spot_imgspot_imgspot_imgspot_img
Wednesday, April 24, 2024
spot_imgspot_imgspot_imgspot_img

KSCC မှာ သက်ဆိုင်ရာ အစုအဖွဲ့တွေ အားလုံး ပူးပေါင်းပါဝင်နိုင်ဖို့ ကြိုးပမ်းသွားမည်ဟုဆို

ကန္တာရဝတီတိုင်း(မ်)

ကရင်နီပြည်အတိုင်ပင်ခံကောင်စီ (KSCC) ဖွဲ့စည်းပြီး တစ်နှစ်ကျော်အကြာမှာ ပထမအကြိမ်ညီလာခံကို ကျင်းပနိုင်ခဲ့ပြီး ရှေ့လုပ်ငန်းစဉ်ထဲ တစ်ခုအပါအဝင်ဖြစ်တဲ့ KSCCမှာ သက်ဆိုင်ရာ အစုအဖွဲ့ (Stake holder) တွေ အားလုံး ပူးပေါင်းပါဝင်နိုင်ဖို့ ကြိုးပမ်းသွားမှာဖြစ်တယ်လို့ KSCC ဥက္ကဌ ဖြစ်တဲ့ ဦးအောင်ဆန်းမြင့်က ဆိုပါတယ်။

လက်ရှိ KSCC မှာ အစုအဖွဲ့ ကြီး ၄ဖွဲ့ အပြင် အဖွဲ့ အစည်း၆ ဖွဲ့ နဲ့ ဖွဲ့စည်းထားတာဖြစ်ပေမယ့် ကျန်တဲ့ အစုအဖွဲ့တွေကို ပါဝင်လာအောင် ကြိုးပမ်းသွားမယ်လို့ လည်းပြောပါတယ်။

“မပါဝင်နိုင်သေးတဲ့ နိုင်ငံရေးပါတီတွေ တိုင်းရင်းသားတော်လှန်ရေးလက်နက်ကိုင်အဖွဲ့အစည်းတွေ နောက်တခြား တစ်သီးပုဂ္ဂလပဲဖြစ်ဖြစ်ပေါ့နော။ အသိပညာရှင် အတတ်ပညာရှင် ဒါတွေအားလုံးကို ကျနော်တို့ KSCCထဲမှာ ပါဝင်လာနိုင်ရေး ကို ကျနော်တို့ ကြိုးပမ်းသွားဖို့ လုပ်ငန်းစဉ်ကြီးတစ်ခုကို ကျနော်တို့ က ထားထားတာရှိပါတယ်။ “ လို့ ဦးအောင်ဆန်းမြင့်က ပြောပါတယ်။

လက်ရှိ KSCCမှာဆိုရင် ကရင်နီအမျိုးသားတိုးတက်ရေးပါတီ(KNPP)၊ ကရင်နီအမျိုးသားများကာကွယ်ရေးတပ် (KNDF)၊ ကရင်နီပြည်နယ်ကြားကာလဥပဒေပြုရေးအဖွဲ့၊ ကရင်နီပြည်အမျိုးသမီးများအင်အားစု၊ ကရင်နီပြည်နယ်လူမျိုးစု လူငယ်အင်အားစု နဲ့ ကရင်နီပြည်နယ်အရပ်ဖက်အဖွဲ့အစည်း စတဲ့ အင်အားစု ၆ခု ပါဝင်ပါတယ်။

KSCCရဲ့ ပထမအကြိမ်ညီလာခံကို ၂၀၂၃ခုနှစ် ဇန်နဝါရီလ (၁၇) ရက်နေ့ကနေ (၂၀)ရက်နေ့အထိ ၄ ရက်ကြာ အွန်လိုင်းနဲ့ မြေပြင်ပုံစံနှစ်ရပ်ဖြင့် ကျင်းပခဲ့ကြပါတယ်။ အင်အားစု ၆ခု ပါဝင်တဲ့ KSCCအဖွဲ့ဝင် (၁၁)ဦး ကို ရွေးချယ်ခဲ့ပြီး အဲ့ဒီအထဲကနေ အလုပ်အမှုဆောင်အဖွဲ့ (၇) ဦး ရွေးချယ်အတည်ပြုခဲ့ကြပါတယ်။ KSCCရဲ့ ပြောရေးဆိုခွင့်ရှိတဲ့ ပုဂ္ဂိုလ်တွေကိုလည်း ဆက်လက် ရွေးချယ်သွားဖို့ရှိတယ်လို့ သိရပါတယ်။

ဒါ့အပြင် နယ်မြေအနေအထားနဲ့ လုံခြုံရေးကြောင့် နာမည်ဖော်ပြီး မပါဝင်နိုင်သေးသူတွေရှိနေပေမယ့် သူတို့ရဲ့ ပူးပေါင်းဆောင်ရွက်မှုတွေကတော့ ယခင်လိုရှိနေမြဲဖြစ်တယ်လို့ ဦးအောင်ဆန်းမြင့်က ဆက်ပြောပါတယ်။

“ KSCCကို ပြန်လည်ဖွဲ့စည်းတဲ့ နေရာမှာ လူထုနဲ့ တစ်သားတည်း ရပ်တည်ပြီးတော့မှ စစ်အာဏာရှင်ချုပ်ငြိမ်းသည်အထိပေါ့နော တော်လှန်တိုက်ပွဲဝင်သွားကြမယ်လို့ ကတိကဝတ်ပြုရအောင် ဆိုပြီးတော့မှ ကျနော်တို့ သဘောထားကျကြတယ်။ တချို့ အဖွဲ့အစည်းတွေကတော့ အဲ့သလိုပေါ့နော သူတို့ရဲ့ နယ်မြေအနေအထား လုံခြုံ ရေး အနေအထားအရပေါ့နော မဖော်ပြလိုသေးတဲ့အတွက်ပေါ့နော။ ပြောရမယ်ဆိုရင်တော့ အဆင်သင့်မဖြစ်သေးလို့ပေါ့နော ဖော်ပြဖို့အဆင်သင့်မဖြစ်သေးတဲ့အတွက် ခေတ္တ ကျန်နေတာပါ။“ လို့ ဦးအောင်ဆန်းမြင့် ကပြောပါတယ်။

ညီလာခံမတိုင်ခင် KSCC မှာ ပါဝင်ခဲ့တဲ့ အမျိုးသားဒီမိုကရေစီအဖွဲ့ချုပ် ( NLD ) ၊ ကယန်းပြည်သစ်ပါတီ နဲ့ ကရင်နီလူမျိုးပေါင်းစုံပြည်သူ့လွတ်မြောက်ရေးတပ်ဦး တို့ဟာ ပထမအကြိမ်ညီလာခံ မှာ ပါဝင်ခြင်းမရှိခဲ့ပါဘူး။

spot_img
spot_img