ကန္တာရဝတီတိုင်း ( မ် )
စစ်ကော်မရှင် ထိန်းချုပ်ထားတဲ့ ကရင်နီပြည် ၊ လွိုင်ကော်မြို့မှာ ဒေသတွင်းတိုက်ပွဲ အခြေအနေတွေကြောင့် နေရပ်စွန့်ခွာရတဲ့ ဝန်ထမ်းတွေ၊ ဝန်ထမ်းမိသားစုနဲ့ ပြည်သူလူထုတွေအတွက် စစ်ကော်မရှင်က ၅ ကြိမ်မြောက် ထောက်ပံ့ငွေ ပေးအပ်ခဲ့တယ်လို့ ပြောဆိုထားပေမယ့် မြေပြင်မှာ အမှန်တကယ် မရရှိတဲ့ စစ်ဘေးရှောင်တွေလည်း ရှိတယ်လို့ လွိုင်ကော်မြို့ခံတွေက ပြောပါတယ်။
မတ်လ ၁၁ ရက်နေ့က ပြည်နယ်ခန်းမမှာ ပေးအပ်ခဲ့တဲ့ ၅ ကြိမ်မြောက် ထောက်ပံ့ငွေပေးတွေကို စစ်ကော်မရှင်ခန့် ဝန်ကြီးချုပ်က ပေးအပ်တာဖြစ်ပြီး တာဝန်ရှိတဲ့ ကိုယ်စားလှယ်တွေက လက်ခံရယူခဲ့တယ်လို့ ဆိုပါတယ်။
“ကျမတို့ ရောက်ကတည်းတော့ မရသေးဘူး။ ဧည့်စာရင်းတိုင်တာ ၃ လ ပြည့်တဲ့သူတွေကိုပဲ ပေးမယ် ပြောတယ်။ ခု ၆ လလောက်ရှိ နေပေမယ့်လည်း မရသေးပါဘူး။”လို့ ဖားဆောင်းမြို့ကနေ လွိုင်ကော်မြို့ကို စစ်ဘေးတိမ်းရှောင်နေတဲ့ စစ်ရှောင်အမျိုးသမီးတဦးက ပြောပါတယ်။
စစ်ကော်မရှင်က ၂၀၂၅ခုနှစ်၊ အောက်တိုဘာ ၊ နိုဝင်ဘာ ၊ ဒီဇင်ဘာ စတဲ့ သုံးလအတွက် ထောက်ပံ့ငွေ ပေးအပ်ရာ အိမ်ထောင်စု ( ၅၄၇၁ ) စု၊ လူဦးရေ ( ၁၈၆၄၂ ) ဦးတို့အတွက် ရန်ပုံငွေကျပ်သန်း ၉၆၅ ဒသမ ၅၂၀ ကို ပေးအပ်ခဲ့ကြောင်း ထုတ်ပြန်ထားပါတယ်။
လူတဦးကို ကျပ် နှစ်သောင်းနှုန်းနဲ့ သုံးလစာ ၆သောင်းစီ ပေးအပ်ပေမယ့် လွိုင်ကော်မြို့ထဲ စစ်ဘေးရှောင်တချို့ မရရှိကြဘူးလို့ ဆိုပါတယ်။ ဒါ့အပြင် ထောက်ပံ့ငွေကို စစ်ကော်မရှင်လက်အောက်က ဝန်ထမ်းအသိုင်းအဝန်း ၊ အုပ်ချုပ်ရေးနဲ့နီးစပ်သူတွေ၊ မိသားစုတွေကိုသာ ဦးစားပေးတယ်လို့ လွိုင်ကော်မြို့ခံတဦးက ပြောပါတယ်။
“လွိုင်ကော်မြို့ထဲနေသူတွေက မရဘူး။ တကယ်တော့ ကျနော်တို့လည်း စစ်ဘေးသင့်ပဲလေ။ အဓိကတော့ ဝန်ထမ်းတွေ နဲ့ သူတို့နဲ့နီးစပ်သူတွေကို ဦးစားပေးတာပါ”လို့ လွိုင်ကော်မြို့ခံ အမျိုးသားတဦးကဆိုပါတယ်။
ပြီးခဲ့တဲ့ ၂၀၂၅ခုနှစ် ၊ စက်တင်ဘာလအတွင်းက မြို့တွင်းတိုက်ပွဲတွေကြောင့် ပျက်စီးခဲ့ရတဲ့ လွိုင်ကော်မြို့ပေါ် ရပ်ကွက်က နေအိမ် ၆၀၀ လုံး အတွက် စစ်ကော်မရှင်ကနေ ထောက်ပံ့ငွေ ပေးခဲ့ပေမယ့် အားလုံးမရရှိခဲ့ဘူးလို့ နေအိမ်ပျက်စီးသွားတဲ့ မြို့ခံတွေက ပြောပါတယ်။
လွိုင်ကော်မြို့တွင်းမှာ ၂၀၂၃ခုနှစ်က ဖြစ်ပွားခဲ့တဲ့ တစ်လေးလုံး စစ်ဆင်ရေးအတွင်း မြို့နေလူထုတွေ အများစု တိမ်းရှောင်ခဲ့ကြပေမယ့် လက်ရှိမှာတော့ ပြန်လာနေထိုင်သူတွေ များပြားလာတယ်လို့ သိရပါတယ်။
