လင်းသန့်
တိရိစာ္ဆန်အစာထုတ်စက်ရုံများက ကုန်ကြမ်းပြောင်းဆံများကို ပြည်ပမှ တင်သွင်းမည့် အစီအစဉ်အား ပြောင်းစိုက်တောင်သူများက ကန့်ကွက်နေကြသည်။
ယခုနှစ် ပြည်တွင်းဈေးကွက်၌ စံချိန်တင်ဈေးမြောက်နေသော ပြောင်းများအစား ယင်းထက် ကုန်ကျစရိတ် ပိုမိုသက်သာသည့် နိုင်ငံခြားပြောင်းများကို ဝယ်ယူရန် မြန်မာနိုင်ငံရှိ တိရိစာ္ဆန်အစာထုတ်စက်ရုံများက စီစဉ်နေသည်။
ပြောင်းများကို ပြည်ပမှ တင်သွင်းလာပါက ပြည်တွင်းပြောင်းဈေး ကျဆင်းသွားနိုင်သဖြင့် ပြောင်းလုပ်ကိုင်သူများက ကန့်ကွက်သည်။ နောက်ဆက်တွဲအနေဖြင့် တောင်သူများက လာမည့်နှစ် ပြောင်းစိုက်ပျိုးရန် အယုံအကြည်မရှိတော့မည်ကိုလည်း စိုးရိမ်မှုများ ရှိနေသည်။
ယခုလအတွင်း မြန်မာ့ပြောင်းဆံများက စံချိန်တင်ဈေးမြှင့်နေပြီး ၁ ပိဿာ ကျပ် ၅၆ဝ ကျော်အထိ ဈေးပေါက်သည်။ အစာထုတ်လုပ်သူများက ပြည်ပပြောင်းကို ဝယ်ယူမည်ဆိုပါက ယင်းထက် ဈေးသက်သာသော ၅၁ဝ ကျပ်သာ ကျသင့်မည်ဟု သိရသည်။
ပြောင်းဈေးကျဆင်းသွားနိုင်သည့် အလားအလာများကြောင့် လာမည့်နှစ် ပြောင်းစိုက်ရာသီ၌ တောင်သူများကို သက်ရောက်မှုရှိနိုင်ကြောင်း မြန်မာနိုင်ငံပြောင်းစိုက်ပျိုးထုတ်လုပ်သူများအသင်း၏ ကယားပြည်နယ်တာဝန်ခံ ဦးမြင့်မောင်က ပြောသည်။
“သူတို့ နိုင်ငံခြားကနေ သွင်းမယ်ဆိုရင် ပြည်တွင်းက ပြောင်းတွေ ဈေးထိုးကျကုန်မယ်။ အခုက လက်ကျန်ပြောင်းက သိပ်မရှိတော့ပေမယ့် လာမည့်နှစ် ပြောင်းစိုက်ဖို့ တောင်သူတွေ စဉ်းစားရ အကြပ်အတည်းဖြစ်တယ်။ အခုက ဒီနှစ်ပဲ ဈေးကောင်းခါစရှိသေးတယ် နောက်နှစ် တောင်သူတွေ စိုက်ဖို့ ဇဝေဇဝါဖြစ်ကုန်မယ်”ဟု ၎င်းက ပြောသည်။
ကယားပြည်နယ် စားသုံးရေးရာဦးစီးဌာန၏ စာရင်းအရ ကယားပြည်တွင် ယခုနှစ် ပြောင်းတင်ပို့မှု စံချိန်တင်ခဲ့သည်။ မတ်လ ဒုတိယပတ်အရောက်တွင် ပြောင်းတန်ချိန် ၂၇၀၀ဝ ကျော် တင်ပို့နိုင်ခဲ့ကာ ပို့ကုန်တန်ဖိုးစုစုပေါင်း ကျပ်သန်း ၇၇၂၂ သန်းအထိ ရရှိခဲ့သည်။
