မူအက်စတာ
ကယားပြည်နယ်ရှိ တောင်သူအများစုသည် ပြည်နယ်စိုက်ပျိုးစရိတ်ချေးငွေများ ချေးယူပြီး ဆန်စပါး၊ ပြောင်း၊ပဲ၊ နှမ်းစသည်တို့ စိုက်ပျိုးလျက်ရှိကြရာ ယခုနှစ်တွင် တောင်သူအများအပြား ပြောင်းများစိုက်ပျိုးကြသည့် တောင်သူများ ချေးငွေဆပ်နိုင်ရန် အခက်အခဲရှိသည်ဟု ပြောင်းစိုက်တောင်သူများက ပြောဆိုနေကြသည်။
ကယားပြည်နယ်မှ ပြောင်းစိုက်တောင်သူများသည် ရှမ်းပြည်တောင်ပိုင်းရှိ ရေဖြူကျေးရွာတွင် ပြောင်းအများအပြား သွားရောက်စိုက်ပျိုးကြသည့် ထီးသဲကလိုးကျေးရွာမှ မောင်မေဂျွန်က “ကျွန်တော်တို့ ဒီနှစ် ပြောင်းဖူးတစ်ခင်းလုံးစိုက်ထားတယ်၊ ဈေးကမရှိဘူး၊ ဒီပုံစံအတိုင်း ဆက်ဖြစ်နေမယ် ဆိုရင်တော့ အမတော်ကြေးပြန်ဆပ်နိုင်မှာ မဟုတ်ဘူး၊ ဘယ်လိုလုပ်ရမလဲ မသိပါဘူး” ဟု ပြောသည်။
သို့သော်ယခုချိန်ထိ ပြောင်းများကို သိုလှောင်ထားနေရဆဲဖြစ်သည်။ ချေးငွေကို ယခုလို သီးနှံပေါ်ချိန် တွင်ပြန်ဆပ်ရသည်ဟုသိရသည်။
တစ်ဖက်တွင်လည်း ချေးငွေပြန်ဆပ်ရမည့်အချိန်တွင် ချေးငွေမဆပ်သည့်တောင်သူများရှိပါက မြန်မာ့လယ်ယာဖွံ့ဖြိုးရေးဘဏ်မှ ကျေးရွာအုပ်ချုပ်ရေးမှူးထံသို့ အကြောင်းကြားစာပေးပို့ပြီး ပြန်လည်ဆပ်စေခြင်း၊ ရက်ကျော်လွန်နေပါက ဒဏ်ကြေးတပ်ခြင်းတို့ စသည့်အစီအစဉ်ရှိကြောင်း သိရသည်။
“ကယားပြည်နယ်က တောင်သူတွေက ချေးငွေတွေကို အချိန်မှန်ပြန်လာဆပ်ကြပါတယ်။ တောင်သူတွေက ရိုးသားကြတယ်၊ စည်းကမ်းရှိကြပါတယ်၊ အရင်နှစ်က ရာနှုန်းပြည့်ပြန်လာဆပ်ကြပါတယ် ဒီနှစ်လည်း ပြန်လာဆပ်နိုင်ကြမှာပါ” ဟု မြန်မာ့လယ်ယာဖွံ့ဖြိုးရေးဘဏ်မှ ပြည်နယ်မန်နေဂျာ ဦးကျော်သူရက ပြောသည်။
လယ်စိုက်တောင်သူအတွက် တစ်နှစ်အတွင်းချေးငွေမှာ တစ်ဧက(၁၅၀၀၀၀)-(တစ်သိန်းခွဲ)ချေးယူနိုင်ပြီး၊ ယာစိုက်တောင်သူများအတွက်မူ တစ်ဧကကို ၂သောင်းကျပ် ရရှိနိုင်သည်။
စိုက်ပျိုးစရိတ်ချေးငွေ ချေးယူနိုင်သည့် တောင်သူများမှာ ပုံစံ(၇) လယ်ယာမြေလုပ်ပိုင်ခွင့် ရှိသောတောင်သူများကသာ ချေးယူနိုင်ကြောင်း သိရသည်။ ယခုနှစ်အတွင်း ချေးငွေယူသော တောင်သူများ စုစုပေါင်းတောင်သူဦးရေ ငါးထောင်နှစ်ရာ့ငါးဆယ် ရှိသည်ဟု သိရသည်။
လွန်ခဲ့သော ဒီဇင်ဘာလတွင် ထိုက်သင့်သည့်ပြောင်းဈေးနှုန်းများ ရှိလာလိမ့်မည်ဟု ပြည်နယ်ပြောင်းအသင်း ဥက္ကဌမှ ဆိုထားသော်လည်း ယခုတွင် ပြောင်းဈေးမှာ ပိုမိုကျနေကြောင်း သိရှိရသည်။
