ကန္တာရဝတီတိုင်း (မ်)
နေပြည်တော်စည်ပင်ရိပ်သာမှာ ထိန်းသိမ်းခံရထားတဲ့ ကိုယ်စားလှယ်တွေကို ဘယ်အချိန်မှာ ပြန်လွှတ်ပေးမယ်ဆိုတာမျိုးကို မသိရသေးပေမဲ့ လက်ရှိ နေထိုင်နေတဲ့ အဆောင်မှာ ပုံမှန်အတိုင်း နေထိုင်နေကြောင်း ကယားပြည်နယ်ဒီမိုကရက်တစ်ပါတီမှ ဖရူဆိုမြို့နယ် ပြည်သူ့လွှတ်တော် ကိုယ်စားလှယ် ကိုဒီးဒီးက ပြောပါတယ်။
“နေရထိုင်ရတာတော့ ပုံမှန်ပါပဲ။ ဒီမှာ အဆောင်မှာပဲနေကြတာ။ လျှောက်သွားလို့ရတယ်။ ခြံထဲမှာတော့။ အပြင်ကတော့ ထွက်လို့မရဘူး။”လို့ ကိုဒီးဒီက ပြောပါတယ်။
အာဏာသိမ်းတဲ့ရက်ကစပြီး ကိုယ်စားလှယ်တွေနေတဲ့ အဆောင်ကို စစ်သားတွေရောက်လာတဲ့အပြင် လုံခြုံရေးကင်းလှည့်နေတဲ့ရဲတွေ ပိုပြီးတော့ များလာတာကို တွေ့နေရတယ်လို့ ကိုဒီးဒီးက ပြောပါတယ်။
“လုံခြုံရေးကတော့ သူ့ကိုယ်သူရှိနေတာပေါ့။ ကျနော်တို့အဆောင်ဝိုင်းထဲကိုတော့ လာပြီးတော့မှ တစ်ခြားထူးထူးခြားခြားတော့ မရှိပါဘူး”လို့ ဖရူဆိုမြို့နယ် အမျိုးသားလွှတ်တော်ကိုယ်စားလှယ် စောအားလ်ဒိုက ပြောပါတယ်။
ပြည်သူ့လွှတ်တော် နဲ့ အမျိုးသားလွှတ်တော်ကို တက်ရောက်ဖို့ အတွက် ကယားပြည်နယ်က အနိုင်ရ ကိုယ်စားလှယ်တွေဟာ ၂၀၂၁ ဇန်နဝါရီ ၂၄ ရက်နေ့ ကတည်းက နေပြည်တော်ကို ရောက်ရှိနေတာဖြစ်ပါတယ်။