COVID-19 သံသယလူနာ ကျန်းမာရေးအခြေအနေ ကောင်းမွန် ၊ ပိုးရှိမရှိအဖြေမသိရသေး

ကန္တရဝတီတိုင်းမ်

COVID-19 Case(37) နဲ့ ထိတွေ့ခဲ့ဖူးတဲ့ လွိုင်ကော်မြို့ ဒေါဥခူရပ်ကွက်နေ အမျိုးသမီးကို COVID-19 သံသယလူနာကို ဆေးစစ်ချက် ပိုးရှိမရှိအဖြေမသိရသေးကြောင်း၊ လက်ရှိမှာ ကျန်းမာလျက်ရှိကြောင်း ပြည်နယ်ကုသရေးနှင့် ပြည်သူ့ကျန်းမာရေးဦးစီးဌာနမှူး ဒေါက်တာဌေးလွင်က ဧပြီလ၁၅ ရက်နေ့က ပြောပါတယ်။

“နေကောင်းကျန်းမာလျက်ရှိပါတယ်။ ပိုးအဖြေတော့မရသေးပါဘူး။ လောလောဆယ်တော့ ကျန်းမာရေးက သူကော သူ့ပတ်ဝန်းကျင်က ခေါ်ထားတဲ့သူကိုကော နေကောင်းလျက်ရှိပါတယ်” လို့ ဒေါက်တာဌေးလွင်က ကန္တရဝတီတိုင်းမ် ကို ပြောပါတယ်။

အဆိုပါ ဒေါဥခူရပ်ကွက်နေ သံသယလူနာဖြစ်သူမှာ Case 37 နဲ့ ထိတွေ့မှုရှိကြောင်းကို ကျန်းမာရေးနှင့် အားကစားဝန်ကြီးဌာနက ထုတ်ပြန်ခဲ့တာကြောင့် ဧပြီလ ၁၃ ရက်နေ့ ညနေပိုင်းက ပြည်နယ်ကျန်းမာရေးဦးစီးဌာနကနေပြီး သွားရောက်ခေါ်ဆောင်ခဲ့ကာ လွိုင်ကော်ပြည်သူ့ဆေးရုံကြီး သီးခြားကုသဆောင်တွင် ထားရှိခဲ့တာဖြစ်ပါတယ်။

သံသယလူနာရဲ့ ဆေးစစ်ချက်ကို ဓါတ်ခွဲစစ်ဆေးနိုင်ဖို့ ဧပြီလ ၁၃ ရက်နေ့ ညမှာပဲ ရန်ကုန်အမျိုးသားဓတ်ခွဲခန်းသို့ ပေးပို့ခဲ့ပြီးဖြစ်ပါတယ်။

“လူနာကဖျားလည်းမဖျားဘူး အသက်ရှုမောကြပ်တဲ့လက္ခဏာလည်းမရှိဘူး ချောင်းဆိုးနှာချေတာလည်းမရှိဘူး။ ပိုးတွေ့တဲ့လူနာနဲ့ထိတွေ့တယ် တွေ့ဆုံခဲ့ဖူးတဲ့ ရာဇဝင်ရှိတယ်လေ။ အစ်မတို့က ဆေးစစ်ချက်အဖြေရဖို့ပို့ထားလိုက်ပြီ မနေ့ညတုန်းက(ဧပြီလ ၁၄ရက်) ညချင်းပဲ” လို့ လွိုင်ကော်ပြည်သူ့ဆေးရုံအုပ်ကြီး ဒေါက်တာခင်စန်းမြင့်က ဧပြီလ ၁၃ရက်နေ့က ပြောဆိုထားပါတယ်။

ဧပြီလ ၇ ရက်နေ့က သံသယလူနာအမျိုးသမီးနဲ့အတူ ရန်ကုန်မြို့ကနေ လွိုင်ကော်မြို့ကို ကားတစ်စီးတည်း အတူလိုက်ပါခဲ့တဲ့ ခဲအိုဖြစ်သူ၊ အစ်မဝမ်းကွဲအမျိုးသား၊ သူငယ်ချင်းမိန်းကလေးတစ်ဦး၊ ယာဉ်မောင်း စုစုပေါင်း ၅ ဦး အပါအဝင် ၎င်းတို့နဲ့ဆက်စပ်တဲ့ အတူနေ မိသားစုဝင် ၃၆ ဦးကိုလည်း သူနာပြုနှင့်သားဖွားသင်တန်းကျောင်းမှာ Facility Quarantine ထားရှိပြီး စောင့်ကြည့်စစ်ဆေးလျက်ရှိပါတယ်။

သံသယလူနာနေထိုင်တဲ့ ဒေါဥခူရှိနေအိမ်ပတ်လည်ကိုလည်း ပိုးသတ်ဆေးဖြန်းခြင်းများဆောင်ရွက်လျက်ရှိသလို နေအိမ်စောင့်ကြည့်ပေးဖို့လည်း ပြည်နယ်ကျန်းမာရေးမှူးက ရပ်ကွက်အုပ်ချုပ်ရေးမှူးကို မှာကြားထားတယ်လို့ ဆိုပါတယ်။

သံသယလူနာအမျိုးသမီးရဲ့ ဆေးစစ်ချက်တော့ လက်ရှိအချိန်ထိ ကျန်းမာရေးဌာနကနေ တရားဝင်ထုတ်ပြန်ထားခြင်းမရှိသေးပါဘူး။

ကယားပြည်နယ်အစိုးရအဖွဲ့ရုံး၏ လူမှုကွန်ယက်စာမျက်နှာအရ သံသယလူနာမှာ ကယားပြည်နယ်၊ လွိုင်ကော်မြို့၊ ဒေါဥခူရပ်ကွက်၊ အိမ်အမှတ် ခူ/၃၃၇ မှာနေထိုင်တဲ့ နော်ပစောထီးဝေ အသက် ၂၆ နှစ်ဖြစ်သူလို့ ပါရှိပါတယ်။

Comments

comments

Next Post

ဈေးရောင်းဝယ်ချိန်တွင် နှာခေါင်းစည်း (Mask) တပ်၍ ဈေးရောင်းဝယ်ကြရန် စည်ပင် မေတ္တာရပ်ခံ

Wed Apr 15 , 2020
ကန္တရဝတီတိုင်းမ် လွိုင်ကော်မြို့ရှိ ဈေးကြီးများတွင် COVID-19 ရောဂါ ထိန်းချုပ်ကာကွယ်ဖို့အတွက် ဈေးရောင်းသူများ၊ ဈေးဝယ်သူများအားလုံး နှာခေါင်းစည်း (Mask) တပ်၍ ရောင်းဝယ်ကြဖို့ မေတ္တာရပ်ခံထားတယ်လို့ လွိုင်ကော်မြို့ စည်ပင်သာယာရေးကော်မတီ အမှုဆောင်အရာရှိ ဦးသန်းထွန်းက ပြောပါတယ်။ “တနင်္လာနေ့ကတည်းက မိုက်နဲ့အော်တယ် မေတ္တာရပ်ခံတယ် တပ်တဲ့သူလည်းတပ်တယ် မတပ်တဲ့သူလည်းမတပ်ဘူး အဲလိုတော့ရှိတယ်ပေါ့နော ဈေးဝယ်သူကော ဈေးရောင်းသူကော။ ဒီနေ့ဈေးဆို မနေ့ကတည်းပေါ့ ဗီနိုင်းပေါ့ ကုန်ဈေးတန်းဖက်မှာလည်းကပ်တယ် ဈေးပတ်ချာလည်လည်း ကပ်ထားတယ် နှစ်ထပ်ဈေးမှာလည်းကပ်ထားတယ်။ အချို့ကတော့ နှာခေါင်းတပ်တာကိုတွေ့ရတာပေါ့နော အယောက်တိုင်း တပ်တာကိုတော့ မတွေ့သေးဘူးပေါ့နော” လို့ ဦးသန်းထွန်းကပြောပါတယ်။ စည်ပင်သာယာရေးကော်မတီအနေနဲ့ ဈေးအတွင်း Mask တပ်ပြီး ရောင်းဝယ်ကြဖို့ မေတ္တာရပ်ခံမှုကို လိုက်နာပေးဖို့ အနီးကပ်လိုက်ပြောနေသလိုဈေးပတ်လည်မှာလည်း Mask တပ်ပြီး […]

ဆက်စပ်သတင်းများ