ကန္တာရဝတီတိုင်း (မ်)
ကရင်နီပြည် နန်းမယ်ခုံမြို့နယ်က လယ်စပါးခင်းတွေကို ခရု၊ဂဏန်းနဲ့ ကြွက်တွေဖျက်ဆီးတာကြောင့် လယ်စိုက်တောင်သူတွေ အခက်ကြုံနေကြရပါတယ်။
“စက်က ထွန်လိုက် ထယ်လိုက်လုပ်တာနဲ့ ခရုကထွက်ပြီကော ပျိုးစထောင်တာနဲ့ ကြွက်ကစားပြီ။ နောက် ပျိုးနှစ်လက်မ၊ သုံးလက်မတက်ပြီဆို ခရုစားပြီ။” လို့ ဒေသခံတောင်သူ အမျိုးသမီးတစ်ဦးကပြောပါတယ်။
ခရု၊ကြွက်တွေအပြင် ဂဏန်းကောင်တွေကလဲ စပါးပင်တွေကို ဖျက်ဆီးနေတာလည်းရှိတယ်လို့ တောင်သူတွေကဆိုပါတယ်။ တောင်သူတွေကတော့ ခရုဆေး၊ ကြွက်ဆေးတွေအသုံးပြု နှိမ်နင်းသလို တချို့တွေကတော့ ခရုလိုက်ကောက်တဲ့ နည်းလမ်းတွေနဲ့ ဖြေရှင်းနေကြရတယ်လို့ သူကဆက်ပြောပါတယ်။
” အခက်အခဲတွေကတော့ မျိုးစုံပဲ၊ စားရပါ့မလား ဒီနှစ်တော့။ လယ်လုပ်တာ အရင်းကုန်တာမနည်းဘူး။ အခုအဲ့လိုဖြစ်တော့ ကိုယ်က ဘယ်လိုရင်ဆိုင်ရမလဲ တွေးနေရတယ်။ စားရမလား မစားရဘူး မသိဘူး” လို့ ဒေသခံတောင်သူ အမျိုးသမီးတစ်ဦးက ပြောပါတယ်။
ယခုလို့ ဂရု၊ဂဏန်းနဲ့ ကြွက်တွေဖျက်တာကြောင့် ပျက်စီးသွားတဲ့ စပါးပင်တွေကို ပြန်ဖာထေးစိုက်ပျိုးရပြီး တချို့တောင်သူတွေကတော့ အစကနေ အကုန်ပြန်ထည့်စိုက်နေရတယ်လို့လည်း ဆိုပါတယ်။
အာဏာမသိမ်းခင်က လယ်စိုက်ဖို့ ဝယ်ရတဲ့ပျိုးပင်ဟာ အစည်း (၁၀၀) ကို ၂သောင်းကျပ်သာကျသင့်ပြီး ယခုချိန်မှာတော့ ပျိုးပင် အစည်း(၁၀၀)ကို ၆သောင်းကျပ် ထိဈေးမြင့်တက်လာတာဖြစ်ပါတယ်။
ခရု၊ဂဏန်းနဲ့ ကြွက် ဖျက်ခံရတဲ့ လယ်ဧကပေါင်း (၁၀၀၀)နီးပါး ရှိနေတယ် လို့ တောင်သူတွေက ခန့်မှန်း ပြောဆိုနေကြပါတယ်။
