Monday, November 29, 2021

ဒီးမော့ဆို တစ်မြို့နယ်လုံး လျှပ်စစ်မီးနဲ့ဆက်သွယ်ရေးလိုင်းများ ပြတ်တောက်နေဆဲ

ကန္တာရဝတီတိုင်း(မ်)

ကရင်နီပြည်နယ်၊ ဒီးမော့ဆိုမြို့နယ်အတွင်းမှာ လျှပ်စစ်မီးနဲ့ ဆက်သွယ်ရေးလိုင်းတွေ ဖြတ်တောက်ခံရတာ လနဲ့ချီကြာနေပြီဖြစ်ကြောင်း ဒေသခံတွေက ဆိုပါတယ်။

ဒီးမော့ဆိုမြို့နယ်အတွင်းကို သွယ်တန်းလာတဲ့ ဓာတ်အားလိုင်း တမင်ဖြတ်တောက်ခံရတာဖြစ်တယ်လို့လည်း ဒေသခံတွေက သုံးသပ်ပြောဆိုကြပါတယ်။

ဒီးမော့ဆိုမြို့နယ် အနောက်ဖက်ခြမ်းဟာ ပြီးခဲ့တဲ့ စက်တင်ဘာလ နောက်ဆုံးအပတ်မှာ ဖြစ်ပွားခဲ့တဲ့ ကုန်းသာကျေးရွာအနီးတစ်ဝိုက် တိုက်ပွဲကစပြီး ယနေ့အချိန်ထိ ဖြတ်တောက်ခံရတယ်လို့ သိရပါတယ်။

ဒါ့အပြင် ဒီးမော့ဆိုမြို့နယ် အရှေ့ဖက်ခြမ်းဟာလည်း လျှပ်စစ်မီးမရရှိတာ လနဲ့ချီကြာရှိပြီလို့ ဒေသခံတွေကလည်း ပြောပါတယ်။

မီးပျက်သွားတာက သက်သက်မဲ့ကို ဖြတ်လိုက်တဲ့ ပုံစံမျိုးပဲ။ ဒီးမော့ဆိုမြို့နယ်ကို လာတဲ့ ဓာတ်အားလိုင်းတွေ အကုန်လုံးက ပြတ်သွားပြီ။ လုံးဝမလာတော့ဘူး။ လို့ အမည်မဖော်လိုတဲ့ ဒေသခံအမျိုးသားတစ်ဦးက ဆိုပါတယ်။

ဒီးမော့ဆိုမြို့နယ်အတွင်းက အချို့သောနေရာ အနည်းအကျဉ်းတွေမှာ မီးရရှိတာဟာ ဒီးမော့ဆိုမြို့နယ်အတွင်းကို တိုက်ရိုက်သွယ်တန်းတဲ့ ဓာတ်အားလိုင်းကနေ ရရှိတာ မဟုတ်ပဲ စစ်ကောင်စီတပ်ရဲ့ တပ်ရင်းတွေဆီသွယ်တန်းထားတဲ့ ဓာတ်အားကို အသုံးပြုနေရတာမျိုးတွေ ၊ တခြားသော မြို့နယ်တွေကို သွယ်တန်းတဲ့ ဓာတ်အားလိုင်းကို ခွဲပြီး အသုံးပြုနေရတာမျိုးတွေ ဖြစ်တယ်လို့ ဒေသခံတွေက ဆိုပါတယ်။

ဆိုတော့ သေချာတာက ဒီမီးကို သူတို့ဖက်က (စစ်ကောင်စီ) နေပြီးတော့ ဖျက်ချင်လို့ကို ဖျက်ထားတဲ့ ပုံစံနဲ့ လုပ်တယ်ဆိုတာ သေချာတယ်ပေါ့နော။ အဲ့လိုမျိုးကို ဖြစ်နေတာ။ လို့ ဒေသခံအမျိုးသားတစ်ဦးက ပြောပါတယ်။

လျှပ်စစ်မီးမရရှိတာ လနဲ့ချီကြာပြီဖြစ်တဲ့အတွက် စစ်ဘေးရှောင်တွေကို ဆေးကုသပေးနေတဲ့ ဆေးခန်းတွေအတွက် အခက်အခဲရှိသလို Insulin လို ဆေးမျိုးကို အအေးခံပြီးမှသာ ပုံမှန်မှီဝဲနေရတဲ့ စစ်ဘေးရှောင်ဆီးချိုသမားတွေအတွက်လည်း များစွာအခက်အခဲ ဖြစ်တယ်လို့ အဆိုပါဒေသခံက ကန္တာရဝတီတိုင်း(မ်) ကို ဆက်ပြောပါတယ်။

ဒါ့အပြင် ဒီးမော့ဆိုမြို့နယ်အတွင်းမှာ ဆက်သွယ်ရေးအတွက် အလွန်အရေးပါတဲ့ ဖုန်းလိုင်းလည်း နေရာ အများစုမှာ ဖြတ်တောက်ခံရတယ်လို့ သိရပါတယ်။

ဒီးမော့ဆိုမြို့နယ်အရှေ့ဖက်ခြမ်းမှ ဒေသခံအမျိုးသားတစ်ဦးကလည်း ဖုန်းလိုင်းရတာ လုံးဝနည်းသွားတယ်။ အဲ့တော့ ဥပမာ ကျန်းမာရေးအရေးပေါ် ကိစ္စတွေ ဖြစ်လာပြီဆိုရင် ကျနော်တို့က ဆက်သွယ်ရတာ အရမ်းခက်တယ်။ လို့ ကန္တာရဝတီတိုင်း(မ်) ကို ပြောပါတယ်။

နိုဝင်ဘာလ ၂၅ ရက်နေ့မှာလည်း လွိုင်ကော်မြို့နယ်ရှိ ဆော်ခီးဒေါနဲ့ ဒေါလိုရှေးကျေးရွာအကြားက လျှပ်စစ်ဓာတ်အားပေး တာဝါတိုင်ကြီးနှစ်ခု ဖျက်ဆီးခံရတယ်လို့ ဒေသခံတွေဆီကနေ သိရပါတယ်။

ဒီးမော့ဆိုမြို့နယ်ဟာ လက်ရှိမှာ စစ်ဘေးဒုက္ခသည် တွေအများဆုံး ဖြစ်တဲ့ မြို့နယ်လည်း ဖြစ်ပါတယ်။

More from the blog

စစ်ကောင်စီသတင်းပေးဟုဆိုသူ ဒီးမော့ဆိုမြို့နယ် ဒု-ပညာရေးမှူးကို KDF ဖမ်းဆီး

ကန္တာရဝတီတိုင်း(မ်) ကရင်နီပြည်နယ်၊ ဒီမောဆိုမြို့နယ်၊ငွေတောင်ကျေးရွာအုပ်စုမှ စစ်ကောင်စီသတင်းပေး ( အများက ဒလန်ဟု) သတ်မှတ်ထားသော စစ်ကောင်စီလက်ထက် ဒီးမော့ဆိုမြို့နယ် ဒု-ပညာရေးမှူးဖြစ်သူ ဒေါ်ခင်မေစိုး ကို ကရင်နီဒီမိုကရက်တစ်တပ်ဦး KDF မှ ယမန်နေ့ နိုဝင်ဘာလ ၂၅...

CDM ဆရာဝန် နဲ့ သူနာပြုတွေက ယခင် ၅၀၅(က)ဖြင့် တရားစွဲခံရသူများမဟုတ်ဟုဆို

ကန္တာရဝတီတိုင်း(မ်) ကယား(ကရင်နီ)ပြည်နယ် လွိုင်ကော်မြို့ ခရစ္စတူးဘုရင်ဗဟိုဘုရားကျောင်းရှိ ဂရုဏာဆေးခန်းမှာ ပရဟိတ ဆေးကုပေးနေတဲ့ CDM ဆရာဝန် ၂ဦးနဲ့ သူနာပြု ၄ဦးက ယခင်က ၅၀၅ (က)ဖြင့် တရားစွဲဆိုခံ ထားရသူများမဟုတ်ကြောင်း ၎င်းဘုရားကျောင်းရှိ တာဝန်ရှိသူ...

ဂရုဏာဆေးခန်းမှ ဖမ်းဆီးခံရသူအားလုံး ပြန်လည်လွှတ်မြောက်

ကန္တာရဝတီတိုင်း(မ်) ကရင်နီပြည်နယ်၊ လွိုင်ကော်မြို့ နောင်ယားရပ်ကွက်ရှိ ခရစ္စတူးဘုရင်ဘုရားကျောင်းဝန်းအတွင်း ဖွင့်လှစ်ထားတဲ့ ဂရုဏာဆေးခန်းမှာ တာဝန်ထမ်းဆောင်လျက်ရှိတဲ့ ဆရာဝန်၊ သူနာပြု၊ စေတနာ့ဝန်ထမ်း စုစုပေါင်း ၁၈ဦး ယမန်နေ့မှာ စစ်ကောင်စီတပ်ရဲ့ ဝင်ရောက်ဖမ်းဆီးခြင်းခံလိုက်ရပြီး ဒီကနေ့ ည ၆နာရီကျော်မှာ...

ဒေါပိုးစီဘုန်းကြီးကျောင်းမှာ တပ်စွဲထားတဲ့ စစ်ကောင်စီနဲ့ KNDFတို့ တိုက်ပွဲဖြစ်ခဲ့ပြီး စစ်ကောင်စီက နေအိမ် နှစ်လုံး မီးရှို့ဖျက်ဆီးခဲ့

ကန္တာရဝတီတိုင်း(မ်) နိုဝင်ဘာ(၂၃)ရက် မနက် ၆နာရီ ၅၇မိနစ်အချိန်၊ ဒီးမော့ဆိုမြို့နယ် စံပြခြောက်မိုင် ဒေါပိုးစီဘုန်းကြီးကျောင်းမှာ တပ်စွဲနေတဲ့ စစ်ကောင်စီတပ်နဲ့ ကရင်နီအမျိုးသားကာကွယ်ရေးတပ် (KNDF)B-09 ပူးပေါင်းတပ်ဖွဲ့တို့ တိုက်ပွဲ ငါးမိနစ်ကြာ ဖြစ်ပွားခဲ့တယ်လို့ (KNDF) B-09 တာဝန်ရှိသူတစ်ဦးက...