အမျိုးသမီးအဖွဲ့များမှ ပြုလုပ်သည့် အော်ဂဲနစ်အစားအစာများ ဈေးကွက်ထိုးဖောက်နိုင်ရန် ဆန္ဒရှိ

ကရင်နီသူ

ကယားပြည်နယ်တွင် အော်ဂဲနစ်စိုက်ပျိုးရေးစနစ်ကို ဈေးကွက်ချိတ်ဆက်နိုင်ရန် ဩဂုတ်လ ၁၄ရက်နေ့၌ လွိုင်ကော်မြို့ စေတမန်ဗဟိုကျောင်းတွင် အလုပ်ရုံဆွေးနွေးပွဲတစ်ရပ် ကျင်းပပြုလုပ်ခဲ့သည်။

ဆွေးနွေးပွဲတွင် လွိုင်ကော်မြို့မှဒေသခံများနှင့် ဒီးမော့ဆိုမြို့မှ ဒေသခံများက ၎င်းတို့စိုက်ပျိုးရေးတွင် နည်းပညာလိုအပ်ချက်များကို လာရောက်ဆွေးနွေးခဲ့ကြသည်။

ပြည်နယ်အတွင်းရှိ အရပ်ဖက်လူမှုအဖွဲ့အစည်းများ၊ အမျိုးသမီးအဖွဲ့အစည်းများမှ ၎င်းတို့အဖွဲ့တွင် လုပ်ဆောင်ထားသည့် အိမ်တွင်းမှုလုပ်ငန်းများကို ဈေးကွက်တင်ရောင်းချနိုင်ရန်အတွက် ဌာနဆိုင်ရာသို့ တင်ပြဆွေးနွေးခဲ့သည်။

̏ အမျိုးသမီးအဖွဲ့အစည်းတွေ သရက်သီးယိုတွေ၊ သဘာဝဆပ်ပြာရည်တွေထုတ်တယ်၊ ဒါတွေကို အများပြည်သူတွေ သွားလာများတဲ့ ဥပမာ-လေဆိပ်လိုနေရာမျိုးတွေမှာ အော်ဂဲနစ်အစားအစာတွေ ရောင်းချဖို့၊ ပြီးတော့ အမျိုးသားပဲဖြစ်ဖြစ်၊ အမျိုးသမီးပဲဖြစ်ဖြစ် စိုက်ပျိုးတဲ့ အော်ဂဲနစ်အစားအစာတွေ အဲ့လိုနေရာမျိုးတွေမှာ ဈေးကွက်တင်ရောင်းချပေးဖို့၊ ပြီးတော့ ဆိုင်တွေမှာ ဈေးကွက်တင် ထိုးဖောက်နိုင်ဖို့ အချိတ်အဆက်လုပ်လို့မရဘူးလား ဆိုတာပေါ့နော˝ ဟု ကယန်းအမျိုးသမီး အစည်းအရုံး(KYWO)မှ မူအန်းဂျေလာက ပြောသည်။

၎င်းတို့အမျိုးသမီးအဖွဲ့အစည်းများမှ ကုန်များ၊ အော်ဂဲနစ်အစားအသောက်များကို ထုတ်လုပ်ပေးနိုင်သော်လည်း ဈေးကွက်အရ မထိုးဖောက်နိုင်သေးကြောင်း ၎င်းကပြောပါသည်။ ထို့ကြောင့် ထုတ်ကုန်များကို မိမိတို့မှ လုပ်ဆောင်ပေးမည်ဖြစ်ပြီး သက်ဆိုင်ရာ အစိုးရအဖွဲ့မှ ဈေးကွက်ထိုးဖောက်နိုင်ရန် ကူညီပေးရန် လိုကြောင်း သူမကတင်ပြခဲ့သည်။

ကယားပြည်နယ်စိုက်ပျိုးရေးဦးစီးဌာနမှ ပြည်နယ် ဒု/ဦးစီးမှူး ဦးအောင်ကြည်ဝင်းက သီးနှံစိုက်ပျိုးမှုများ အနည်းအကျဉ်းသာ လုပ်ပါကဈေးကွက်ထိုးဖောက်ရမည်မှာ အနည်းငယ်ခက်ခဲကြောင်း ပြောပါသည်။

̏ ကျွန်တော်တို့နိုင်ငံက ဆန်ကုန်ကြမ်း တရုတ်ကိုပို့တယ်၊ တရုတ်တွေကနေပြီးတော့ ကျွန်တော်တို့ကို မုန့်လေးတွေပို့တယ်၊ အရက်တွေ ချက်ပို့တယ်၊ ဒါတွေကုန်ချောထုတ်တဲ့သူတွေနဲ့ ချိတ်ဆက်ရတဲ့ဟာတွေပေါ့။ ဒီလိုလုပ်ရတဲ့သဘောရှိတယ်၊ သို့သော် အနည်းအကျဉ်းလုပ်တယ် ဆိုရင်တော့ ထိုးဖောက်ရတဲ့ သဘောရှိတယ်ပေါ့နော။˝ ဟု ၎င်းကပြောသည်။

ရှမ်းပြည်နယ် အောင်ပန်းမြို့၊ နောင်ကန်းတွင် အော်ဂဲနစ်စိုက်ပျိုးသည့် ကျောင်းရှိပြီး ၎င်းတို့ကျောင်းမှ ထွက်ရှိလာသည့် သီးနှံဟင်းသီးဟင်းရွက်များသည် ရောင်းအားကောင်းနေပြီး ရန်ကုန်မြို့တွင် အဓိကတင်ပို့ကြောင်း သိရသည်။

̏ ကယားပြည်နယ်မှာ ဟိုတယ်တွေ၊ နိုင်ငံခြားသားတွေ အရမ်းလာလည်ကြတယ်၊ နိုင်ငံခြားသားတွေက အော်ဂဲနစ်ကို ပိုကြိုက်ကြတယ်လေ ဒါကြောင့် ဒီလိုနေရာတွေမှာ အော်ဂဲနစ်ဈေးကွက် ရဲရဲကြီး တိုးနိုင်ဖို့လိုတယ် ˝ အော်ဂဲနစ်ဟင်းသီးဟင်းရွက်စိုက် ကျောင်းအုပ်ဆရာ ဦးစိုးအောင်က အကြံပြုသည်။

၎င်းတို့သင်တန်းကျောင်းတွင်လည်း အော်ဂဲနစ်စိုက်ပျိုးနည်းသင်တန်းများ စဉ်ဆက်မပြတ် ပို့ချလျှက်ရှိပြီး ကယားပြည်နယ်မှ သင်တန်းသားများ အများဆုံးလာရောက် တက်ရောက်နေကြောင်း ၎င်းကဆက်ပြောပါသည်။

ကယားပြည်နယ်တွင်လည်း အော်ဂဲနစ်စိုက်ပျိုးရေးသင်တန်းများ၊ သဘာဝမြေဩဇာပြုလုပ်သည့် သင်တန်းများကို စီမံကိန်းအလိုက် ပြုလုပ်ဆောင်ရွက်ပေးခဲ့သော်လည်း တောင်သူများမှ လက်တွေ့တွင် ပြန်လည်စမ်းသပ်ပြုလုပ်မှု အားနည်းနေကြောင်း အော်ဂဲနစ်စိုက်ပျိုးရေး စီမံကိန်းဒါရိုက်တာ ခွန်းဖရန်းစစ်က ပြောသည်။

̏ လူအယောက် ၅ဝလောက်မှာ အလွန်ဆုံးလက်တွေ့ပြန်လုပ်တာ ၃ယောက်လောက်ပဲရှိမယ်ထင်တယ်၊ သင်တန်းတော့တက်တယ်၊ ဒါပေမယ့် စိတ်မဝင်စားကြဘူးနဲ့တူပါတယ်၊ တောင်သူတွေက သဘာဝမြေဩဇာတွေ သုံးဖို့ တုံ့ဆိုင်းနေကြတယ်။ ˝ ဟု၎င်းကပြောပါသည်။
အော်ဂဲနစ် စိုက်ပျိုးရေး စီမံကိန်းလုပ်ဆောင်ရာတွင် နေရာတိုင်းတွင် ဓာတ်မြေဩဇာ ပေါပေါသီသီရှိနေခြင်းသည် ၎င်းတို့အတွက် ကြီးမားသောစိန်ခေါ်မှုတစ်ရပ် ဖြစ်နေကြောင်း ၎င်းကဆိုသည်။

တောင်သူများမှ အချိန်အခါအားလျော်စွာ Stakeholder များနှင့် တွေ့ဆုံကာ ဆွေးနွေးမှုများ ပြုလုပ်စေချင်ကြသည်။

̏နောက်ပိုင်းတောင်သူတွေနဲ့ ပိုပူးပေါင်းပြီး လုပ်စေချင်တယ်၊ ဒါမှ အော်ဂဲနစ်စိုက်ပျိုးရေး ပိုတိုးတက်လာမယ်၊ အခုက သူ့ဟာသူသွား၊ ကိုယ့်ဟာကိုယ်သွားဖြစ်နေတယ်၊ ပူးပေါင်းစေချင်ပါတယ် ˝ ဟု ကရင်နီပြည် တောင်သူလယ်သမား သမဂ္ဂမှ ဥက္ကဌခူးတူရယ်က အစိုးရဌာနသို့ တောင်းဆိုခဲ့ပါသည်။

မြန်မာနိုင်ငံရှိ ပြည်နယ်နှင့် တိုင်းများမှ ကယားပြည်နယ်နှင့် ချင်းပြည်နယ်သည် ဓာတ်မြေဩဇာသုံးစွဲနှုန်းမှာ နိမ့်နေသေးကြောင်း သိရှိရသည်။