spot_img
Friday, December 9, 2022
spot_img

အစဉ်အလာမပြတ် ကယားရိုးရာ အဲဒိုပေါ်မှီ(ခေါ်) ဒီးကူပွဲ ပြုလုပ်

spot_imgspot_imgspot_imgspot_img

CJ (ကန္တာရဝတီတိုင်း(မ်))

ဖရူဆိုမြို့နယ် အနောက်ဘက် စစ်ဘေးရှောင် တစ်နေရာမှာ နှစ်စဉ် အစဉ်အလာမပြတ် ကျင်းပလာခဲ့ကြတဲ့ ကယားရိုးရာ အဲဒိုပေါ်မီ (ခေါ်) ဒီးကူပွဲကို စက်တင်ဘာလ ၂၅ ရက်နေ့က အကျဉ်းချုံး ကျင်းပပြုလုပ်ခဲ့ပါတယ်။

“ကျမတို့က ဒီရိုးရာကို ပယ်ဖျက်လို့မရတဲ့ အတွက်ကြောင့်ပေါ့နော။ ကျမတို့ အဓိက တန်ဖိုးထားတဲ့ အရာမလို့ ဘယ်လိုပဲ ကြုံရပါစေ ဒီရိုးရာကို ရအောင်လုပ်လိုက်တယ်” လို့ ဒေသခံအမျိုးသမီးတစ်ဦးက ပြောပါတယ်။

နှစ်စဥ် နှစ်တိုင်း ကယားရိုးရာ အဲဒိုပေါ်မီ ပွဲကို သြဂုတ်၊ စက်တင်ဘာလအတွင်း ကျေးရွာတွေမှာ ခမ်းခမ်းနားနား ကျင်းပပြုလုပ်လေ့ရှိပေမယ့် အာဏာသိမ်းပြီးနောက်ပိုင်း ဒေသတွင်းတိုက်ပွဲတွေကြောင့် ဒေသခံတွေဟာ စစ်ရှောင်ကြရပြီး ရောက်ရာအရပ်မှာ အကျဉ်းချုံးသာ ပြုလုပ်ရပါတော့တယ်။

“ဒီးကူ တစ်ပင်ကို ၅ ရွက်ကနေ ၃ ရွက်ခူးရပါတယ်။ အနည်းဆုံးတော့ နှစ်ရွက်ပေါ့၊ တစ်ပင်ထဲကို အများကြီးခူးလိုက်တဲ့ ဓလေ့မရှိဘူး အရွက်လှရင်တော့ ၅ ရွက်အထိ ခူးလို့ရတယ်ပေါ့၊ ဘာကြောင့် ဒီလိုခူးရလဲဆိုတော့ ရိုးရာတစ်ခုလိုလဲ ဖြစ်တယ်၊ ကျနော် ကိုယ်တိုင်ခူးရင်တော့ အနည်းဆုံး ၁ ရွက် ၃ ရွက် ၅ ရွက် မဂဏန်းနဲ့ သွားရတဲ့ တစ်ဘောမျိုးပေါ့နော”လို့ စစ်ရှောင်ရပ်မိရပ်ဖ အမျိုးသားတစ်ဦးက ပြောပါတယ်။

အာဏာသိမ်းမှုမတိုင်ခင် မြို့နယ်အလိုက် ကျေးရွာအလိုက် ရိုးရာကို အများသိရှိလာအောင် ခမ်းခမ်းနားနားကျင်းပခဲ့ကြပေမယ့် လက်ရှိချိန်မှာတော့ မကျင်းပနိုင်ကြတော့ပါဘူး။

တိုက်ပွဲကလည်း မကြာခဏဖြစ်ပွားနေတဲ့အတွက် ပွဲကျင်းပတဲ့အချိန်မှာလည်း စိုးရိမ်မှုနဲ့ပြုလုပ်ခဲ့ရပြီး ရပ်နီးရပ်ဝေးက အသိမိတ်ဆွေ၊ ဆွေမျိုးတွေကို ဖိတ်ခေါ်ခြင်းမပြုကြတော့ဘဲ ရပ်ရွာအတွင်း အကျဉ်းချုံးပြုလုပ်ကြသလို စစ်ရှောင်းစခန်းတွေမှာလည်း ရိုးရာမပြတ်အောင် ထိန်းသိမ်းတဲ့အနေနဲ့ ဒီးကူပွဲကို ကျင်းပနေကြတာဖြစ်ပါတယ်။

Related Stories