ကန္တာရဝတီတိုင်း(မ်)
ဒီကနေ့ (နိုဝင်ဘာလ ၁၃ ရက်နေ့ ) မနက် ၁၀နာရီခွဲအချိန်မှာ လွိုင်ကော်မြို့နယ်၊ နာနတ်တောရပ်ကွက်ဖက်မှာ စစ်ကောင်စီ ပစ်ခတ်တဲ့လက်နက်ကြီးတစ်လုံးဟာ မန်ကျည်းပင်ပေါ် ကျရောက်ပြီး လက်နက်ကြီးစ ပြန်စင်တာကနေ ပရဟိတအသင်းဝင်တစ်ဦး သေဆုံးခဲ့တယ်လို့ သိရပါတယ်။
“ နာနတ်တောမှာ ထုလာတဲ့ လက်နက်ကြီး ၊ သစ်ပင်ကို မှန်ပြီးမှ သူ့ကိုထိတာ။ နာနတ်တောမှာဘဲ။ အသင်းသားထဲကပဲ။ ”လို့ အဆိုပါ ပရဟိတအသင်း၀င်တစ်ဦးက ပြောပါတယ်။
လက်နက်ကြီး စ ထိမှန်သေဆုံးသွားတဲ့သူမှာ အသက် (၁၇) နှစ်အရွယ်အမျိုးသားဖြစ်ပြီး ပရဟိတ အသင်းတစ်ခုမှာ ၁နှစ်ဝန်းကျင် တာဝန်ထမ်းဆောင်နေပြီလို့ သိရပါတယ်။ ပြည်သူလူထုကို ကူညီဆောင်ရွက်ရင်း အဲ့ဒီ ပရဟိတ အသင်းဖွဲ့စည်းတာ (၂ ) နှစ်ကျော်ကြာရှိပြီလို့ ဆိုပါတယ်။
ကရင်နီပြည် လွိုင်ကော်မြို့မှာ တစ်လေးလုံး စစ်ဆင်ရေးစတင်ပြီးနောက်ပိုင်း အရပ်သားပြည်သူတွေကို ကူညီဆောင်ရွက်ပေးနေတဲ့ ပရဟိတ သမားတွေထဲကလည်း လက်နက်ကြီး ကျရောက်မှုကြောင့် သေဆုံးမှုရှိနေပြီလို့ ပရဟိတအသင်းတွေက ပြောပါတယ်။
လတ်တလောတိုက်ပွဲတွေကြောင့် ပိတ်မိတဲ့အရပ်သားလူထုတွေကို ကူညီဆောင်ရွက်နေတဲ့ ပရဟိတကားတချို့လည်း စစ်ကောင်စီက သိမ်းဆည်းထားပါတယ်။ နောက်ရက်တွေမှာ ပြန်ပေးမယ်လို့ ပြောဆိုထားပေမဲ့ လက်ရှိအချိန်ထိ ဖုန်းဆက်နေပေမဲ့ မရရှိသေးဘူးလို့ အဆိုပါ ပရဟိတအသင်းထံကနေ သိရပါတယ်။