စီးပွားရေးကဏ္ဍ အစိုးရ၏ ပံ့ပိုးမှု လိုအပ်ဟု ပြောင်းစိုက် ထုတ်လုပ်သူများအသင်း ဥက္ကဌပြော 

မူအက်စတာ

စီးပွားရေးလုပ်ငန်းဖွံ့ဖြိုးတိုးတက်ရေးအတွက် ပြည်နယ်အစိုးရမှ အစိတ်အပိုင်းအချို့၌ ပံ့ပိုးကူညီပေးမှုများဖြင့် ဦးဆောင်ပေးရန် လိုအပ်နေကြောင်း ကယားပြည်နယ် ပြောင်းစိုက်ထုတ်လုပ်သူများအသင်း ဥက္ကဌ ဦးမြင့်မောင်က ပြောကြားသည်။

“အစိုးရကို ပြောရမှာတော့ ခက်တယ်။ အစိုးရက အခု ဘယ်လိုပြန်ပြောလဲ ဆိုတော့ အပြောင်းလဲတစ်ခု လုပ်တာတဲ့။ အစိုးရတစ်ခုထဲပါတာ မဟုတ်ဘူးတဲ့။ ခင်ဗျားတို့လည်း ကိုယ်တိုင်လုပ်မှရမယ်။ အမြဲတမ်း ကျွန်တော်တို့ကို ပြောတယ်။ ကျွန်တော်တို့ကလည်း တတ်နိုင်သလောက်လုပ်တယ်ပေါ့နော်။ ဒါပေမဲ့ အဓိကကတော့ မိဘနဲ့တူတဲ့ အစိုးရပါမှ သားသမီးက လုပ်လို့ရမှာ။ သူတို့ကို ဘယ်ပဲတင်ပြတင်ပြ ခင်ဗျားတို့ လိုတယ်။ ခင်ဗျားတို့အဓိကပဲတဲ့။ ပြောင်းလဲမယ်ဆိုရင် အားလုံး အတူတူပြောင်းလဲမှ ရတယ်ဆိုပြီး လွဲလွဲချနေတယ်”ဟု ၎င်းကပြောသည်။

ပြည်နယ်တွင်းရှိ တောင်သူများမှ ဈေးကွက်စီးပွားရေးစနစ်အတွင်း ယှဉ်ပြိုင်ဆောင်ရွက်နိုင်မှု အားနည်းနေခြင်းကြောင့် အစိုးရ၊ ပြည်သူ၊ တောင်သူနှင့် အခြားစီးပွားရေးလုပ်ငန်းရှင်များ ပူးပေါင်းဆောင်ရွက်ပြီး ဟန်ချက်ညီညီ လုပ်ဆောင်ရန်လိုအပ်ကြောင်း ဦးမြင့်မောင်က ထည့်သွင်း ပြောကြားသည်။

ပြည်နယ်အတွင်း တောင်သူများအနေဖြင့် အဆင့်မြင့်စိုက်ပျိုးရေးကဏ္ဍ၌ အသားမကျသေးသည့်အပြင် ရံဖန်ရံခါ ရာသီဥတုဖေါက်ပြန်မှုက သီးနှံအထွက်နည်းစေပြီး သီးနှံ၏ အရည်အသွေးဆိုင်ရာ ကျဆင်းမှုများ ကြုံတွေ့နေကြရသည်ဟု ပြောင်းစိုက်တောင်သူ ဦးသန်းဇံက ပြောသည်။ 
“အခုက သီးနှံတွေစိုက်တဲ့ခါကျတော့ သီးနှံဈေးကလည်း မကောင်း။ ဆန်ပြန်ဝယ်စားဖို့လည်း မလောက်မငှ ဖြစ်နေတယ်လေ။ အခုက သီးနှံဈေးကလည်းဈေးကျ။ ရာသီဥတုကလည်း မကောင်း ဖောက်ပြန်တော့ သီးနှံတွေလည်း မရကြဘူးလေ။” ဟု လောပိတကျေးရွာနေ တောင်သူဦးသိန်းဇံက ပြောသည်။

မျက်မှောက်ကာလမှာပင် စိုက်ပျိုးသီးနှံဈေးကွက်ကို စီးပွားရေးလုပ်ငန်းရှင်အချို့က လက်ဝါးကြီးအုပ်ထားနေပြီး ဒေသခံ အသေးစား/အလတ်စား လုပ်ငန်းရှင်များ ဝင်ရောက် ယှဉ်ပြိုင်နိုင်သော အခြေအနေမရရှိခြင်းသည် တရားမျှတမှုမရှိဟုု ဦးမြင့်မောင်က ဝေဖန်သည်။

“အခုဒီမှာ ငြိမ်းချမ်းရေးရပြီဆိုတာနဲ့ လုံးဝသွားလို့မရတဲ့နယ်မြေမှာ စီးပွားရေးသမားတွေက လုံးဝလက်ဝါးကြီးအုပ်ပြီးတော့ တကယ်တမ်း ငြိမ်းချမ်းရေးရယူသွားမယ်ဆိုရင် ဦးတို့ရဲ့ အမွေအနှစ်တွေအားလုံး သူတို့လက်ထဲရောက်သွားမှာ ဦးတို့ ဒေသခံတွေက ဒီစိုက်ပျိုးရေးအလုပ်နဲ့ပဲ ဆက်နေသွားရတော့မှာ၊ ဦးတို့ဘက် ထိုက်သင့်သလောက်တော့ စီးပွားရေးလောကမှာ ဦးတို့ဒေသခံတွေ ပါဝင်သင့်တယ်လို့ထင်တယ်” ဟု ဦးမြင့်မောင်ကပြောပါသည်။

ကယားပြည်နယ်မှ ထွက်ရှိသည့် ပြောင်းသီးနှံများကို ရန်ကုန်၊ မန္တလေးပွဲရုံများသို့ တင်ပို့ပြီး ထိုမှတစ်ဆင့် တရုတ်နိုင်ငံသို့ဆက်လက်တင်ပို့ရာ လုပ်ငန်းရှင်များ၏ ဝယ်ယူမှုအခြေအနေ၊ ဈေးနှုန်းများ စိတ်ကြိုက်ဈေးကစားနေသော အခြေအနေ အပေါ်မူတည်ပြီး ဒေသခံတောင်သူများ နစ်နာမှုများ ရှိနေကြောင်း သိရသည်။

Comments

comments

Next Post

တော်ခူရွာဟောင်းကျေးရွာအတွက် ကျေးလက်ကျန်းမာရေးဌာနကို ၂၀၁၈-၁၉ ဘဏ္ဍာရေးနှစ်တွင် တည်ဆောက်ပေးမည်

Thu Jul 27 , 2017
ထျိုးမြာ ဖရူဆိုမြို့နယ် ၊ တော်ခူရွာဟောင်းနှင့် ၎င်းနှင့်နီးစပ်ရာအနီးတစ်ဝိုက်ရှိ တိုင်းရင်းသားပြည်သူလူများ၏ အခြေခံကျန်းမာရေးစောင့်ရှောက်မှုများကို ပိုပြီးဆောင်ရွက်ပေးနိင်ရန်အတွက် ကျေးလက်ကျန်းမာရေးဌာနခွဲထက် ပို၍ အဆင့်မြင့်သော တော်ခူရွာဟောင်း ကျေးလက်ကျန်းမာရေးဌာနနှင့် ဝန်ထမ်းအိမ်ယာများပါဝင်မည့် စံပြကျေးလက်ကျန်းမာရေးဌာနကို ၂၀၁၈-၁၉ ဘဏ္ဍာရေးနှစ်တွင် တည်ဆောက်ပေးနိုင်ရန် တင်ပြတောင်းခံထားပြီးဖြစ်ကြောင်း စည်ပင်သာယာရေးနှင့် လူမှုရေးဝန်ကြီး ဒေါက်တာအောင်ကျော်ဌေးက ပြောသည်။ ဇူလှိုင်လ ၂ဝ ရက်နေ့မှ ၂၁ ရက်နေ့တွင် ကျင်းပခဲ့သော ဒုတိယအကြိမ်ကယားပြည်နယ်လွှတ်တော် ဆဌမပုံမှန်အစည်းအဝေး ဒုတိယမြောက်နေ့တွင် ဖရူမြို့နယ်၊ မဲဆန္ဒနယ်အမှတ်(၁)မှ ပြည်နယ်လွှတ်တော်ကိုယ်စားလှယ် ဦးသဲရယ်က တော်ခူရွာဟောင်းကျေးရွာတွင် စံကိုက်ကျေးလက်ကျန်းမာရေးဌာနခွဲတစ်လုံးကို ၂၀၁၈-၁၉ ဘဏ္ဍာရေးနှစ်တွင် တည်ဆောက်ပေးနိုင်ရန်အဆိုကို ကယားပြည်နယ်လွှတ်တော်သို့တင်သွင်းရာတွင် စည်ပင်သာယာရေးနှင့် လူမှုရေးဝန်ကြီး ဒေါက်တာအောင်ကျော်ဌေးက ပြန်လည်ဖြေကြားထားခြင်း ဖြစ်သည်။ “ရှင်းရှင်းပြောရရင် ကျနော်အဆိုတင်ထားတာက သူတို့စီစဉ်ထားတာထက် […]