ထျိုးမြာ
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ကို လက်မှတ်ရေးထိုးပါက တိုက်ပွဲများလျော့ကျသွားနိုင်ရန် လုပ်ဆောင်ပေးနိုင်ကြောင်း ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေကော်မတီ JMC အမှုဆောင်ညွှန်ကြားရေးမှူး ဒေါက်တာမင်းဇော်ဦးကပြောသည်။
“JMCအနေနဲ့ပြောရမယ်ဆိုလို့ရှိရင်တော့ လက်မှတ်မထိုးသေးတဲ့အဖွဲ့တွေ လက်မှတ်ထိုးလို့ရှိရင် တိုက်ပွဲတွေက လျော့ကျမှာတော့ ကျိန်းသေတယ်။ အဲဒီဟာကို ကျနော်တို့ JMC လုပ်နိုင်တယ် လုပ်လည်းလုပ်ခဲ့ပြီးပြီဆိုတော့ ကျနော်တို့ JMC ဘက်ကတော့ တိုက်ပွဲလျှော့ချဖို့အတွက် တော့လုပ်နိုင်တယ်။ အဲတာတော့ကျနော်တို့ တော်တော် ခိုင်ခိုင်မာမာနဲ့ ပြောလို့ရတယ်”ဟု ဒေါက်တာ မင်းဇော်ဦးက ပြောသည်။
လက်ရှိတွင် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)တွင် တိုင်းရင်း သားလက်နက်ကိုအဖွဲ့ (၈)ဖွဲ့က လက်မှတ်ရေးထားပြီးဖြစ်သည်။
လက်မှတ်ထိုးပြီးချိန်တွင် တိုုင်းရင်းသားဒေသတချို့တွေ တိုက်ပွဲပြန်လည်ဖြစ်ပွားမှုများရှိခဲ့သော်လည်း တိုက်ပွဲပြန်လည်ဖြစ်ပွားမှုနှုန်း မှာ NCA လက်မှတ်မထိုးခင်ထက် တစ်နှစ်လျှင် တိုက်ပွဲအရေအတွက် ၁၂ ဆခန့် လျော့ကျ သွားကြောင်း ဒေါက်တာ မင်းဇော်ဦး ကပြောသည်။
လက်ရှိတွင် ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-U နှင့် ပြည်နယ်အဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-Sကို ရှမ်းပြည်နယ်၊ တနင်္သာရီတိုင်း၊ ကရင်ပြည်နယ်၊ မွန်ပြည်နယ်တို့တွင် ဖွဲ့စည်းထားသည်။
JMC ၏ တာဝန်လုုပ်ပိုုင်ခွင့်များထဲတွင် အနေနှင့် NCA စာချုုပ်တွင်ပါဝင်သည့် တပ်ပိုုင်းဆိုုင်ရာကိစများ၊ စစ်ဘက်ဆိုုင်ရာကျင့်ဝတ်များနှင့် ပစ်ခတ်တိုုက်ခိုုက်မှုဆိုုင်ရာ စည်းမျဉ်းစည်းကမ်းများနှင့်ပတ်သက်ပြီး မည်သည့်ဘက်က ထိမ်းသိမ်းလိုုက်နာသည် ပျက်ကွက်သည်တိုု့ကိုု စောင့်ကြည့်လေ့လာရန် လည်းပါ ဝင်သည်။
ထိုု့ပြင် စည်းကမ်းလိုုက်နာမှုနှင့် ပတ်သက်ပြီး အငြင်းပွားမှုများပေါ်ပေါက်ပါက ဘက်လိုုက်မှု ကင်းကင်းနှင့် ပွင့်လင်းမြင်သာမှုကင်းသွာ ကူညီအဖြေရှာပေးရန်လည်းပါဝင်သည်။
NCA လက်မှတ်မရေးထိုုးထားရသေးသည့် တိုုင်းရင်းသားလက်နက်ကိုုင်အဖွဲ့ ၁၁ ဖြင့်ဖွဲ့စည်းထားသော ညီညွတ်သောတိုင်းရင်းသား လူမျိုးများဖက်ဒရယ်ကောင်စီ(UNFC)ကမူ လွတ်လပ်မှု တန်းတူညီမျှမှုနဲ့ တရားမျှတမှုတို့ကို အခြေခံပြီး ပင်လုံစိတ်ဓာတ်နှင့်အညီ ဒီမိုက ရေစီရေး အမျိုးသားရေး တန်းတူညီရေးနှင့် ကိုယ်ပိုင်ပြဌာန်းခွင့် အခွင့်အရေးများ အာမခံချက် အပြည့်အဝရှိ သော ဖက်ဒရယ်ဒီမိုကရေစီ ပြည်ထောင်စု နိုင်ငံကို တည်ဆောက်သွားရန်အပါအဝင် အချက် ၉ ချက်ကိုတောင်းဆိုထားပြီး အဆိုပါအချက်များကို နှစ်ဘက်ညှိနိုင်းဆွေးနွေးသဘောတူညီမှု ရရှိပြီးသည်နှင့်တပြိုင်နက် NCA ကို လက်မှတ်ထိုးမည်ဖြစ်ကြောင်း ထုုတ်ပြန်ထားသည်။
လာမည့် မတ်လ (၁) ရက်နေတွင် နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် UNFC အဖွဲ့ဝင်တစ်ချို့ နေပြည်တော်တွင် တွေ့ဆုံကြမည်ဖြစ်သည်။
မကြာသေးမီက ရှမ်းပြည်နယ်တောင်ပိုင်း၊ လွိုင်လင်ခရိုင်၊ ပင်လုံမြို့တွင် ပြုလုုပ်ခဲ့သည့် နှစ် (၇၀)ပြည့်မြောက်ပြည်ထောင်စုနေ့ အခမ်းအနားတွင် ဒေါ်အောင်ဆန်းစုကြည်က NCA မထိုးထားသည့် တိုင်းရင်းသားလက်နက်ကိုင်အဖွဲ့များကိုု လက်မှတ်ထိုုးရန် တိုုက်တွန်းခဲ့သည်။
တိုင်းရင်းသားလက်နက်ကိုင်အဖွဲ့အစည်းများတစ်ဖွဲ့ချင်းသည် အခြေခံယူဆချက်များ မတူကြသော ကြောင့် NCA ကိုအမြန်လက်မှတ်ရေးရန်တိုက်တွန်းသည်ထက် NCA နှင့်ပတ်သက်၍ တစ်ဘက်နှင့် တစ်ဘက်နားလည်သဘောပေါက်စေရန် ခိုင်မာသော အပေးအယူရရှိပြီး နောက်ပြန်မလှည့်သော အခြေအနေမျိုးဖြစ်အောင်ဆောင်ရွက်ပြီးမှသာ NCA ထိုးသင့်သည်ဟု မွန်ပြည်နယ်လွှတ်တော် ဒုတိယဥက္ကဌ (မွန်ဒေသလုံးဆိုင်ရာ ဒီမိုကရေစီပါတီ ဗဟိုအလုပ်မှုဆောင်အဖွဲ့ဝင်ဖြစ်သူ) ဒေါက်တာအောင်နိုင်ဦးက အကြံပြုသည်။
