မန္တလေးတွင်ပြောကြားခဲ့သည့် ကယားပြည်နယ်ဝန်ကြီးချုပ်၏ အမှာစကား ဝေဖန်ခံနေရ

မန္တလေးသံစဉ်ဂန္တဝင်ပုံရိပ်နှင့် မငြိမ်းချမ်းလို့မဖြစ်ဘူး ဂီတပွဲတော်မှာ ကယားပြည်နယ်ဝန်ကြီးချုပ်ဦးအယ်လ်ဖောင်းရှို မိန့်ခွန်းပြောခဲ့စဉ်။ (ဓါတ်ပုံ- Kayah Gov Facebook)

ကန္တာရဝတီတိုင်း(မ်)

ပြီးခဲ့တဲ့ ယခုလ ၄ ရက်နေ့က မန္တလေး အမျိုးသားကဇတ်ရုံမှာပြုလုပ်ခဲ့တဲ့ မန္တလေးသံစဉ်ဂန္တဝင်ပုံရိပ်နှင့် မငြိမ်းချမ်းလို့မဖြစ်ဘူး ဂီတပွဲတော်မှာ ကယားပြည်နယ်ဝန်ကြီးချုပ်ဦးအယ်လ်ဖောင်းရှိုပြောကြားခဲ့တဲ့ အမှာစကားပါအကြောင်းအရာတွေ လွဲမှားမှုနဲ့ပတ်သက်ပြီး ကရင်နီနိုင်ငံရေးအသိုင်းအဝိုင်းနှင့် လူမှုကွန်ယက်စာမျက်နှာတွင် ဝေဖန်မှုများနှင့်ကြုံနေရပါတယ်။

အဆိုပါအမှာစကားမှာ ဝန်ကြီးချုပ်ဦးအယ်လ်ဖောင်းရှိုက ကယားပြည်နယ်မှာ လက်နက်ကိုင် ၇ ဖွဲ့ရှိကြောင်းနှင့် ၆ ဖွဲ့မှာ NCA လက်မှတ်ရေထိုးပြီးကြောင်းမှားယွင်းပြောဆိုခဲ့ခြင်းဖြစ်ပါတယ်။

ပြည်နယ်ဝန်ကြီးချုပ်တစ်ယောက် အနေဖြင့် ကိုယ့်ပြည်နယ်ရဲ့ အခြေအနေအမှန်ကို မသိဘဲ အခုလိုမှားယွင်းပြောဆိုလိုက်ခြင်းဟာ ရှက်ဖွယ်ရာဖြစ်တယ်လို့ ကရင်နီလူငယ်တစ်ဦးဖြစ်သူ ခူးကြူးဖဲကေး (ခ) ဂူးဂူးက ပြောပါတယ်။

“ ဝန်ကြီးချုပ်တစ်ယောက်အနေနဲ့ကိုယ့်ပြည်နယ်မှာ လက်နက်ကိုင် ၇ ဖွဲ့ရှိတယ် ၆ ဖွဲ့က NCA ထိုးပြီးပြီ ၊ DDR ၊ SSR ကိုအကောင်အထည်ဖော်ပြီးပြီဆိုပြီး အခုလိုတရားဝင်အခမ်းအနားမှာပြောတာက ရှက်ဖွယ်ဖြစ်တယ်၊ ဒါပထမအချက်၊ ဒုတိယအချက်က လေ့လာမှုအားနည်းတာလားလေ့လာမှုမရှိတာလားပေါ့နော် ဝန်ကြီးချုပ်တစ်ယောက်အနေနဲ့အခုလောက်ထိမှားတာကမဖြစ်သင့်ဘူး၊ တခြားပြည်နယ်က ကိစ္စကိုပြောလို့မှားခဲ့တယ်ဆိုရင်အဖတ်ဆယ်လို့ရသေးတယ်၊ အခုက ကိုယ့်ပြည်နယ်အခြေအနေလွဲမှားစွာပြောပြီး ဘာမှမသိဘူး ၊ ဘာမှနားမလည်ဘူးဆိုတာအင်မတန်မှရှက်ဖွယ်ဖြစ်ပါတယ်” လို့ ပြောပါတယ်။

ပြည်နယ်ဝန်ကြီးချုပ်တစ်ယောက်အနေဖြင့် အခုလိုလွဲမှားစွာပြောဆိုလိုက်ခြင်းဟာ ပြည်နယ်ငြိမ်းချမ်းရေးအပေါ်ဘယ်လောက်အထိ ထဲထဲဝင်ဝင်လေ့လာတယ်ဆိုတဲ့ သူ့အရည်အချင်းကို ဖော်ပြလိုက်တာဖြစ်တယ်လို့ ကယားပြည်နယ်ဒီမိုကရက်တစ်ပါတီမှ ပြည်နယ်လွတ်တော်ကိုယ်စားလှယ် ဦးသဲရယ်ကပြောပါတယ်။

“ ကယားပြည်နယ်မှာ လက်နက်ကိုင်အဖွဲ့အစည်းများတယ်ဆိုတာမှန်ပါတယ်၊ ဒါပေမဲ့ အရင်ကအပစ်ခတ်ရပ်စဲရေးယူပြီးတဲ့အဖွဲ့တွေက နယ်ခြားစောင့်တပ်နဲ့ ပြည်သူ့စစ်အဖြစ်အကုန်အသွင်ပြောင်းကုန်ပါပြီ၊ အဲ့ဒါတွေကတော့ NCA လမ်းကြောင်းနဲ့လုံးဝမပတ်သက်တဲ့ဟာတွေပေါ့နော်၊ အခုကျတော့ သူပြောတာက ဒီဟာတွေက ဒီလို ဒီလိုဖြစ်နေတယ်ဆိုတော့၊ သူ့အနေနဲ့ဒီငြိမ်းချမ်းရေးဖြစ်စဉ်အပေါ်မှာ သူဘယ်လောက်အထိနားလည်ပြီး လေ့လာမှုအားရှိလဲဆိုတာ သူ့အရည်အချင်းကို သူဖော်ပြတာလို့ဘဲ ကျနော့်တစ်ယောက်အနေနဲ့အဲ့လိုဘဲမြင်ပါတယ်” လို့ ပြောပါတယ်။

ကယားပြည်နယ်မှာကရင်နီအမျိုးသားတိုးတက်ရေးပါတီ KNPP အဖွဲ့မှ ခွဲထွက်ခဲ့သည့် အဖွဲ့၄ ဖွဲ့ရှိပြီး ကရင်နီပြည်လူမျိုးပေါင်းစုံပြည်သူ့လွတ်မြောက်ရေးတပ်ဦး (KNPLF / က.လ.လ.တ) အဖွဲ့မှာ နယ်ခြားစောင့်တပ်အဖြစ်အသွင်ပြောင်းခဲ့ပြီးဖြစ်သလို၊ အခြားအဖွဲ့များဖြစ်ကြသည် ကရင်နီအမျိုးသားငြိမ်းချမ်းရေးနှင့်ဖွံ့ဖြိုးရေးပါတီ (KNPDP / ကယောနီအဖွဲ့)၊ ကရင်နီအမျိုးသားသွေးစည်းညီညွတ်ရေးအဖွဲ့ (KNSO / ကြယ်ဖြူအဖွဲ့)၊ ကရင်နီအမျိုးသားဒီမိုကရက်တစ်ပါတီ (KNDP / နဂါးအဖွဲ့) စသည့်အဖွဲ့များမှာ ဌာနေပြည်သူ့စစ်အဖြစ်အသွင်ပြောင်းခဲ့ပြီးဖြစ်သည်။

သီးခြားအနေဖြင့် ရပ်တည်နေသည့် ကယန်းပြည်သစ်ပါတီ (KNLP) အဖွဲ့ကိုလည်း အစိုးရမှ ဌာနေပြည်သူ့စစ်အဖြစ်သတ်မှတ်ထားကြောင်းသိရသည်။ လက်ရှိအချိန်တွင် ကယားပြည်နယ်တွင် အင်အားအကြီးဆုံးဖြစ်သောတိုင်းရင်းသားလက်နက်ကိုင်အဖွဲ့ဖြစ်သည့် ကရင်နီအမျိုးသားတိုးတက်ရေးပါတီ (KNPP) အနေဖြင့် အစိုးရနှင့် နှစ်ဦးနှစ်ဘက်သဘောတူစာချုပ် ( Bilateral Agreement) ကို လက်မှတ်ရေးထိုးထားပြီး NCA စာချုပ်တွင်လက်မှတ်ရေးထိုးနိုင်ရေးအတွက်ကြိုးပမ်းနေဆဲဖြစ်တယ်လို့သိရပါတယ်။

Comments

comments

Next Post

ကိုယ်ခံပညာသိုင်းပေါင်းစုံ ကစားသမား ဖြစ်တဲ့ အန်တိုနီယာနဲ့ ဆက်သွယ်မေးမြန်းခြင်း

Mon Jan 13 , 2020
“မနေ့ကမှ လွိုင်ကော်က ပရိသတ်တစ်ယောက်က အဲ့ဆိုင်းဘုတ်ပြလာပြီးမေးလို့သိရတာ။ ညီမကိုလာပြီးဆက်သွယ်တာမရှိဘူး။ ရန်ကုန်မှာညီမရဲ့မန်နေဂျာမ မထွယ်ဆိုတာရှိတယ်။ သူ့ကိုလည်းဆက်သွယ်တာမရှိဘူး။ လွိုင်ကော်မှာအဖေနဲ့အမေလည်းရှိတယ်။ သူတို့ကိုဆက်သွယ်တာလဲမရှိဘူး။ အဲ့လိုလုပ်ချလိုက်တော့လန့်သွားတယ်” ဒီလ ၁၅ ရက်နေ့မှာ ကျရောက်မယ့် ၆၈ နှစ်မြောက် ကယားပြည်နယ်နေ့မှာ မြန်မာ့ရိုးရာလက်ဝှေ့ပွဲကို ထည့်သွင်းကျင်းပမှာဖြစ်ပါတယ်။ ပြည်နယ်ပွဲတော်နေ့ဖြစ်တဲ့ ၁၅ ရက်နေ့မှာ ကျင်းပမဲ့ မြန်မာ့ရိုးရာလက်ဝှေ့ပွဲကို နာမည်ကျော်ရိုးရာလက်ဝှေ့ကစားသမား ဘယ်ရောနီကာနဲ့ ကိုယ်ခံပညာသိုင်းပေါင်းစုံ (Mixed Martial Art – MMA) ကစားသမား ဖြစ်တဲ့ တိုတို လို့ပရိသတ်တွေက ချစ်စနိုးခေါ်ကြတဲ့ ဘိုဇ်ဟီးနာ အန်တိုနီယာ (Bozhena Antoniyar) တို့ကို အဓိကထိုးမဲ့ တွဲဆိုင်းဖြစ်သယောင်ဖော်ပြထား တာအပြင် အန်တိုနီယာ (ခ) တိုတိုက ပါဝင်ပြီး […]