ကန္တာရဝတီတိုင်း(မ်)
ကုလသမဂ္ဂ ကမ္ဘာ့စားနပ်ရိက္ခာအစီအစဉ် (WFP) ကနေပြီး ရှမ်းပြည်နယ် တောင်ပိုင်း ညောင်ရွှေမြို့နယ်၊ ပင်းတယမြို့နယ် နဲ့ တောင်ကြီးမြို့နယ်တွေမှာ လာရောက်ခိုလှုံနေတဲ့ ကရင်နီ နဲ့ ရှမ်း-ကယား နယ်စပ်က စစ်ရှောင် တွေကို စားနပ်ရိက္ခာ ထောက်ပံ့ပေးနေတယ်လို့ ဆိုပါတယ်။
“ စောင်၊ ဖျာ၊ မီးဖိုချောင်သုံးအိုးခွက်ပန်းကန် ဓါး၊ ခြင်ထောင်၊ မိန်းကလေးအသုံးအဆောင်၊ ရေဗူး၊ မိုးကာ၊ ကလေးငယ်အတွက် အနှီး၊ ရေပုံး ရတယ်။ ဆေးဝါးတော့ လိုအပ်ဦးမယ် ။ ကလေးအတွက် ကော၊ သက်ကြီးပိုင်းအတွက်ကော။ ပိုလိုအပ်တယ်။ ကလေး နဲ့ သက်ကြီး အာဟာရတွေလည်း လိုအပ်တယ်။ ကလေး အာဟာရမှုန့်တော့ တခါ ရောက်လာပြီ။ “ လို့ ညောင်ရွှေမြို့နယ်အတွင်းရှိ စစ်ရှောင်စခန်းတစ်နေရာမှာ သွားရောက်ခိုလှုံနေတဲ့ စစ်ဘေးရှောင်တစ်ဦး ကပြောပါတယ်။
WFP ကနေပြီး တောင်ကြီးမြို့မှာ ရုံးခန်းနဲ့ စားနပ်ရိက္ခာ သိုလှောင်ရုံတစ်ခုကို အခြေစိုက်ဖွင့်လှစ်တည်ထောင်ထားပြီးလည်းဖြစ်တယ်လို့ သိရပါတယ်။
WFP က အရေးပေါ် စားနပ်ရိက္ခာတွေ ထောက်ပံ့ပေးနေတဲ့ ရှမ်းပြည်နယ် တောင်ပိုင်းရှိ စစ်ရှောင် ပြည်သူတွေရဲ့ နေရာတွေကို မနေ့က သွားရောက် လေ့လာခဲ့ပါတယ်။
“ ကယားပြည်နယ်မှာ ဖြစ်ပွားနေတဲ့ ပဋိပက္ခတွေကြောင့် နေရပ်စွန့်ခွာလာကြရတဲ့ ပြည်သူတွေရဲ့ ဒုက္ခကို မြင်ရတာ ကျွန်တော်စိတ်မကောင်းဖြစ်မိပါတယ်။ သူတို့အားလုံးက အသက်မွေးဝမ်ကျောင်းလုပ်ငန်းတွေ ပြန်လည်ထူထောင်နိုင်ဖို့အတွက် ကိုယ့်အိမ် ကိုယ့်ရွာကို ဘေးကင်းကင်းနဲ့ ပြန်ချင်နေကြတယ်။ ကျွန်တော်တို့ ဒိန်းမတ်နိုင်ငံအနေနဲ့ WFP က အကောင်အထည်ဖော် ဆောင်ရွက်နေတဲ့ စားနပ်ရိက္ခာထောက်ပံ့ရေးအစီအစဥ်ကနေတစ်ဆင့် နေရပ်စွန့်ခွာလာရသူတွေ မရှိမဖြစ်လိုအပ်တဲ့ စားနပ်ရိက္ခာအကူအညီကို ထောက်ပံ့ရတဲ့အတွက် ဝမ်းသာမိပါတယ်။ ” ဟု မြန်မာနိုင်ငံဆိုင်ရာ ဒိန်းမတ်သံရုံး၏ သံရုံးအကြီးအကဲ Mr Anders Graugaard က ပြောဆိုခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
မြန်မာနိုင်ငံအတွင်း အရေးပေါ်ကယ်ဆယ်ရေးလုပ်ငန်းတွေမှာ အသုံးပြုဖို့အတွက် ဒိန်းမတ်နိုင်ငံက အမေရိကန်ဒေါ်လာ ၃.၈သန်း ကိုလည်း WFP ကို ပံ့ပိုးကူညီခဲ့တယ်လို့ ရန်ကုန်အခြေစိုက် ဒိန်းမတ်သံရုံးက ထုတ်ပြန်ပါတယ်။
WFP ကနေပြီး ရှမ်းပြည်နယ် တောင်ပိုင်း မှာ နေရပ်စွန့်ခွာလာရသူတွေအတွက် စားနပ်ရိက္ခာများဖြန့်ဖြူးပေးလျက်ရှိနေတာဖြစ်ပြီး ဒေသခံအရပ်ဘက်အဖွဲ့အစည်းတွေနဲ့ လက်တွဲဆောင်ရွက်လျက်ရှိတယ်လို့ သိရပါတယ်။
နိုင်ငံအတွင်း အိုးအိမ်စွန့်ခွာနေရပ်ရွှေ့ပြောင်းနေထိုင်ရသူတွေ အားလုံးအတွက် လူသားချင်းစာနာမှုဆိုင်ရာ အကူအညီတွေကိုလည်း စဉ်ဆက်မပြတ် ကူညီပေးခွင့် ပေးဖို့ကိုလည်း တောင်းဆိုထားပါတယ်။
