ဟိုယာဒေသတွင် ခရီးသွားလုပ်ငန်းနှင့် ကုန်စည်ဝန်ဆောင်မှု ဒေသတွင်းကုမ္ပဏီ ၁ ခု ရင်းနှီးမြှုပ်နှံမည်

ဟိုယာဒေသ တစ်နေရာအား တွေ့ရစဉ် (ဓါတ်ပုံ-စိုင်းလင်းလင်းဦး)

ခူးစိုးရယ်ဦး

ကယားပြည်နယ်ရင်းနှီးမြှုပ်နှံမှုဖိုရမ် ကျင်းပပြီးနောက်ပိုင်း ယိုယာဒေသတွင် ခရီးသွားလုပ်ငန်းနှင့် ကုန်စည်ဝန်ဆောင်မှုပေးရန် ဒေသတွင်းကုမ္ပဏီ ၁ ခုက ပြည်နယ်အစိုးရထံ အဆိုပြုတင်ပြထားကြောင်း ကယားပြည်နယ်သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဦးတီရယ်က ပြောသည်။

ရင်းနှီးမြှုပ်နှံမည့် နေရာသို့ ဆွတ်ပိုင်ကုမ္ပဏီနှင့်အတူ အစိုးရဌာနဆိုင်ရာများက လာမည့် ဇွန်လ ဒုတိယအပတ်မှစ၍ ကွင်းဆင်းစစ်ဆေးဆောင်ရွက်ရန် ရှိနေသည်။

ဒေသခံလူထုနှင့် ညှိနှိုင်းကာ လုပ်ငန်းရင်းနှီးမြှုပ်နှံမည့် နေရာသို့ ခွင့်ပြုချက်များ တောင်းခံရန် စီစဉ်နေပြီဖြစ်သည်။

ဟိုယာတိုးချဲ့မြေပေါ်တွင် မြို့နယ်စည်ပင်သာယာရေး ဈေးနှင့် ဈေးအဝင်လမ်း (၂)မိုင်၊ အဝေးပြေးကားရပ်နားစခန်းနှင့်၊ ကုန်သိုလှောင်ရုံ၊ ကုန်စည်ဒိုင်စခန်း၊ တန်ဖိုးနည်းအိမ်ရာ ဆောက်လုပ်ရေးလုပ်ငန်းများ၊ ဖရူဆိုမြို့ မော်သီဒိုရွာအနီးရှိ ထီးဖရူးနူးသဘာဝ လှိုက်ဂူတွင် သဘာဝ ခရီးသွားနှင့် အပန်းဖြေစခန်း၊ ဆင်ဖြူတောင်ပေါ်တွင် သဘာဝခရီးသွားနှင့် ရှုမျှော်ခင်းကြည့်ရှုစခန်း စသည့် လုပ်ငန်းများတွင် ရင်းနှီးမြှုပ်နှံရန် ကုမ္ပဏီက အဆိုပြုထားသည်။

ယမန်နှစ်များက ဆွတ်ပိုင်ကုမ္ပဏီမှ ယင်းကဲ့သို့ ရင်းနှီးမြုပ်နှံရန် ကမ်းလှမ်းခဲ့သော်လည်း ပွင့်လင်းမြင်သာမှုမရှိဟုဆိုကာ ဟိုယာဒေသခံများ၏ ကန့်ကွက်မှုကြောင့် အထမမြောက်ခဲ့ပေ။

ယခုတစ်ကြိမ် ရင်းနှီးမြှုပ်နှံမှုသည် အစိုးရ၏ ခွင့်ပြုဖြင့် လုပ်ကိုင်မည်ဖြစ်၍ ကန့်ကွက်ခြင်းမပြုရန် ကယားပြည်နယ် စီမံကိန်းနှင့် ဘဏ္ဍာရေးဝန်ကြီး ဦးမော်မော်က တိုက်တွန်းထားကြောင်း ဌာနေပြည်သူ့စစ်၏ ဒေန္တရအုပ်ချုပ်ရေးမှူး ဦးမိုင်ကယ်က ပြောသည်။

“သူတို့ ဘယ်လို လုပ်မယ် ဘယ်ချိန် လုပ်မလဲဆိုတာ ဘာမှ မပြောသေးဘူး။”ဟု ၎င်းက ပြောသည်။

ဒေသခံအကြား အကျေအလည်ဆွေးနွေးညှိနှိုင်းပြီးမှသာ အဆိုပါ ရင်းနှီးမြှုပ်နှံမှုအား ခွင့်ပြုနိုင်ရေး ဆုံးဖြတ်ချက်အား အတည်ပြုနိုင်မည်ဟု ၎င်းက ပြောသည်။

ပြည်နယ်အစိုးရကမူ ဒေသခံတိုင်းရင်းသားများ
အား ရင်းနှီးမြှုပ်နှံမှု ဝင်ရောက်လာသည်နှင့်တပြိုင်တည်း အသိပညာပေးခြင်းကို ဦးစွာလုပ်ဆောင်ပေးမည်ဟု ဆိုထားသည်။

ယင်းရင်းနှီးမြှုပ်မှုအစီအစဉ်သည် ဒေသခံပြည်သူများထံ ဖွံ့ဖြိုးမှုအတွက် အကျိုးသက်ရောက်မှုများ ရရှိလာလိမ့်မည်ဟု ဝန်ကြီးဦးမော်မော်က ပြောကြားထားသည်။

Comments

comments

Next Post

နိုင်ငံတကာ၏ အပစ်အခတ်ရပ်စဲရေးအပေါ် လေ့လာစောင့်ကြည့်မှု အထောက်အပံ့များ

Thu Jun 14 , 2018
ခူးကြူးဖဲကေး(ကရင်နီအမျိုးသား)ရေးသားသည်။ (အာချေး(အင်ဒိုနီရှား)နိုင်ငံ၏ အခြေအနေများကို လေ့လာခြင်း) ငြိမ်းချမ်းရေးဖြစ်စဉ်တွင် လိုအပ်သော အခန်းကဏ္ဍများကို ဖြည့်ဆည်းရာ၌ အဓိကကျသော အချက်သည် အမျိုးသားပြန်လည်သင့်မြတ်ရေးနှင့် တရားဥပဒေစိုးမိုးရေး ဖြစ်ပါသည်။ မြန်မာနိုင်ငံ၏ ငြိမ်းချမ်းရေးဖြစ်စဉ်၌ လက်မှတ်ထိုုးရေးဖိအားပေးယုံမျှဖြင့် ထိရောက်မှုမရှိသေးသည်ကို သိပ်မဝေးလွန်လှတဲ့ သမိုင်းဆိုင်ရာ ငြိမ်းချမ်းရေးစာချုပ်များက သက်သေထူလျှက်ရှိသည်။ ငြိမ်းချမ်းရေးကဏ္ဍ အားကောင်းလာစေရန်အတွက် လိုအပ်သော ရေခံမြေခံအကြောင်းအရင်းမှာ ယုံကြည်မှု၊ ဆက်ဆံရေးအားကောင်းမှု၊ လိုအပ်သော အမျိုးသားတန်းတူရေးရရှိရေးနှင့် အာမခံချက်ရှိသည့် နိုင်ငံရေးဆိုင်ရာ ကတိကဝတ်များပေါ်ထွန်းလာရေးဖြစ်သည်။ အဘယ်ကြောင့်ဆိုသော် မြန်မာနိုင်ငံရေးလှုပ်ရှားမှုသည် အမျိုးသားရေးတန်းတူရေးအတွက် လက်နက်ကိုင်တော်လှန်ရတဲ့ အခြေအနေများကြောင့် ဖြစ်လေသည်။ ထိုအချင်းအရာကို လေ့လာရန်အင်မတန်မှ အရေးကြီးလေသည်။ ထိုကြောင့် အင်ဒိုနီရှားနိုင်ငံ၏ ဖြေရှင်းခဲ့ရပုံနဲ့ နည်းပညာအထောက်အကူပြုမှုများ၊ လူထုကာကွယ်ရေးအစိတ်အပိုင်းများ၊ ကာကွယ်ရေးနှင့် လုံခြုံရေးဆိ်ုင်ရာ သုံးသပ်ချက်စာတမ်းများ၊ နှစ်ဖက်တပ် […]

ဆက်စပ်သတင်းများ