ကန္တာရဝတီတိုင်း (မ်)
မိုးဗြဲဒေသက ကရင်နီလက်နက်ကိုင်တပ်ဖွဲ့တွေကြား ပစ်ခတ်မှုကြောင့် ၉ဦး သေဆုံးသွားတဲ့အမှုကို ကရင်နီပြည်တပ်ပေါင်းစုံ စစ်ဦးစီးအဖွဲ့က ကိုင်တွယ်ပေးနေတယ်လို့ ကရင်နီပြည်ကြားကာလ အုပ်ချုပ်ရေးကောင်စီ IEC က ပြောပါတယ်။
“ကရင်နီပြည်တပ်ပေါင်းစုံ စစ်ဦးစီးဘက်က ကိုင်တွယ်ပေးနေတယ်နော်။ အဲ့လောက်ပဲပြောနိုင်တယ်” လို့ IEC အတွင်းရေးမှူး ၂ ဦးဗညားက ကန္တာရဝတီတိုင်း ( မ် ) ကို ပြောပါတယ်။
ဧပြီလ ၂၄ ရက်နေ့မှာ ဖယ်ခုံမြို့နယ်အတွင်း၊ မိုးဗြဲ Local PDF ခေါင်းဆောင် ကိုအောင်မင်း နဲ့ တပ်ဖွဲ့ဝင်တစ်ချို့ကို ညှိနှိုင်းဖို့ တော်လှန်ရေးတပ်ဖွဲ့တွေက လာခေါ်တဲ့အချိန်မှာ ပစ်ခတ်မှုဖြစ်ခဲ့တာလို့ အခြေနေကိုသိတဲ့ ဒေသခံတစ်ဦးကပြောပါတယ်။
အဲဒီဒေသခံရဲ့ပြောကြားချက်အရ မိုးဗြဲ Local PDF ခေါင်းဆောင် ကိုအောင်မင်းက ဒေသခံတွေကြား နိုင်ထက်စီးနင်းမှု ပြုလုပ်တာကြောင့် သူ့ကိုထိန်းသိမ်းဖို့ တခြား တပ်ပေါင်းစုအဖွဲ့တွေက လာရောက်ညှိနှိုင်းတာလို့ ပြောပါတယ်။
“လမ်းမှာစောင့်ပစ်တာမဟုတ်ဘူး။ သူ့ရုံးမှာ သွားခေါ်တာ။ အဲ့ဒါ သူတို့က ပြန်ခံပစ်တာပေါ့။ သူ့ကို ညှိနှိုင်းဖို့ စောင့်တယ်ပေါ့။ သူကတော့ ပြန်ခံပစ်တော့ သူများ ပစ်တာ အဲ့လိုမျိုးပေါ့” လို့ ဒေသခံတစ်ဦးကပြောပါတယ်။
ညှိနှိုင်းဖို့လာခေါ်တဲ့ တပ်တွေမှာ IEC ကာကွယ်ရေးဝန်ကြီးဌာန အစီအမံအောက်မှာ လှုပ်ရှားမယ့် မကြာသေးခင်ကမှ အသစ်ဖွဲ့စည်းထားတဲ့ အယ်လ်ဖာစစ်ဒေသ မိုးဗြဲနယ် တပ်ဖွဲ့လည်း ပါဝင်တယ်လို့ သိရပါတယ်။
အမှုစစ်ဆေးနေတာနဲ့ပတ်သက်ပြီးတော့ IEC ဖက်က တစ်စုံတစ်ရာ ထပ်ပြောတာ မရှိသေးသလို အယ်လ်ဖာတပ်ဖွဲ့အပါအဝင် တခြားတပ်ပေါင်းစုတွေကလည်း အသိပေးထုတ်ပြန်တာ မရှိသေးပါဘူး။
ပစ်ခတ်မှုမှာ ခေါင်းဆောင် ကိုအောင်မင်းနဲ့အတူ တပ်ဖွဲ့ဝင် ၈ ဦး သေဆုံးခဲ့တယ်လို့ သတင်းတွေအရ သိရပါတယ်။
