ကန္တာရဝတီတိုင်း(မ်)
ကရင်နီပြည်၊ ဒီးမော့ဆိုမြို့နယ် အနောက်ခြမ်းက ဆိုလဖဲခို ကျေးရွာမှာ ရာသီတုပ်ကွေးကြောင့် ဒေသခံတွေ ရွာလုံးကျွတ်ဖျားနာနေကြတယ်လို့ ရွာခံတွေဆီကနေ သိရပါတယ်။
” အစပိုင်းတော့ ရွာအလယ်ပိုင်းက အရင်စဖြစ်တယ်။ မိသားစုအလိုက် ဖြစ်ကြတယ်ပေါ့။ တအိမ်မှာ တစ်ယောက်ဖြစ်ရင် ကူးတယ်နဲ့တူတယ်။ အဖျားက တော်တော်ကြီးကြတယ်ပေါ့နော်။ နောက်တော့တစ်လအတွင်းပဲ တစ်ရွာလုံးပြန့်သွားတယ်။ အဖျားကြီးတယ်။ တချို့က သွေးပေါင်တွေကျတဲ့အထိဖြစ်တယ်” လို့ ရွာခံတဦးက ပြောပါတယ်။
ဒေသခံတွေရဲ့ အဆိုအရ ကျန်းမာရေးစောင့်ရှောက်မှုပေးတဲ့ ဆေးဆရာမ တဦးသာရှိပြီး၊ လူနာဦးရေ များပြားတာကြောင့် ကျန်းမာရေးဝန်ဆောင်မှုပေးနိုင်ဖို့ အခက်အခဲဖြစ်နေတယ်လို့ ရွာခံတစ်ဦးက ပြောပါတယ်။
“ဆရာမတွေ မလုံလောက်တာလဲ တော်တော်လေး အခက်ခဲဖြစ်တယ်ပေါ့နော်။ ဘယ်လိုဖြစ်လည်းဆို အိမ်ကလူက အဖျားတက်ပြီး သွားခေါ်ဆို ဆရာမက မရှိသေးဘူး။ ဘာလို့ဆို သူတစ်ယောက်တည်း လှည့်နေရ တော့ တခြားစစ်ဘေးရှောင်လည်း သူသွားတယ်လေ။ တခြားရွာက ခေါ်လဲလိုက်ရတော့ စောင့်နေရတယ်။ တချို့ဆို အသည်းအသန်ဆိုလည်း ဆရာမလည်း မလုံလောက်တဲ့အတွက် တော်တော်လေးခက်တယ်ပေါ့” လို့ ရွာခံတစ်ဦးက ပြောပါတယ်။
ရာသီတုပ်ကွေးဟာ ဆိုလဖဲခိုရွာအပြင် အနီးနားက ကျေးရွာနဲ့ စစ်ဘေးရှာင်စခန်းမှာလည်း ဖြစ်ပွားနေကြတယ်လို့ သိရပါတယ်။
