ကန္တာရဝတီတိုင်း (မ်)
ထိုင်း-ကရင်နီနယ်စပ်မှာရှိတဲ့ ကရင်နီ ဒုက္ခသည်စခန်း အမှတ် (၂) မှာ မနေ့က ဧပြီ ၁၉ ရက်နေ့မှာ နေအိမ် ၄ လုံး မီးလောင်ပြာကျခဲ့တဲ့ မိသားစုတွေအတွက် ထိုင်းအာဏာပိုင်တွေနဲ့ စခန်းတာဝန်ခံတွေက ထောက်ပံ့မှုပေးသွားနေတယ်လို့ စခန်းတာဝန်ခံတစ်ဦးက ပြောပါတယ်။
“ဒီနေ့ကတော့ ကျန်ောတို့ shelter ဖက်ကတော့ သွားပြီးတော့ ကွင်းဆင်းပြီးတော့ ထိခိုက်တဲ့ အိမ်ခြေတွေကို သွားစီစစ်တယ်။ နောက်ပြီးတော့ သစ်တို့ ဝါးတို့ ဖက်တို့ တစ်အိမ်ကို ဘယ်လောက်ဘယ်လောက်နှုန်းနဲ့ ပေးရမယ်ဆိုတာ ကွင်းဆင်းလေ့လာနေတုန်းပဲ။ ဒီရက်က သူတို့( ထိုင်းအာဏာပိုင်) ကြိုတင်ပြောထားတဲ့အရ ကျနော်တို့ သွားပြီးတော့ မတွေ့ရသေးဘူး။ သူတို့ ဆန်တို့ ဘာတို့ လာကူညီမယ်လို့တော့ သတင်းတော့ ပေးထားတယ်။ တဟာ(ထိုင်းစစ်တပ်) ဖက်ကပေါ့နော” လို့ စခန်း (၂) စခန်းတာဝန်ခံ စောဘီယားမီ က ပြောပါတယ်။
မီးလောင်မှုဖြစ်ပွားခဲ့ချိန်မှာ ထိုင်းအာဏာပိုင်တွေ လာရောက်ကြည့်ရှုသွားခဲ့ပြီး ရေသန့်အချို့ကို ယူလာပေးခဲ့တယ်လို့လည်း ပြောပါတယ်။ လက်ရှိမှာတော့ နေအိမ်ဆုံးရှုံးခဲ့တဲ့ မိသားစုတွေအတွက် အိမ်ထောင်စု နှစ်စုကို ဆန်တစ်အိတ်နှုန်းနဲ့ စခန်းက ထောက်ပံ့ထားတယ်လို့လည်း ပြောပါတယ်။
နေအိမ်တစ်လုံးရဲ့ မီးဖိုကနေ မီးစတင်စွဲလောင်ခဲ့ပြီးနောက် တခြားနေအိမ်သုံးလုံးအထိ ကူးစက်သွားတာကြောင့် စုစုပေါင်း နေအိမ် ၄ လုံး မီးလောင်ပြာကျသွားခဲ့ပြီး ပိုင်ဆိုင်မှုတွေလည်း အကုန်ဆုံးရှုံးခဲ့တယ်လို့ ဆိုပါတယ်။ မီးဆက်မကူးနိုင်အောင်လို့ ဒေသခံတွေက ဘေးပတ်ပတ်လည်မှာရှိတဲ့ နေအိမ် ၉ လုံးကိုလည်း အိမ်ခေါင်မိုးတွေ ဖြုတ်ထားခဲ့ကြပြီး မီးငြိမ်းသတ်နိုင်ခဲ့ကြတယ်လို့ ပြောပါတယ်။
မီးလောင်ပြာကျခဲ့တဲ့ နေအိမ်တွေမှာ မိသားစုဝင်အားလုံး ၂၁ ဦး ရှိပြီး လူတွေကတော့ အထိအခိုက်တစ်စုံတရာ မရှိဘူးလို့လည်း စခန်းတာဝန်ခံက ပြောပါတယ်။
