံဖြစ်ပါတယ်။ ဒါပေမယ့် ပျက်စီးနေတာက […]