ကန္တာရဝတီတိုင်း(မ်)
ကရင်နီပြည် ဖားဆောင်းမြို့နယ် မော်ချီးဒေသက လိုလော်ထီးကျေးရွာကို စစ်ကောင်းစီကလေကြောင်းသုံး ဗုံးကြဲတိုက်ခိုက်ခဲ့ပြီး မိသားစုဝင် (၅) ဦးသေဆုံးခဲ့တယ်လို့ ကရင်နီပြည် ကြားကာလ အုပ်ချုပ်ရေးကောင်စီ(IEC) ရဲ့ အတွင်းေရးမှူး(၂) ဆရာဗညားက ကန္တာရဝတီတိုင်း(မ်) ကိုပြောပါတယ်။
ယမန်နေ့ ဇူလိုင်လ ၉ရက်နေ့မှာတိုက်ခိုက်ခဲ့တာဖြစ်ပြီး ပေါင်(၅၀၀)ဗုံးကိုအသုံး ပြုခဲ့တာပါ။ သေဆုံးသူ ၅ ဦးဟာ မိသားစုဝင်တွေဖြစ်ကြတယ်လို့ ဆိုပါတယ်။
“သိရသလောက်ကတော့ မိသားစုဝင်တစ်ခုတည်းလို့တော့ ပြောတာပေါ့နော်။ အဲ့လိုမျိုးသိထားပါတယ်။”လို့ ဆရာဗညားက ဆိုပါတယ်။
သေဆုံးခဲ့တဲ့ မိသားစုဝင်(၅) ဦးဟာ အသက်အရွယ်အားဖြင့် အသက်(၃)နှစ်အရွယ် အမျိုးသမီး တစ်ဦး၊ (၈) နှစ်အရွယ် အမျိုးသမီး တစ်ဦး၊ ၂၈ နှစ်အရွယ် အမျိုးသားတစ်ဦး နဲ့ အမျိုးသမီး တစ်ဦး၊ ၅၇ နှစ်အရွယ် အမျိုးသမီးတစ်ဦး စုစုပေါင်း ၅ ဦးဖြစ်တယ်လို့ ဆိုပါတယ်။
စစ်ကောင်စီရဲ့ ဗုံးကြဲ တိုက်ခိုက်မှုကြောင့် ၁၅ နှစ်အောက် ကလေး ၃ ဦးအပါအဝင် အမျိုးသား(၃) ဦးနဲ့ အမျိုးသမီး(၃) ဦးတို့လည်း ထိခိုက်ဒဏ်ရာရရှိခဲ့ပြီး အမျိုးသမီး တစ်ဦးမှာတော့ ဒဏ်ရာ ပြင်းထန်ကာ ကျန် ၅ ဦးမှာတော့ မစိုးရိမ်ရဘူးလို့ ဆရာဗညားဆီက နေ သိရပါတယ်။
ဒါ့အပြင် ပြည်သူ့ နေအိမ် (၆) လုံး၊ ဘုရားကျောင်း နဲ့ အသင်းတော်ရိပ်သာ ထိခိုက်ပျက်စီးခဲ့တယ်လို့ ဆိုပါတယ်။
ပြီးခဲ့တဲ့ ဇွန်လ ၂၅ ရက်နေ့မှာလည်း မော်ချီးဒေသကို စစ်ကောင်စီဗုံးကြဲတိုက်ခိုက်ခဲ့ပြီး အမျိုးသား (၈) ဦး သေဆုံးခဲ့ကာ ထိခိုက်ဒဏ်ရာရသူ များပြားခဲ့ပါတယ်။
တိုက်ပွဲဖြစ်ပွားခြင်းမရှိတဲ့ မော်ချီးဒေသမှာ စစ်ကောင်စီက လေကြောင်းတိုက်ခိုက်ပြုလုပ်တဲ့ အကြိမ်ရေဟာ လက်ရှိမှာ ၇ ကြိမ် ရှိနေပြီဖြစ်ပါတယ်။